Yesaya
Nani ndioyo ovuete mvuatu mia zitu,
Odiatilanga muna nene wa nkum’andi e?
“I mono, Ndiona ovovanga mambu mansongi,
Ndiona ovuidi ulolo wa nkuma wa vuluza.”
2 Ekuma o mvuatu aku winina wa mbwaki,
Ekuma e mvuatu miaku minina nga mia muntu odiatanga uva muna kaminu?+
3 “Mono mosi kaka ndiete e uva muna kaminu.
Ke mosi ko vana vena o nkangu okedi yame.
Nkwamanene zo diatakesa muna makasi mame,
Yo tufakesa zo muna nganzi zame.+
E mvuatu miame mizele ye ntimbu-ntimbu za menga mau,
Mbebese o mvuatu ame wawonso.
4 Kadi e lumbu kia landa e kunda kina omu ntim’ame,+
O mvu wakûla o nkangu ame ulweke.
5 Ntadidi, kansi ke vakedi muntu ko kansadisa;
Nsivikidi wau vo ke vakedi ona unsadisa ko.
6 Muna makasi mame ndiatakese nkangu,
Ibanuikini o makasi mame, bakolelo+
Ngitidi menga mau vana ntoto.”
7 Iyika walakazi wa Yave,
Mavangu ma nkembo ma Yave,
Muna mawonso kavangidi o Yave mu kuma kieto,+
O ulolo wa mambu mambote kavangidi mu kuma kia nzo a Isaele,
Mun’owu wa nkenda zandi yo zola kwandi kusundidi.
8 Kadi ovovele vo: “Kieleka, oyau i nkangu ame, o wana ana ke bekondwa kwikizi ko omu mono.”*+
Ozevo, oyandi okitukidi se Mvuluzi au.+
9 Muna mpasi zau zawonso, oyandi mpe wamona e mpasi.+
O nati andi a nsangu* wabavuluza.+
Muna zola kwandi ye nkenda zandi i kabakûdila,+
Wabazangula yo kubanata e lumbu yawonso ya nz’ankulu.+
10 Kansi, oyau bankolamena+ yo kendeleka mwand’andi avelela.+
11 I bosi, basungamena e lumbu ya nz’ankulu,
E lumbu ya Mose wa selo kiandi, bayuvula vo:
“Akweyi kena Ndiona wabatombola muna mbu+ kumosi ye avungudi a kambi diandi?+
Akweyi kena Ndiona wasia mwanda Andi avelela muna yandi,+
12 Ndiona wayambula vo koko Kwandi kwankuma kwafila o koko kwalunene kwa Mose,+
Ndiona wavambula o maza vana ntadisi au+
Kimana kayivangila nkumbu yakwele mvu?+
13 Akweyi kena Ndiona wabadiatisila muna maza menikukanga mu ngolo,*
Kimana bakangala lembi ta sakuba,
Nga mvalu muna makanga e?
14 O mwand’a Yave ubavundisi
Wauna e kambi dikulumukinanga kuna ndimba.”+
15 Tala ova ntoto yo mona tuka kuna zulu
Tuka kuna fulu kiaku kiazanguka, kiavauka ye kiankembo.*
Utuyimini wo.
16 Kadi ongeye u Se dieto;+
Kana una vo Abarayama katuzeye ko
Isaele katusungamene ko,
E Yave, ongeye u Se dieto.
Nkûdi eto wa tuka kolo, eyayi i nkumbu aku.+
17 E Yave, ekuma utuyambulwidi twatungiana muna nzila zaku?
Ekuma oyambulwidi* vo twabadisa e ntima mieto yo yambula kuvumina?+
Vutuka, mu kuma kia selo yaku,
O makanda mena vo i vua diaku.+
18 O nkangu aku avauka wavua e nsi mu kolo kiakete kaka.
E mbeni zeto zidiatakese nzo aku avauka.+
19 Kadi muna mvu miayingi twakituka nze awana ke basidi yalwa kwa ngeye ko,
Nze awana ke basidi yikilwa mu nkumbu aku ko.