Ofinama Mpangi Zeto Diambote kwa Yeto

1-2. Nkia diambu disundidi o mfunu kuna kwa Yave? Adieyi kazolele vo twavanga?

E MPILA tukadilanga ye akaka i diambu disundidi o mfunu kuna kwa Yave. Yesu walonga vo tufwete zolanga akweto wauna tukuyizolelanga. (Mat. 22:37-39) Ediadi disongele vo tufwete vanganga o wete kwa wantu awonso, kana nkutu kwa awana bena vo ke besambilanga Yave ko. Vava tuvanganga diambu diadi, tutangininanga Nzambi eto ona “ovaikisanga e ntangw’andi vana vena wantu ambi yo wantu ambote yo nokesa e mvula vana vena wantu ansongi ye awana balembi songa.”—Mat. 5:45.

² Kana una vo Yave ozolanga wantu awonso, oluta zolanga awana bevanganga mambu mansongi. (Yoa. 14:21) Yave ozolele vo twantanginina. Muna kuma kiaki, okutukasakesanga ‘twatoma zolanga’ mpangi zeto yo ‘kubasonga walakazi.’ (1 Pet. 4:8; Roma 12:10) Avo tuyindwidi muntu ona tulenda songa o zola yo walakazi wa mpila yayi, nanga muntu antete tusungamena i yitu kieto ona tutoma zolanga yovo nkundi eto akola.

3. Nkia diambu tufwete sungamena mu kuma kia zola?

³ O zola kuna nze nti uvavanga vo watoma lungwa-lungwa muna kula. Paulu wa ntumwa wavana e longi kwa Akristu vo: “Yambula e nzolani eno a ungudi yakwamanana wokela.” (Ayib. 13:1) Yave ozolele vo twakwamanana wokesa o zola kweto kwa akaka. Mu longi diadi, tulongoka e kuma tufwete finamena mpangi zeto muna kimwanda ye una tufwete kwamanana wo vangila.

EKUMA TUFWETE FINAMENA MPANGI ZETO?

4. Aweyi tulenda kwamanana songela luyangalalu muna kintwadi kieto kia wan’a ngudi kiyikwanga muna Nkunga 133:1? (Tala mpe mafoto.)

⁴ Tanga Nkunga 133:1. Tukwikilanga muna mvovo mia ntozi a nkunga ona wasoneka vo ‘diawete’ ye ‘diakiese’ mu vanga kikundi ye awana besadilanga Yave. Kansi, vena ye vonza. Nze una muntu kalenda yambulwila sila e sungididi muna lekwa kiambote kina kemonanga e lumbu yawonso, yeto mpe avo ke tuyikebele ko, tulenda yambula sia e sungididi muna kintwadi kieto kia wan’a ngudi. Wau vo tukalanga kumosi ye mpangi zeto nkumbu miayingi muna konso lumingu, tulenda yambula songa luyangalalu muna kintwadi kieto kia wan’a ngudi. Aweyi tulenda kwamanana songela luyangalalu muna kintwadi kieto kia wan’a ngudi? O zola muna mpangi zeto kuwokela avo tuyindwidi una konso muntu kenena o mfunu kwa yeto ye kwa mpangi zeto muna nkutakani.

5. Adieyi dilenda vangama avo wantu bamwene o zola tusongaziananga?

⁵ Wantu ankaka ana belungananga mu nkumbu antete muna tukutakanu tweto, betoma sivikanga mu kuma kia zola tusonganga kwa muntu yo nkwandi. E diambu diadi dikubafilanga mu kwikila vo tu Akristu akieleka. Yesu wavova vo: “Muna wau i bezayila o wantu awonso vo nu alongoki ame—avo nzolani nuna yau.” (Yoa. 13:35) Badika e nona kia Chaithra wa mwan’a ndumba walongokanga e Bibila ye Mbangi za Yave. Watambulwila e mboka ya kwenda lungana muna lukutakanu lwa mvivu. Muna lumbu kiantete kayenda kuna lukutakanu lwa mvivu, wavovesa mpangi ona wanlonganga e Bibila vo: “Mase mame ke basidi kumbimbakana ko. Kansi, mu lumbu kiantete kaka kia lukutakanu lweno lwa mvivu, wantu 52 bambimbakene. Mbwene o zola kwa Yave kuna kwa ampangi ye nzolele kota muna kanda diadi.” Chaithra wakwamanana nungunuka yo vubwa muna mvu wa 2024. E nona kiaki kisongele vo, nkumbu miayingi, vava wantu bemonanga mavangu meto mambote yo zola tusonganga kwa muntu yo nkwandi, dikubakasakesanga mu yantika sadila Yave.—Mat. 5:16.

