Wantete wa Paulu Kuna kwa Esi Korinto
10 Ampangi, nzolele lwazaya wo vo, mase meto yau awonso kuna nsi a tuti bakala,+ yau awonso baviokela muna mbu,+ 2 yau awonso bavubilwa muna Mose, kuna nsi a tuti ye muna mbu, 3 yau awonso madia mau mamosi ma kimwanda badia,+ 4 yau awonso banua maza mamosi ma mwanda.+ Kadi banuina muna tadi dia mwanda dina diabalandanga, e tadi diadi Kristu diasunzulanga.+ 5 Kansi, ayingi muna yau Nzambi kabayangalela ko, bafwila muna makanga.+
6 Mambu mama mena se mbandu kwa yeto, kimana twalembi zola mambu mambi wauna oyau bazolela mo.+ 7 Ke nusambidi teke ko nze una bavanga akaka muna yau; wauna wasonama vo: “O nkangu ufongele mu dia yo nua. I bosi, utelamene mu sakana.”+ 8 Ke nute zumba* ko, wauna akaka muna yau batela e zumba,* 23.000 bafwa muna lumbu kimosi.+ 9 Ke tutonti Yave* ko,+ wauna akaka muna yau bantontela yo tatikwa kwa nioka yo fwa.+ 10 Ke luyidima ko, wauna akaka muna yau bayidimina+ yo vondwa kwa mfwasi.+ 11 Mambu mama mababwila se mbandu, masonekwa muna kutulukisa,+ oyeto tulweke kuna nsuka za tandu.
12 Dianu vo, ndiona obenze vo watelama kena, yambula katoma tala kalembi bwa.+ 13 Kavena ntonta nutontwa ko ina yalembi luakila ankaka.+ Kansi, Nzambi nkwa kwikizi, ke yambula ko vo nuatontwa e ntonta ina ke nulendi zizidila ko,+ kansi kumosi ye ntonta, oteta mpe nzila kimana nualenda yo zizidila.+
14 Dianu vo, azolw’ame, nutina nsambila za teke.+ 15 Mpovele nze kuna kw’alungaladi; yeno kibeni nutoma fimpa dina mpovele. 16 E mbungw’a lusambulu ina tusambulanga, nga ke mu kala ntwadi ko muna menga ma Kristu e?+ E mbolo ina tubukunanga, nga ke mu kala ntwadi ko muna nitu a Kristu e?+ 17 Kadi mbolo imosi kaka ina, oyeto mpe kana una vo ayingi twina, nitu mosi kaka,+ kadi yeto awonso mbolo imosi tudianga.
18 Nutala Isaele a kinitu: Awana bedianga yimenga, nga ke bena ntwadi ye ziku ko e?+ 19 Ozevo, adieyi nzolele vova? E kimenga kia teke, nga lekwa kiamfunu e? Yovo e teke lekwa kiamfunu e? 20 Ve; kansi edi mpovele vo ina esi zula bekelanga yimenga, kwa nkuya bekelanga yo, ke kwa Nzambi ko;+ kizolele ko vo yeno lwakala e ntwadi ye nkuya.+ 21 Ke nulendi nua mbungw’a Yave* ko ye mbungw’a nkuya; ke nulendi dila vana “meza ma Yave”*+ ko ye vana meza ma nkuya. 22 ‘Nga Yave* tumwesesa nsongo e’?+ Nga tunsundidi e ngolo e?
23 Mambu mawonso mansongi, kansi ke mawonso ko metwasanga nluta. Mambu mawonso mansongi, kansi ke mawonso ko mekumikanga.+ 24 Konso muntu kavavi wete dia yandi kibeni ko, kansi wete dia nkwandi kaka.+
25 Konso kina kitekwanga vana zandu dia mbizi nudia kweno, kansi ke nuyuvula ko mu kuma kia ntona zeno, 26 kadi “o ntoto ye yawonso ina mo ya Yave.”*+ 27 Avo mundembi-kwikila ulubokelese lwenda dila kuna nzo andi, avo luzolele wo, ludia konso ina kekunuvana, ke luyuvula ko mu kuma kia ntona zeno. 28 Kansi avo muntu unuvovese vo, “Ekiaki kiakelelwa kimenga,” ke ludie kio ko mu kuma kia ndiona unuvovese wo ye mu kuma kia ntona.+ 29 Ke ntona zaku ko ngikidi, kansi za muntu ankaka. Ekuma luvevoko lwame lufwete fundisilwa kwa ntona za muntu ankaka?+ 30 Avo ndidi yo vutula matondo kwa Nzambi, ekuma ivovelwa e mbi muna kina mvutulwidi matondo?+
31 Dianu vo, kana nudia, kana nunua, konso mana nuvanga, nuvangila mawonso muna nkembo a Nzambi.+ 32 Ke nukadi sakuba ko kuna kwa Ayuda, Mingerekia ye muna nkutakani a Nzambi,+ 33 wauna ivavilanga yangidika wantu awonso muna mambu mawonso, kivavanga wete dia mono kibeni ko,+ kansi wete dia ndonga kaka, kimana bavuluzwa.+