Nga Oyikamanga Kimfumu Kia Yave?

“Nuvova muna zula vo, Yave oyalanga.”—NKUNGA 96:10.

1, 2. (a) Muna ngonde a Oktoba ya mvu a 29 wa tandu kieto, nkia diambu diesivi diavangama? (b) Ediadi nkia nsasa diakala kuna kwa Yesu?

MUNA ngonde a Oktoba ya mvu a 29 wa tandu kieto, diambu diesivi diavangama, edi ke diateka vangama ko ova ntoto. Matai wasoneka vo: “O Yesu, vava kavubilu, katombok’aka muna maza, ezulu dinziukìdi, [Yoane wa Mvubi] omwene o mwand’a Nzambi okulumukini nga eyembe, yo kwiza vana yandi [Yesu]; ndinga itukidi kun’ezulu, oku vo, Ndioyu i Mwan’ame anzolwa, ona nyangalelanga.” Ediadi dimosi muna mambu mayika asoneki ayá a Nsangu Zambote.—Matai 3:16, 17; Maku 1:9-11; Luka 3:21, 22; Yoane 1:32-34.

² O mwand’avelela wakulumuka muna Yesu wasonga vo yandi i Kuswa, mvovo una ye nsasa vo Masia yovo Kristu. (Yoane 1:33) Owau, e “mbongo” yasilwa nsilu yazayakana! Ona watelama vana ndose a Yoane wa Mvubi yandi osinga bosolwa e singini kwa Satana, i bosi kebosola o ntu a mbeni a Yave ye kimfumu Kiandi. (Etuku 3:15) Tuka muna ntangwa yayina, Yesu wazaya vo kafwete sia ngolo mu lungisa ekani dia Yave mu kuma kia kimfumu ye Kintinu Kiandi.

3. O Yesu aweyi kayikubikila muna salu kiandi kia yikama kimfumu kia Yave?

³ Muna kala wakubama muna salu kina kavewa, ‘Yesu wazala yo mwand’avelela, wavutuka tuka kuna Yodani, wanatwa kuna makanga kwa mwanda.’ (Luka 4:1; Maku 1:12) Muna lumbu 40, Yesu wakala ye ntangwa yatoma badika mu kuma kia kimfumu kia Yave kiafidiswa e mpaka kwa Satana y’ekani diandi dia yikama kimfumu kia Yave. E mpaka zazi zakatikisa mpe e kwikizi kia vangwa yawonso kun’ezulu y’ova ntoto. Tufwete badika e kwikizi kia Yesu mu zaya dina tufwete vanga mu songa vo yeto mpe tuyikamanga kimfumu kia Yave.—Yobi 1:6-12; 2:2-6.

Kimfumu kia Yave Kiafidiswa e Mpaka

4. Satana adieyi kavanga muna telamena kimfumu kia Yave?

⁴ Kieleka vo, muna mambu mayikilu kala, Satana kaviokesa elau ko. Vana vau, wayantika tonta “mbongo” a “nkento” a Nzambi muna makanga. (Etuku 3:15) Satana watonta Yesu nkumbu ntatu mu vava kumvukumuna kavanga dina dilenda kuntwasila e nluta, vana fulu kia vanga dina katumwa kwa S’andi. Muna nkumbu atatu watelamena kimfumu kia Yave muna songa kwa Yesu e “yintinu yawonso ya nza, yo nkembo au.” Kuna unkabu wawonso Satana wavovesa Yesu vo: “Eyayi yawonso ikuvana yo, ovo ofukama, wankunda.” Wau katoma wo zaya vo Nkadi Ampemba una ye wisa kia “yintinu yawonso ya nza,” Yesu wasonga esambu diandi muna kimfumu kia Yave muna kumvutula vo: “Katuka, e Satana: kadi diasonama vo, o Yave wa Nzambi aku, i’fwete kunda, yandi kaka i’fwete sadila.”—Matai 4:8-10.

