Ludi kia Diambu mu Kuma kia Moyo
‘Luzay’e ludi, e ludi [kikunuvevola, NW].’—YOANE 8:32.
1. Ekuma dinina diamfunu muna fimpa o lukwikilu lweto mu diambu dia moyo yo lufwa?
O LUKWIKILU lwa diambu dia lufwa ye Zingu Kunima Lufwa i malongi ma mpila za nsambila yo lusansu lwa nza. Ne i una tumwene kala, bekwikilanga vo o moyo ufokolang’o wutuluka kele vo owutulukidi nkumbu miayingi, ibosi ekolo kina kazingidi i kisonga e mfoko andi. Ikuma vo, omosi nanga olenda kwikila edi dibwanga kunima lufwa, o wankaka okwikilanga vo ku Nirvana ukwendanga, ye akaka vo nsendo wa kwenda kun’ezulu bevingilanga. Ozevo, adieyi dia ludi? Wau kina vo o lukwikilu lweto lufilanga e mpila fu yeto, yo mavangu meto, ye nzengo zina tubakanga mu konso edi, nga ketufwete vava ko e mvutu za yuvu yayi?
2, 3. (a) Ekuma tufwete bundil’e vuvu mun’oma kevovang’o Nkand’a Nzambi mu diambu dia moyo? (b) Mun’owu wa Nkand’a Nzambi nki i ludi kia diambu mu kuma kia moyo?
2 O Nkand’a Nzambi una vo, i nkanda ankulu kikilu ova nza, uzayisanga o lusansu lwa wantu tuka kuna lubantiku vava kiavangama o moyo a muntu antete. O malongi mandi ke ma kindongota yo tusansu twa wantu ko. O Nkand’a Nzambi utoma songang’e ludi mu kuma kia moyo: O moyo aku i ngeye kibeni, amafwa ke bena vo diaka ko, awaya bena muna luyindulu lwa Nzambi i yau kaka befuluka muna yau ntangwa. O zaya e diambu diadi aweyi dilenda songa kwa ngeye?
3 ‘Luzay’e ludi, e ludi [kikunuvevola, NW],’ u kavova o Yesu Kristu kw’alandi andi. (Yoane 8:32) Elo, e ludi vevola kivevolanga. Kansi, ozay’e ludi mu kuma kia moyo aweyi kikutuvevolwela e?
Luvevoko Muna Wonga ye Ndimbul’a Vuvu
4, 5. (a) Ozay’e ludi mu kuma kia moyo nkia wonga kuvengomonanga? (b) E vuvu kia lufuluku aweyi kiasadisila e dumbelele kimosi wayelanga e?
4 “Ndonga ya wantu bemonang’o wonga wa lufwa ke bezolanga dio yika nkutu ko,” ukavovele The World Book Encyclopedia. “O mvovo wau ‘fwa’ ke uzolwanga yikwa nkutu ko muna nsi za Ocidente,” ukavova o nsoneki mosi a lusansu lwa nza. Muna zaka nsi, muna yik’o muntu vava kefwanga betoma sadilanga e mvovo nze i miami, “oviokele” ye “oviokele kwandi”. O wonga wau wa mafwa i mu kuma kia lembi zaya e ludi kia diambu, kuna kwa wantu ayingi o lufwa mbumba kikilu. O zayi wa kieleka muna edi dikutubwilanga vava tufwanga ukululanga o wonga wau.
5 Kasikil’owu, se badiki e ngindu za Michaelyn wakala ye kimbuta kia mvu 15. Wakala ye kimbevo kia vonza kia leucemia [wokela kwa menga mu nitu] ye wayiza fwa. O Paula wa ngw’andi wasungamenanga e mvovo miandi: “O Michaelyn wavova vo kena ye wonga wa fwa ko, ekuma otomene wo zaya vo o lufwa lwa lumbu yafioti kaka. Twamokena mayingi mu diambu dia nz’ampa ya Nzambi ye mu diambu dia awaya befulukila mo. Ke lukatikisu ko—o Michaelyn wakala yo lukwikilu lwampwena muna Yave wa Nzambi ye muna lufuluku.” E vuvu kia lufuluku kiavevola e dumbelele kiaki muna wonga wa lufwa.
6, 7. E ludi mu kuma kia moyo weyi kikutuvevolwelanga muna ndimbula vuvu? Songela dio.
6 Aweyi e ludi kiasadisila amase ma Michaelyn? “E mfwa ya mwan’eto a dumbelele i ntantu zisundidi zatubwila,” u kavova o Jeff w’es’andi. “Kansi tubundang’e vuvu muna nsilu a Yave wa lufuluku, tuvingilang’e lumbu kina tukika Michaelyn muna moko meto. Ekwe mpila kiese kia kala diaka vamosi!”
7 Elo, ozay’e ludi mu kuma kia moyo muntu kuvevolanga muna ndimbul’a vuvu yilenda twasa o lufwa lwa nzolw’aku. Kieleka vo, ke ven’edi dilenda fokola ko e ntantu ye nkenda zitwasanga lufwa lwa nzolw’eto. Kansi kadi, e vuvu kia lufuluku kilenda vevola e nkenda yo zizidila e ntantu.
8, 9. Zaya e ludi muna nkal’a mafwa ukutuvevolanga muna nkia wonga e?
8 E ludi kia Sono mu diambu dia nkal’a mafwa kikutuvevolanga mpe muna wonga wa mafwa. Muna zaya e ludi kia diambu diadi ndonga bakala bakangama muna kinkulu kia diambu dia lufwa ke betelekanga diaka ntima ko, muna wonga wa tambul’e sibu yovo lokw’e nkisi, ye kebevananga diaka tukau twa ntalu ko muna lemvola akulu au mu kubatanina muna mwanda uvava kubatokanesa. Wau vo afwa “ke bazeye diambu ko,” o mavangu mama ke mena mfunu ko.—Kimpovi 9:5.
9 E ludi kina muna Nkand’a Nzambi mu kuma kia moyo, kivevolanga kikilu ye kifwana bundw’e vuvu. Kansi se badika mpe e vuvu kiakaka kekusongang’o Nkand’a Nzambi.
[Mvovo mia Sina mina muna lukaya 29]
E ludi mu diambu dia moyo kikuvevolanga muna wonga wa mafwa, wonga wa lufwa, ye muna ndimbul’a vuvu mu kuma kia nzolw’aku wafwa