Kimpovi

7 E nkumbu ambote* isundidi mazi mantalu,+ e lumbu kia lufwa kisundidi e lumbu kia luwutuku. 2 Diambote mu kwenda kuna nzo ya dilu ke mu kwenda kuna nzo ya nkinzi ko,+ kadi o lufwa i mfoko a wantu awonso, ana bena o moyo bafwete dio sungamenanga. 3 O lukendalalu lusundidi tusevo,+ kadi e ndose yakendalala ntima itomesanga.+ 4 O ntim’a nkwa ngangu una kuna nzo ya dilu, kansi o ntim’a zowa una kuna nzo ya nkinzi.*+

5 Diambote mu wá lusembo lwa nkwa ngangu+ ke mu wá nkung’a mazowa ko. 6 Kadi wauna e nsende zibabanenanga ekolo zivianga kuna nsi a kinzu, i una mpe wina tusevo twa zowa;+ ediadi mpe i mpavala kwandi. 7 O lubangamu lulenda fila o nkwa ngangu mu lauka, e mbabu ntima ibendomonanga.+

8 E mfoko a diambu isundidi o lubantiku lwandi. O kala yo luzindalalu kusundidi mwand’a lulendo.+ 9 Kufungi makasi mu nzaki ko,*+ kadi o ntim’a mazowa i ufunganga o makasi.*+

10 Kuvovi ko vo: “Ekuma e lumbu yavioka isundidi eyayi?” Kadi ke ngangu ko zifididi mu yuvula e kiuvu kiaki.+

11 Avo nkwa ngangu otambwidi e vua, diambu diambote. Ediadi nluta ditwasanga kwa awana bemonanga ntemo a lumbu.* 12 Kadi e ngangu tanina zitaninanga+ wauna e nzimbu zitaninanga,+ kansi o zayi usundidi muna diambu edi: E ngangu zitaninanga moyo a ndiona una zau.+

13 Badika e salu kia Nzambi aludi, kadi nani olenda singika kina kavangidi kiatekama?+ 14 Muna lumbu kiambote, kala wambote,+ kansi muna lumbu kiampasi,* sungamena vo Nzambi wavanga e lumbu yau yole+ kimana o wantu balembi kala ye ziku kia* dina dikubabwila muna lumbu ikwiza.+

15 Muna zingu kiame kiankufi,*+ mbwene mambu mawonso—tuka muna muntu ansongi ona ofwila muna unsongi wandi+ yamuna muntu ambi ona ozinganga lumbu yayingi kana una vo nkwa mavangu mambi.+

16 Kukadi nkwa unsongi wasaka ko+ ngatu kuyisonga vo u nkwa ngangu zasaka.+ Ekuma okuyitwasila lufwasu?+ 17 Kuyivani mvimba ko mu vanga e mbi ngatu kala zowa.+ Ekuma ofwila e nzaki?+ 18 Diambote mu lemvokela longi dimosi lembi bembola diankaka;+ kadi ndiona ovuminanga Nzambi olemvokela mau mole.

19 E ngangu zikitulanga nkwa ngangu se nkwa nkuma lutila akwa ngolo kumi muna mbanza.+ 20 Kadi ke vena muntu ansongi ko ova ntoto ona ovanganga kaka diambu diambote yo lembi sumuka.+

21 Ye mpe, kusie sungididi ko muna mambu mawonso bevovanga o wantu;+ avo ke wau ko, owá ntaudi aku okuvovelang’e mbi;* 22 kadi ngeye kibeni otomene wo zaya muna ntim’aku vo nkumbu miayingi ovovelanga akaka e mbi.+

23 Mawonso mama mfimpidi mo muna ngangu, mpovele vo: “Ikituka se nkwa ngangu.” Kansi kialenda dio ko. 24 Mana mavangama kala mampasi mu bakula ye mpe masina kikilu. Nani olenda mo bakula?+ 25 Mvilwidi o ntim’ame mu zaya yo fimpa yo vavulula e ngangu yo zaya e kuma mambu mevangamenanga yo bakula o bi wa uzowa yo uzowa wa ulau.+ 26 Edi yasolola: O nkento wina nga ntambu,* ona wina yo ntima nga konde ye wina yo moko nga tuvambu twa pelezo osundidi lufwa e ndudi. Ona oyangidikanga Nzambi aludi otina nkento ndioyo,+ kansi o nsumuki obakama kwa yandi.+

27 “Tala, edi nsolwele,” u kavovele o nkutakesi.+ “Nsatulwidi diambu dimosi-dimosi yazaya e kuma, 28 kansi dina yavavanga* kisolwele dio ko. Vana vena funda dia wantu nsolwele yakala dimosi,* kansi kisolwele vo kana nkento mosi ko. 29 Mono kibeni edi nsolwele: O Nzambi aludi wavanga wantu basingama,+ kansi oyau kibeni basolele nzila zau zankaka.”+