5. Nkia salu kiampasi kakala kiau Yesu?

⁵ Muna zingu kiandi, Yesu wasonga vo, o yikama kimfumu kia Yave i diambu dialuta o mfunu. Yesu watoma dio zaya vo kafwete sikila ye kwikizi yavana kevondwa kwa Satana mu lunganisa ungunza wayika vo, e singini kia “mbongo” a nkento kibosolwa. Muna mpila yayi i kesongela vo Nzambi kaka una yo nswa wa yala. (Matai 16:21; 17:12) Wakala mpe ye kiyekwa kia songa vo e Kintinu kia Nzambi i luyalu kesadila o Yave mu fwasa Satana wa nkolami yo twasa luvuvamu kwa vangwa yawonso. (Matai 6:9, 10) Adieyi kavanga o Yesu mu lungisa e salu kiaki kiampasi?

‘E Kintinu kia Nzambi Kifinamene’

6. O Yesu aweyi kasongela vo Nzambi Kintinu kesadila mu ‘fwasa mavangu ma Nkadi Ampemba’?

⁶ Muna yantika, ‘o Yesu wizidi kuna Ngalili, yo samun’e nsangu zambote za Nzambi, vo, e ntangwa ifwene, e kintinu kia Nzambi kifinamene.’ (Maku 1:14, 15) I bosi wavova vo: ‘Mfwete kwenda samun’e nsangu zambote za kintinu kia Nzambi: e kuma i ntuminu diodio.’ (Luka 4:18-21, 43) Yesu zunga yanda kakangala mu ‘samun’e nsangu zambote za kintinu kia Nzambi.’ (Luka 8:1) Yesu wavanga mpe mavangu mayingi mankuma nze i dikila ndong’ayingi, ningamesa e tembwa, wuka mbevo yo fula mafwa. Muna vanga masivi mama, Yesu wasonga vo Nzambi osinga sukisa e mfwilu ye mpasi zawonso zatwasa ukolami muna Edene yo ‘fwasa mavangu ma Nkadi Ampemba.’—1 Yoane 3:8.

7. Yesu nkia salu katuma kw’alongoki andi? Nkia nluta kiatwasa?

⁷ Muna toma lungisa salu kia samun’e nsangu zambote za Kintinu, Yesu wasola buka ki’alongoki akwikizi yo kubalonga una bafwete sadila salu kiaki. Entete, wasola antumwa 12 yo ‘kubatuma bend’alongi e kintinu kia Nzambi.’ (Luka 9:1, 2) I bosi, watuma 70 lwakaka mu samuna vo: “E kintinu kia Nzambi kinufinamene.” (Luka 10:1, 8, 9) Vava alongoki bavutuka kwa Yesu yo zayisa e nsangu za nluta babaka muna salu kia samun’e nsangu za Kintinu, wabavutula vo: “Yamona Satana wasangumukini kun’ezulu nga nsemo.”—Luka 10:17, 18.

8. E zingu kia Yesu adieyi kiatoma songa?

⁸ Yesu wakala ye sungididi, kasidi viokesa konso elau ko dia sila Kintinu umbangi. Wasala fuku yo mwini, lembi kuyivana mu zingu kia nza yayi. Wavova vo: “Amfwenge bena ye nduzu, e nuni z’ezulu zina ye leko; kansi o Mwan’a muntu ken’oku kafil’o ntu ko.” (Luka 9:58; Maku 6:31; Yoane 4:31-34) Lufwa lwandi vava lwafinama, Yesu wavova kuna unkabu wawonso kwa Pontio Pilato vo: “Muna diadi i ngizìdi ova nza, yasila ludi o umbangi.” (Yoane 18:37) Muna zingu kiandi, Yesu wasonga vo kayiza kaka ova nza mu kala nlongi anene ko yovo mvangi a masivi yo kuyivana se kimenga mu Vuluza wantu, kansi wayiza mu yikama kimfumu kia Yave yo songa o nkum’a Nzambi wa sikidisa luzolo y’ekani diandi muna Kintinu.—Yoane 14:6.

‘Dilunganene!’

