Nga una nze nti a Lagani Auna?

MUNA vata dimosi kuna ndambu a mbanza ya Port Moresby, Papua-Nova Guiné, ateleki wole batuka mu salu kia umbangi yo vutuka kuna nzo au, bamona nti mosi wambote. O mbuta wavova vo: “Tala o nti a lagani auna!” vava kaviluka kwa nleke, wavova vo: “E nkumbu a nti wau isonganga vo ‘nti a mvu ke mvu.’ Nswaswani ye nti miakaka, o nti wau usotolanga makaya mandi mawonso yo kituka nze wau uyumini. Kansi, e mvula vava zinokanga, usavukanga diaka yo vaikisa e mvuma yo songa diaka o wete wandi.”

Vena ye diambu tulenda longoka muna nti a lagani auna. O nti wau uyikilwanga kw’awana belongokanga e nti vo umosi muna nti ntanu mivayikisanga mvuma zisundidi o wete omu nza. Kana una vo usotolanga mvuma ye makaya mandi muna nsungi a sivu, o nti wau ke ukondwanga maza ko. Uvwidi mianzi miangolo, milenda mena kana nkutu va fulu kia matadi. Muna kuma kiaki, uzizidilang’e tembwa yangolo. Muna mvovo miakaka, tulenda vova vo nti wau ke uyumanga ko kana nkutu mu ntangw’a mpasi.

Oyeto mpe, tulenda bwilwa mpasi zilenda tonta lukwikilu lweto. Nki kikutusadisa mu zizidila? Nze nti a lagani auna, tulenda nwa maza ma moyo mena muna Nkand’a Nzambi, una vo i Diambu dia Nzambi. Tufwete mpe sikila muna Yave ‘w’etadi dieto’ ye muna nkubik’andi. (2 Samuele 22:⁠3) Elo, o nti a lagani auna ukutusungamesanga vo, kana nkutu mu ntangw’a mpasi, tulenda sikila muna mwanda kele vo tuwididi malongi mana kekutuvananga o Yave. Avo tuvangidi wo, ‘tuvw’e nsilu’ katusil’o Nzambi kumosi yo moyo a mvu ya mvu.​—⁠Ayibere 6:12; Lusengomono 21:⁠4.

Nga Ozolele Kingulwa Kuna nzo aku?

Kana nkutu mu nza yayi yampasi, olenda kala ye kiese kitukanga mu vw’o zayi wa ludi kia Nkand’a Nzambi. Muna zaya diaka maka mambu yovo tambula elongi dia ngovo dia Nkand’a Nzambi, soneka kwa Mbangi za Yave, Caixa Postal 6877, Luanda, Angola, yovo sadila e nzila zina muna