Wanzole wa Paulu Kuna kwa Esi Korinto
1 Paulu, wa ntumw’a Kristu Yesu muna luzolo lwa Nzambi yo Timoteo+ wa mpangi eto, kuna kwa nkutakani a Nzambi ina momo Korinto, kumosi ye avauki awonso bena muna Akaya yawonso:+
2 Yambula nuakala ye nsambu yo luvuvamu lutuka kwa Nzambi wa Se dieto yo Mfumu Yesu Kristu.
3 Nkembo kwa Nzambi yo Se dia Mfumu eto Yesu Kristu,+ Se dia nkenda+ ye Nzambi a fiauzi wawonso,+ 4 ona okutufiaulwisanga* muna mpasi zeto zawonso,+ kimana twalenda fiaulwisa awana+ bena muna konso mpasi, muna lufiaulwisu tutambulanga kwa Nzambi.+ 5 Kadi wauna e mpasi zeto muna Kristu ziwokelele,+ i una mpe uwokelele lufiaulwisu tutambulanga muna Kristu. 6 Avo tumona mpasi i mu kuma kia fiauzi yo luvuluzu lweno; avo tufiaulwisu, i mu kuma kia fiauzi kikunusadisanga mu zizidila e mpasi zau zimosi tumonanga oyeto mpe. 7 E vuvu kieto muna yeno kiasikila, kadi tuzeye wo vo, wauna tumwenanga e mpasi kumosi, i tufiaulwisilwa mpe kumosi.+
8 Kadi, ampangi ke tuzolele ko vo nualembi zaya e mpasi twamona muna mvivu a Asia.+ Twakwamiswa e nkwamiswa iviokele ngolo zeto, ke twakala nkutu ye vuvu ko, musungula muna mioyo mieto.+ 9 Kansi, twabakula vo tumbu kia lufwa twazengelwa. Ediadi diavangama, kimana twalembi sia vuvu muna yeto kibeni, kansi muna Nzambi+ ona ofulanga mafwa. 10 Wau katuvuluza muna vonza kiaki kiampwena kia lufwa, okutuvuluza mpe, tuna ye vuvu muna yandi vo okwamanana kutuvuluza.+ 11 Oyeno mpe nulenda kutusadisa muna ndodokela zeno,+ kimana wantu ayingi bavutula matondo muna wete dieto, kadi tusongelo e dienga muna mvutu za sambu ya wantu ayingi.+
12 Kadi tukuyisaninanga muna diambu edi: e ntona zeto zisianga umbangi vo, muna nkal’avelela ye ludi kia Nzambi i tukadilanga ova nza, musungula mu kuma kieno, ke mu ngangu za wantu a nza ko,+ kansi muna nsambu za Nzambi kaka. 13 Kadi ke tunusonekene mambu mankaka ko, nanga mana nulenda tanga* kaka yo bakula, ngina ye vuvu vo nukwamanana bakula mambu mama una ufwene,* 14 wauna nubakwidi wo vo oyeto i lusanu lweno, oyeno mpe nukala se lusanu lweto muna lumbu kia Mfumu eto Yesu.
15 Muna vuvu kiaki, yakana vo ngiza ntete kwa yeno, kimana nuamona e kiese mu nkumbu anzole;* 16 kadi yakala ye kani dia kunukingula vava yadi vioka kuna Makedonia, yanukingula diaka vava yadi tuka kuna Makedonia, i bosi nuenda kunsindika kuna Yuda.+ 17 Vava yakana wo vanga, nga diambu diansaka yabadikila dio e? Yovo, mana yakana, nga mu kinitu yakanina mo, kimana yavova vo: “Elo, elo” i bosi “Ve, ve”? 18 Wauna Nzambi kenena nkwa kwikizi, e mvovo mieto mpe mia kwikizi. Ke tuvova ko vo “elo,” i bosi twavova diaka vo “ve.” 19 Kadi Yesu Kristu wa Mwan’a Nzambi, ona twasila umbangi vovo nuina, i sia vo, mono yo Silwano* yo Timoteo,+ ke “elo” ye “ve” ko, muna yandi “elo” kaka. 20 Kadi e nsilu mia Nzambi, kanele vo miayingi, muna yandi miakituka “elo.”+ Dianu vo, muna yandi i tuvovelanga kwa Nzambi vo “Amen,”+ kimana twamvana nkembo. 21 Kansi ndiona wasikidisa vo oyeno yo yeto kwa Kristu tuvuilu i Nzambi, yandi mpe watukusa.+ 22 Watusia mpe dimbu+ yo kutuvana lusikidisu lwa mana mekwiza,* i sia vo, mwanda+ muna ntima mieto.
23 Owau, ngikidi Nzambi se mbangi ame* vo muna wete dieno i ndembele kwizila ntete koko Korinto. 24 Ke sia ko vo tu mfumu za lukwikilu lweno,+ kansi kumosi tusalanga muna kiese kieno, kadi muna lukwikilu lweno i nusikididi.