9. Satana adieyi kavanga mu bosola e singini kia “mbongo” a nkento a Nzambi?

⁹ Mawonso kavanga o Yesu mu kuma kia Kintinu ke mayangidika Satana wa Nkadi Ampemba ko. Nkumbu miayingi, wasadila ayadi ye mfumu za mabundu bena vo i ndambu a “mbongo” andi ova ntoto mu vava vonda e “mbongo” a nkento a Nzambi. Tuka luwutuku lwandi yakuna nsuk’a zingu kiandi ova ntoto, Yesu wasiwa kitantu kwa Satana ye alandi andi. Muna mvu a 33 wa tandu kieto, e ntangwa yafwana ina Mwan’a muntu kayekolwa vana moko ma Mbeni yo bosolwa e singini. (Matai 20:18, 19; Luka 18:31-33) E Nsangu Zambote zisonganga una wantu, nze Yuda mwisi Kereote, mbuta za nganga, asoneki, Afarisi y’esi Roma bafilakeselwa kwa Satana mu teka Yesu yo kumvonda vana nti ampasi.—Mavangu 2:22, 23.

10. Nkia diambu disundidi mfunu kalungisa o Yesu muna fwa vana nti ampasi?

¹⁰ Adieyi osungamenanga vava oyindulanga lufwa lwampasi kafwa o Yesu vana nti? Ediadi nanga dilenda kusungamesa e kimenga kia lukulu kavana o Yesu muna kuma kia masumu ma wantu awonso. (Matai 20:28; Yoane 15:13) Olenda sivika e nzol’ampwena kasonga o Yave muna vana kimenga kiaki. (Yoane 3:16) Nanga lenda vova nze una wavova mbut’a nkama wa mwisi Roma vo: “Kieleka ndioyu i Mwan’a Nzambi.” (Matai 27:54) Kieleka, e mpila lufwa kafwa o Yesu ilenda kufila mu sungamena mawonso mama. Kansi, sungamena mpe e mvovo miansuka kavova o Yesu vana nti ampasi oku vo: ‘Dilunganene!’ (Yoane 19:30) Nkia diambu dialungana? Mawonso kalungisa Yesu muna zingu ye lufwa lwandi vava kayiza ova ntoto, matundidika e kimfumu kia Yave. Diasonama mpe vo, o Yesu una vo i “mbongo,” omweswa mpasi kwa Satana yo katula luvezo muna nkumbu a Yave. (Yesaya 53:3-7) Diakala se kiyekwa kiampwena kikilu, kansi Yesu walungisa kio una ufwene. Kieleka, Yesu mayingi kalungisa!

11. Adieyi kevanga o Yesu muna lungisa emvimba o ungunza wayikwa muna Edene?

¹¹ Wau vo wazindalala ye kwikizi, Yesu wafulwa, ke nze muntu ko, kansi nze “mwand’amumpana-moyo.” (1 Korinto 15:45; 1 Petelo 3:18) Yave wasia nsilu kwa Mwan’andi vo: ‘Vwand’oku koko kwame kwalunene yavana nsia mbeni zaku se nsikinw’a tambi yaku.’ (Nkunga 110:1) E “mbeni” ziyikwanga mu sono kiaki i Satana ye “mbongo” andi yawonso. Nze Ntinu muna Kintinu kia Masia kia Yave, Yesu Kristu ovita ntu mu fwasa mbeni zandi zawonso, kun’ezulu y’ova ntoto. (Lusengomono 12:7-9; 19:11-16; 20:1-3, 10) Muna kolo kiakina, o ungunza wasonama muna Etuku 3:15 ulungana emvimba, kumosi ye sambu kina kalonga o Yesu kw’alongoki andi vo : “E kintinu kiaku kiza. O luzolo luaku luavangam’ova nza nze koko’zulu.”—Matai 6:10; Filipi 2:8-11

Mbandu ina Tufwete Tanginina

12, 13. (a) Nkia nluta mitwasanga e nsangu zambote za Kintinu o unu? (b) Adieyi tufwete zaya muna landa ntambi za Kristu?

