Afundisi
2 Mbasi a Yave+ otombokele tuka kuna Ngilengale+ yakuna Bokime, ovovele vo: “Yanuvaikisa muna Engipito yo kunukotesa mu nsi ina yadila mase meno e ndofi.+ Yavova mpe vo: ‘E kangu nkangidi yeno kilendi dio kulula ko.+ 2 Vo i yeno, ke nukangi kangu yo nkangu a nsi yayi ko,+ nubangula maziku mau.’+ Kansi oyeno ke nuawididi nding’ame ko.+ Ekuma nuvangìdi e diambu diadi? 3 I dianu yavovela vo: ‘Kikubayinga vovo nuina ko,+ bekala se sokolo vovo nuina,+ e nzambi zau zikunuvukumuna.’”+
4 Vava mbasi a Yave kavovele mambu mama kwa Aneyisaele awonso, o nkangu ubokomokene ye dilu. 5 Dianu vo, bayikidi e fulu kiakina vo Bokime,* bakelele vo kimenga kwa Yave.
6 Yosua vava kasindikidi nkangu, Aneyisaele bele konso muntu kuna fwa diandi muna vua e nsi.+ 7 O nkangu ukwamanene sadila Yave muna lumbu yawonso ya Yosua, ye muna lumbu yawonso ya ambuta ana bazinga kunim’a lufwa lwa Yosua, ana bamona mavangu mawonso manene ma Yave mana kavanga muna wete dia Isaele.+ 8 I bosi, Yosua wa mwan’a Nuni, wa selo kia Yave, ofwidi ye kimbuta kia mvu 110.+ 9 Banzikidi muna zunga kia vua diandi muna Timenati-sera,+ ina kuna zunga kia miongo mia Eferaime, kuna node a Mongo a Ngasi.+ 10 E mbandu yayina yawonso yafwa wauna wafwila mase mau, vavaika mbandu yankaka kuna nim’au, ina ke yazaya Yave ko, ngatu mana kavanga kwa Isaele.
11 Aneyisaele bavangidi mambu mambi vana meso ma Yave yo sadila teke ya Bale.+ 12 Bayambwidi Yave wa Nzambi a mase mau, ona wabavaikisa muna Engipito.+ Balende nzambi zankaka, nzambi za nkangu mina mibazungidi,+ yo vumbamena zo, bafungisi Yave makasi.+ 13 Bayambwidi Yave, yo sadila Bale ye teke ya Asetorete.+ 14 O makasi ma Yave mafusukidi Isaele, i kuma kabayekolwele vana moko ma asanzi ana babasanzidi.+ Ubatekele vana moko ma mbeni zau zina zibazietele,+ ke balendele diaka telama ko vana vena mbeni zau.+ 15 Konso kuna bayendanga, o koko kwa Yave kwazitanga muna yau, kwabatwasilanga e mpasi,+ wauna kavova Yave, wauna o Yave kabadila e ndofi,+ mpasi kikilu bamona.+ 16 Yave wabundumunanga afundisi, ana babavuluzanga vana moko m’awana babasanzanga.+
17 Ke bawila nkutu afundisi ko, bele tá zumba ye nzambi zankaka yo vumbamena zo. Bavengomokene mu nswalu muna nzila ina yadiatila mase mau, ana balemvokela nkanikinu mia Yave.+ Kansi, oyau ke bavangidi wo ko. 18 Konso ntangwa o Yave kababundumwinanga afundisi,+ o Yave wakalanga yo mfundisi, yo kubavuluza vana moko ma mbeni zau e lumbu yawonso ya mfundisi; kadi Yave wamonanga nkenda*+ mu kuma kia bumu kiau vava+ bababangikanga yo kubakota nsoki.
19 Kansi, avo mfundisi ofwidi, bavutukilanga bi wau lutila nkutu mase mau muna landa nzambi zankaka, basadila yo vumbamena zo.+ Ke bayambula mavangu mau ko ngatu ntima miau mia mbâdi. 20 Kuna kwalanda, makasi ma Yave mafusukila Isaele,+ ovovele vo: “Wau vo e zula kiaki kikulwidi e kangu diame+ dina yakanga yo mase mau yo kunkolamena,+ 21 kiyinga diaka esi zula ko vana bena, ana Yosua kasisa vava kafwa.+ 22 Yatontela Isaele muna yau, kana vo belunda nzil’a Yave+ yo diatila mo nze una wavanga mase mau.” 23 Kiaki i kuma Yave kayambulwila e zula yayina. Kabayinga vana vau ko ngatu kubayekola vana moko ma Yosua.