6. Ovanga kikundi kiakola ye mpangi zeto, aweyi dilenda kadila se lutaninu kwa yeto?

⁶ Ovanga kikundi kiakola ye mpangi zeto dilenda kala se lutaninu kwa yeto. Paulu wakasakesa Akristu vo: “Nukasakesanga muntu yo nkwandi e lumbu yawonso . . . kimana valembi kala yo muntu muna yeno obadiswa o ntima kwa nkum’a umpukumuni wa sumu.” (Ayib. 3:13) Ezak’e ntangwa, tulenda kendalala yo yantika vengomoka muna nzil’a Yave, kansi mpangi mosi olenda bakula e diambu diadi. I bosi, Yave olenda kunsadila muna kutuvana lusadisu luna tuvuidi o mfunu. (Nku. 73:2, 17, 23) Kieleka, o lusadisu lwalu yo lukasakeso tutambulanga mfunu kikilu lwina.

7. Aweyi o zola kukutusadisilanga mu kala mu kintwadi? (Kolosai 3:13, 14)

⁷ Oyeto tuna vana vena nkangu uvanganga e ngolo mu songa o zola kwa muntu yo nkwandi. Muna diadi, nsambu zayingi tutambulanga. (1 Yoa. 4:11) Muna bonga e nona, o zola kukutufilanga mu ‘vezana mambu’ muntu yo nkwandi. Ovanga ediadi disadisanga mu tatidila kintwadi kieto kia Kikristu. (Tanga Kolosai 3:13, 14; Efe. 4:2-6) Kieleka, o zola ye luvuvamu lukalanga muna tukutakanu tweto, ke luna muna yimvuka yankaka ko ova nza.

TUZITISANGA MUNTU YO NKWANDI

8. Aweyi o Yave kekutusadisilanga kimana twakala mu ungudi?

⁸ O ungudi ukalanga vana vena mpangi zeto mu nz’amvimba i sivi dia Yave. Kadi yeto awonso tu wantu alembi lunga. (1 Kor. 12:25) Bibila kivovanga vo ‘tulongwanga kwa Nzambi vo twazolananga.’ (1 Tes. 4:9) Ediadi disongele vo muna Diambu diandi, Yave okutuzayisanga dina tufwete vanga muna kala ye ngwizani ambote muntu yo nkwandi. Kansi, muna ‘longwa kwa Nzambi’ divavanga vo twatoma sianga e sungididi muna mana kevovanga yo sadila mo muna zingu kieto. (Ayib. 4:12; Yak. 1:25) Mbangi za Yave ngolo kikilu bevanganga muna sadila mana belongokanga.

9. Muna diambu dia zitisanga muntu yo nkwandi, adieyi tulongokele muna Roma 12:9-13?

⁹ Aweyi e Bibila kikutusadisilanga kimana twakala ye ngwizani ambote muntu yo nkwandi? Tala dina Paulu kavova muna Roma 12:9-13. (Tanga.) “Nuvitanga o ntu muna zitisa muntu yo nkwandi,” ediadi i mbuta diambu muna mvovo mia Paulu mu sono kiaki. Ediadi disongele vo tufwete vitanga o ntu muna ‘songaziana walakazi,’ loloka muntu yo nkwandi, kala ye fu kia zola nzenza, kayilanga akaka kuna mvevo ye mankaka mpe. (Efe. 4:32) Kufwete vingilanga ko vo mpangi kayantika muna vanga yaku kikundi. Ngeye mpe olenda ‘vita o ntu’ muna wo vanga. Ekiaki i kuma Yesu kavovela vo: “E diambu disundidi e kiese i vana, ke mu tambula ko.”—Mav. 20:35.