¹² O unu, e nsangu zambote za Kintinu mu samunwa zina mu nsi zayingi, nze una kavova Yesu. (Matai 24:14) Muna kuma kiaki, ulolo wa wantu bekiyekolanga kwa Nzambi. Beyangalelanga o vwa e nsambu zina zitwasa Kintinu. Bena ye vuvu kia zinga yakwele mvu mu luvuvamu muna paradiso ova ntoto. Besamunanga mpe e vuvu kiau kw’akaka ye kiese kiawonso. (Nkunga 37:11; 2 Petelo 3:13) Nga u mosi muna ateleki awaya a Kintinu? Avo i wau, wafwana sanisinwa. Kansi, vena ye diambu diakaka kafwete fimpa konso muntu mu yeto.

¹³ Petelo wa ntumwa wasoneka vo: “Kristu wanumwen’e mpasi, wanusisil’e mbandu, nwalanda muna ntambi zandi.” (1 Petelo 2:21) Badika ediadi, Petelo kayika etima dia Yesu ko muna salu kia umbangi yovo ngangu zandi za longa, kansi mpasi zandi kayika. Wau vo wakala yo Yesu, Petelo watoma zaya luzolo kakala lwau o Yesu lwa tambulwila mona e mpasi muna sakalela kimfumu kia Yave yo songa vo Satana nkwa luvunu. Aweyi tulenda landila ntambi za Yesu? Tufwete kiyuvula: ‘Yamuna nkia tezo ntambulwilanga mon’empasi mu sadila yo tundidika kimfumu kia Yave? Nga nsonganga muna mavangu ye muna salu kia umbangi vo o sadila kimfumu kia Yave i diambu dilutidi o mfunu muna zingu kiame?’—Kolosai 3:17.

14, 15. (a) O Yesu adieyi kavanga vava katontwa? Ekuma? (b) Nkia diambu tufwete sungamenanga ntangwa zawonso? (Yika e mvovo mina muna tini kina yo ntu a diambu “Kala Kun’esambu dia Yave.”)

¹⁴ Lumbu yawonso, tuwanananga ye ntonta ye mambu makaka mana tufwete bakila nzengo. Adieyi tufwete sungamenanga? Kasikil’owu, vava tutontwanga mu vanga diambu dilenda sia kwikizi kieto mu vonza, aweyi tuvanganga? Vava Petelo kavovesa Yesu vo sabisabi e Mfumu, o Yesu adieyi kavanga? Wamvovesa vo: “Viluk’oku nim’ame, e Satana: se u sakuba kiame; kadi kuyindul’oma ma Nzambi ko, oma ma wantu kaka.” (Matai 16:21-23) Vava tuvewanga elau dia salu kifutanga nzimbu zayingi kansi kilenda sia kimwanda kieto mu vonza, nga tuvanganga nze una kavanga o Yesu? Vava Yesu kazaya vo awana bamona masivi kavanga, bazola ‘kumbakila kuna ngolo, bantumb’e kintinu,’ vana vau wakatuka vana bakala.—Yoane 6:15.

¹⁵ Ekuma o Yesu kabakila nzengo zazi? Kadi watoma wo zaya vo vena ye diambu diakaka dialuta o mfunu ke mu wete dia yandi kibeni ko. Yesu wazola vanga luzolo lwa S’andi yo yikama kimfumu kia Yave, kana nkutu nkia mpasi dilenda kuntwasila. (Matai 26:50-54) Muna kuma kiaki, kele vo ke tusungamene ko e diambu dia kimfumu kia Yave ntangwa zawonso, nze una Yesu kasungamenanga dio, tulenda baka nzengo zambi. Ekuma? E kuma kadi tulenda bwa muna umpukumuni wa Satana, ona okitulanga edi diambi se diambote nze una kavanga vava kavukumuna Eva.—2 Korinto 11:14; 1 Timoteo 2:14.

