Kuna Kwa Ayibere
4 Ozevo, wau vo nsilu wa kota muna vundu kiandi wakinu, yambula twayikeba* valembi kala yo muntu muna yeno olembi fwana muna nsilu wau.+ 2 Kadi e nsangu zambote zasamunua mpe kwa yeto,+ wauna zasamunuinua kwa yau; kansi e diambu dina bawá ke diabatwasila nluta ko, e kuma kadi ke bakala ntwadi ko muna lukwikilu ye awana bawá. 3 Kadi oyeto twasonga lukwikilu twakota mu vundu kina kavovela vo: “I dianu yadila e ndofi muna makasi mame vo: ‘Ke bekota muna vundu kiame ko,’”+ kana una vo e salu yandi yafokoka tuka kuna semo dia nza.+ 4 Kadi muna sono wavova mu kuma kia lumbu kia nsambwadi vo: “O Nzambi wavunda muna lumbu kia nsambwadi muna salu yandi yawonso,”+ 5 wavova diaka vo: “Ke bekota muna vundu kiame ko.”+
6 Wau vo vakinu ye ankaka bekota mo, ana bateka samunuinua e nsangu zambote ke bakota mo ko mu kuma kia ukolami wau,+ 7 vava kiavioka kolo kiayingi wasikidisa diaka e lumbu wau kavova muna nkung’a Davidi vo, “O unu”; wauna diavovua vo: “O unu, avo nuwididi e nding’andi, ke nubadisa ntima mieno ko.”+ 8 Kadi kele vo Yosua+ kabafila vana fulu kia vundu, Nzambi kadi vovela diaka lumbu kiankaka ko. 9 Ozevo, vakinu ye lumbu kia vundu kwa nkangu a Nzambi.+ 10 Kadi ona okotele muna vundu kia Nzambi, ovundidi muna salu yandi, wauna Nzambi kavundila muna salu yandi.+
11 Dianu vo, yambula twavanga ngolo twakota muna vundu kiakina, kimana valembi kala muntu otanginina mbandu ya ukolami wau.+ 12 Kadi e diambu dia Nzambi diamoyo ye nkuma,+ dilutidi mpe o twa kwa konso nsosolo a meno mole,+ dikotanga kana nkutu muna mpambaninu a moyo* yo mwanda,* yo mayikilu yo nluku, dilenda sengomona e ngindu ye makani ma ntima. 13 Kavena vangwa kiaswekama ko vana ndose andi,+ kadi lekwa yawonso ina nkonga yo senzama vana meso ma ndiona tutela e mbalu.+
14 Dianu vo, wau tuna ye ngang’ambuta anene ona wakota kuna zulu, Yesu wa Mwan’a Nzambi,+ yambula twatatamana sia umbangi mu kuma kiandi.+ 15 Kadi ke tuna ye ngang’ambuta ko ona olembi bakula lutovoko lweto,+ kansi ndioyo tuna yandi watontwa muna mawonso nze yeto, kansi kasumuka ko.+ 16 Ozevo, yambula twafinama kunda kia Nzambi ye vuvu kiasikila, kimana twafwilwa e nkenda yo vua e nsambu+ zikutusadisa muna ntangwa ifwene.