10. Aweyi tulenda kadila akwa fululu muna ‘zitisanga muntu yo nkwandi’? (Tala mpe foto.)

¹⁰ Vava Paulu katuvovesa vo twavitanga o ntu muna zitisa muntu yo nkwandi, wavova diaka vo: “Nukala akwa fululu, ke nukadi miolo ko.” O muntu okalanga ye fululu muna salu, nkwa vema. Avo oveno e salu, osalanga kio ye sungididi kiawonso. E sono kia Ngana 3:27, 28 kikutukasakesanga vo: “Kuyambula vanga mbote ko kw’awana bafwanukini yo avo una ye lendo kia sadisa.” Muna diadi, avo tubakwidi vo mpangi eto lusadisu kavuidi o mfunu, tufwete vanga diambu vana vau. Ke tukadi ye fu kia kimbazi-mbazi ko yovo yindula vo muntu ankaka okumvana lusadilu.—1 Yoa. 3:17, 18.

11. Nki kilenda kutusadisa mu finama muntu yo kwandi?

¹¹ E mpila yankaka tulenda songela vo tuzitisanga mpangi zeto i kubalolokanga vana vau vava bekutukendelekanga. E sono kia Efeso 4:26 kivovanga vo: “Ke nufungi makasi ko yakuna ndimuk’a ntangwa.” Ekuma? E tini kia 27 kivovanga vo ediadi dilenda ‘sisila Nkadi ampemba e nzila.’ Muna Diambu diandi, Yave okutukasakesanga nkumbu miayingi vo twalolokanga muntu yo nkwandi. E sono kia Kolosai 3:13 kikutukasakesanga vo twakwamanana “loloka muntu yo nkwandi kuna mvevo.” O vilakana ovilwa wa akaka i mpila yambote tulenda siamisina kikundi kieto yo yau. Vava tuvanganga wo tusadisanga mu “tatidila kintwadi kia mwanda muna kangwa kia ungudi.” (Efe. 4:3) Tulenda vova vo, o loloka i dimosi muna mambu mayingi mesiamisanga e kikundi vana vena nkangu a Yave.

12. Aweyi Yave kekutusadisilanga mu loloka akaka?

¹² Dialudi vo dilenda kala diampasi mu loloka muntu ona utulwekele o ntima. Kansi muna lusadisu lwa mwand’avelel’a Nzambi, tulenda kweto loloka. Vava e Bibila kivovanga vo ‘twasongaziananga walakazi,’ yo ‘kala akwa fululu,’ kikutukasakesanga mpe vo ‘twayambula mwand’avelela watusadisa twakala yo vema.’ Ediadi disongele vo mwand’avelel’a Nzambi ulenda wokesa o vema ye kiese kieto. (Roma 12:11) Ozevo, o mwand’avelel’a Nzambi ulenda kutusadisa mu songa zola ye walakazi kwa mpangi zeto yo kubaloloka ye nsi a ntima. Ekiaki i kuma tufwete dodokelanga Yave ye nsi a ntima yawonso kimana katusadisa mu yima e fu yayi.—Luka 11:13.

“KE VAKADI MPAMBULA KO VANA KATI KWENO”

13. Nkia diambu dilenda vambanesa e nkutakani?

¹³ Mu nkutakani a Yave muna ye “wantu a mpila zawonso” ye kisi nsi kiaswaswana. (1 Tim. 2:3, 4) Avo ke tukebele ko, e nswaswani yayi ilenda twasa mpambani muna mambu mevavuanga vo muntu yandi kibeni kabaka e nzengo, nze mpila yavuatila ye kuyikubika, mpila ya lunga-lungila e vimpi ye nsaka. (Roma 14:4; 1 Kor. 1:10) Wau vo Nzambi okutulonganga vo twazolananga, tufwete keba kimana twalembi komekenanga akaka vo mana tusolanga masundidi o mfunu ke mu mana besolanga ko.—Fili. 2:3.