16. Nki’ekani tufwete kala diau vava tusadisanga akaka?

¹⁶ Muna salu kieto kia umbangi, tusiang’e ngolo za mokena yo wantu mana mekubatokanesanga yo kubasonga dina kevovanga Nkand’a Nzambi mu kuma kia mambu mama. Eyayi i mpil’ambote ya sikamesa luzolo lwau muna longoka Nkand’a Nzambi. Kansi, ekani dieto ke dia sadisa kaka wantu ko bazaya dina kelonganga o Nkand’a Nzambi yovo kubazayisa e nsambu zitwasa Kintinu kia Nzambi. Tufwete kubasadisa mu bakula e diambu dia kimfumu kia Yave. Nga bezola kituka Akristu akieleka yo nata ‘nti au ampasi’ yo tambulwila mon’e mpasi mu kuma kia Kintinu? (Maku 8:34) Nga beyikama muna buka ki’awana bena kun’esambu dia kimfumu kia Yave mu songa vo Satana nkwa luvunu ye nkumbi? (Ngana 27:11) Tuvwidi elau diampwena dia kuyisadisa yeto kibeni ye akaka mu yikama kimfumu kia Yave.—1 Timoteo 4:16.

Vava Nzambi Kekala “Wonso Muna Wonso”

17, 18. Avo tusongele kieleka vo ku sambu dia kimfumu kia Yave twina, nkia ntangw’a kiese tulenda vingila?

¹⁷ Wau tusiang’e ngolo mu songa muna mavangu ye muna salu kia umbangi vo ku sambu dia kimfumu kia Yave twina, tulenda vingila e ntangwa ina o Yesu Kristu “keyekol’e kintinu kwa Nzambi w’Ese.” Nkia ntangwa divangama? Paulu wa ntumwa wasoneka vo: “Vava kevwa tumbula kuluntu wawonso, ye wisa yawonso, ye nkuma. Yala keyala kaka, yavana kevwa vindakes’atantu awonso kunansi a malu mandi. . . . I bosi, o Mwana yandi kibeni, osakidikwa kwa ndiona wansakidikila lekwa yawonso, o Nzambi kakala wonso muna wonso.”—1 Korinto 15:24, 25, 28.

¹⁸ Vava Nzambi kekala “wonso muna wonso,” ntangw’a kiese kikilu ikala. E Kintinu kilungisa ekani kiasikidisilwa. Awonso besianga kimfumu kia Yave e kitantu befwaswa. Luvuvamu yo unsongi uvutulwiswa muna nsema wawonso. Nze una wavova ntozi a nkunga, e vangwa yawonso i yimbila vo: “Nuvanina Yave o nkembo a nkumbu andi . . . Nuvova muna zula vo, Yave oyalanga.”—Nkunga 96:8, 10.

[Mvovo mia Fwaniswa mina muna lukaya lwa 11]

KALA KUN’ESAMBU DIA YAVE

Nze una uzeye ampangi kuna Korea ye nsi zakaka, vava Akristu bekalanga mu mpasi, diambote basungamenanga e kuma bemwenanga e mpasi zazi.

Mbangi a Yave mosi wasiwa mu pelezo muna luyalu lwa União Soviética wavova vo: “Edi diatusadisa mu zizidila e mpasi, i toma bakula e diambu dia kimfumu kia Nzambi eki kiafidiswa mpaka muna mpatu a Edene. . . . Twazaya wo vo elau diampwena twakala diau mu yikama kimfumu kia Yave. . . . Ediadi diatuvana nkuma yo kutusadisa mu sikila ye kwikizi.”

Mbangi akaka wavova dina diabasadisa vava basadiswanga salu yampasi. Wavova vo: “Yave watusadisa. Kana una vo mu mpasi twakala, twasikila muna mwanda. Twakasakesanga muntu yo nkw’andi mu sungamena vo ku sambu dia Yave twina muna diambu dia kimfumu kiandi kia nza yawonso.”

[Mvovo mia Fwaniswa mina muna lukaya lwa 8]

O Yesu aweyi kayikamena kimfumu kia Yave vava katontwa kwa Satana?

[Mvovo mia Fwaniswa mina muna lukaya lwa 10]

O lufwa lwa Yesu nkia diambu lwalungisa?

Nga Olenda Vana e Mvutu?

• O Yesu aweyi kasila diambu dia kimfumu kia Nzambi va fulu kiantete?

• O Yesu nkia diambu diantete kalungisa muna uselo yo lufwa lwandi?

• Aweyi tulenda landila mbandu a Yesu yo songa vo ku sambu dia kimfumu kia Yave twina?