Wanzole wa Tusansu
16 Muna mvu wa 36 wa luyalu lwa Asa, Basa+ wa Ntinu a Isaele otombokele kanuanisa e Yuda, oyantikidi tunga* Rama+ kimana mwalembi vaika ngatu kota muntu muna zunga kia Asa wa Ntinu a Yuda.+ 2 Dianu vo, Asa obongele palata ye wolo muna lusalu lwa nzo a Yave+ ye nzo a* ntinu, otwikidi wo kwa Benadadi wa Ntinu a Suria,+ ona wakala muna Damaseke, oku vo: 3 “Kangu tuna diau* ngeye yo mono, o se diame yo se diaku. Itwikidi lukau lwalu lwa palata ye wolo. Kulula e kangu una diau* yo Basa wa Ntinu a Isaele, kimana kakatuka mu zunga kiame.”
4 Benadadi owididi Ntinu Asa, otumini mfumu za makesa mandi banuanisa mbanza za Isaele, bafwasidi Iyone,+ Dani,+ Abele-maimi ye mbanza zawonso za malundilu ma Nafetali.+ 5 Basa vava kawidi wo, vana vau oyambwidi tunga* Rama yo sisa salu kiandi. 6 Asa wa Ntinu okutakese Yuda yawonso, banete matadi ye mabaya ma Rama+ mana Basa katungilanga,+ osadidi mo mu tunga* Ngeba+ ye Misepa.+
7 Muna ntangwa yayina, Kanani+ wa moni wizidi kwa Asa wa Ntinu a Yuda, umvovese vo: “Wau vo obundidi e vuvu* kwa ntinu a Suria, kubundidi vuvu* kwa Yave wa Nzambi aku ko, o makesa ma ntinu a Suria matayidi vana moko maku.+ 8 Nga Anetiopia ye esi Libia ke bakala ye vu kianene ko ye makalu mayingi ma vita ye akwa mvalu e? Kansi, vava wabunda e vuvu muna Yave, oyandi wabayekola vana moko maku.+ 9 Kadi meso ma Yave mekwendanga muna nza yawonso+ muna songa nkum’andi muna wete dia awana bena yo ntim’asikila muna* yandi.+ Dia uzowa ovangidi; tuka wau vita okala zau.”+
10 Muna diadi, Asa ofungidi moni makasi yo kunsia muna pelezo,* kadi umfungidi kikilu makasi mu kuma kia diambu diadi. Tuka kolo kiakina, Asa oyantikidi bangika akaka muna nkangu. 11 O lusansu lwa Asa, tuka kuna lubantiku yakuna mbaninu, lwasonama muna Nkanda wa Ntinu mia Yuda ye Isaele.+
12 Muna mvu una wa 39 wa luyalu lwandi, Asa obakamene kimbevo kia malu, kimbevo kiampasi kikilu; kana nkutu muna kimbevo kiandi, kavavidi Yave ko, kansi ovavidi awuki. 13 I bosi, Asa olele yo mase mandi;+ ofwidi muna mvu wa 41 wa luyalu lwandi. 14 Banzikidi muna ziami kiampwena kina kayitimina muna Mbanz’a Davidi,+ banlekese vana mfulu yazadiswa ye mazi ma balasamu ye mazi mansunga masangwa lekwa ya mpila mu mpila.+ Bankwikidi ziku dianene dia ndumbu.*