14. Nkia diambu tufwete silanga e ngolo mu vanga? Ekuma?

¹⁴ Ovanganga e ngolo mu kumika yo kasakesa akaka ntangwa zawonso, dilenda mpe kakidila e fu kia sia e mpambula mu nkutakani. (1 Tes. 5:11) Mu mvu miaviokele, wantu ayingi ana bayoya muna kimwanda yovo awana bakatulwa mu nkutakani bavangidi e ngolo kimana bavutuka mu nkutakani. Oyeto tutoma kubatambulanga. (2 Kor. 2:8) Mpangi mosi ankento wayoya muna kimwanda mu mvu kumi, vava kayenda mu lukutakanu mu nkumbu antete, wavova vo: “Mpangi zawonso bankayisa ye kiese kiawonso.” (Mav. 3:19) Ediadi nkia nluta diatwasa kwa mpangi ndioyo? Wavova diaka vo: “Yamona vo Yave wansadisa mu vutukila e kiese kiame.” Vava tuvanganga e ngolo mu kasakesa akaka, Kristu olenda kutusadila muna kumika awana ‘befuntukanga yo bimuka yo mazitu.’—Mat. 11:28, 29.

15. Nkia mpila yankaka tulenda siamisina ungudi? (Tala mpe foto.)

¹⁵ E mpova zeto i mpila yankaka tulenda siamisina ungudi weto. E sono kia Yobi 12:11 kivovanga vo: “Nga ke kutu ko kutezanga mambu nze una lulaka luyelekelanga madia?” O nlambi ambote vitila kavana madia kwa akaka, entete oyelekanga mo muna zaya kana vo mambote yovo ve. Diau dimosi mpe yo yeto, vitila twavova diambu tufwete toma yindulanga. (Nku. 141:3) Ntangwa zawonso tufwete kalanga ye ziku vo konso diambu dina tuvova ‘ditwasa nluta kw’awana bewá dio,’ i sia vo, dilenda kubakumika yo kubakasakesa.—Efe. 4:29.

16. Aki nani bafwete toma kuyikebanga muna mvovo miau?

¹⁶ Musungula kwa mpangi zamakala ana basompa ye mase bafwete toma kebanga e mvovo miau kimana miakasakesanga esi nzo zau. (Kol. 3:19, 21; Tito 2:4) Akuluntu mpe bafwete kalanga se nto a lufiaulwisu ye lukasakeso ekolo bevungulanga e kambi dia Yave. (Yes. 32:1, 2; Ngal. 6:1) Ntangwa zawonso tuzolele sungamenanga dina divovanga Ngana 15:23: “Ekwe wete e diambu divovelo muna ntangw’ambote!”

TUSONGANGA O ZOLA “MUNA MAVANGU YE LUDI”

17. Aweyi tulenda songela o zola kwa mpangi zeto ye nsi a ntima?

¹⁷ Yoane wa ntumwa okutukasakesanga vo ‘twazolananga ke mu mvovo kaka ko ngatu muna lubini, kansi muna mavangu ye ludi.’ (1 Yoa. 3:18) Tuzolele vo twasonganga o zola kwa mpangi zeto zawonso ye nsi a ntima. Aweyi tulenda wo vangila? Avo tuvaudi e ntangwa kimana twakalanga yau vamosi, tutoma kubafinama, o zola kweto mpe muna muntu ye nkwandi kuwokela. Muna kuma kiaki, vavanga malau muna kala kumosi ye mpangi zaku muna tukutakanu ye muna salu kia umbangi. Vaulanga mpe ntangwa muna kubakingula. Avo tuvangidi wo tusonga vo ‘tulongwanga kwa Nzambi vo twazolananga.’ (1 Tes. 4:9) Muna mpila yayi, tukwamanana mona e ziku kia mvovo emi: “Ekwe wete, ekwe kiese kwa ampangi bakadilanga vamosi muna ungudi!”—Nku. 133:1.