LONGI DIA 21

Nki i Betele?

Mbangi za Yave zole besadilanga kuna departamento ya mafoto kuna Betele — Departamento ya mafoto, E.U.A.

Mbangi a Yave osadilanga masini ma nietekena nkanda kuna betele ya Alemanha — Alemanha

Mbangi a Yave osadilanga makina muna sukula mvuantu kuna Betele ya Quênia — Quênia

Mpangi otulanga madia vana meza kuna Betele dia Colombia — Colombia

Betele i mvovo wa Kiyibere una ye nsasa vo, “Nzo a Nzambi.” (Etuku 28:17, 19) O mvovo wau wafwanwa yikilwa e nzo zawonso besadilanga Mbangi za Yave mu nza yawonso mu fila yo nungununa e salu kia samuna nsangu zambote. E Buka kia Selo Yambuta besadilanga kun’evula diasina dina kuna mbanz’a Nova York, E.U.A.Yau mpe befilanga e salu kisalwanga muna mavula mawonso. Awana besadilanga muna mavula mama, beyikilwanga vo esi Betele. Bezinganga yo sala kumosi nze esi nzo, bedilanga vamosi yo longoka Nkand’a Nzambi kumosi.—Nkunga 133:1.

I fulu kina wantu besadilanga kuna mvevo. Konso Betele ina ye mpangi z’amakala ye zamakento ana bekuyivananga mu vanga luzolo lwa Nzambi yo yikama salu kia Kintinu ntangwa ke ntangwa. (Matai 6:33) Ke befutwanga nzimbu ko, kansi yau awonso bevewangwa masuku mambote, madia ye lusadisu lwakete muna lungisa e nsatu zau. Konso muntu kuna Betele, ovewanga e salu, kiakala muna biro, kuna kuku, yovo velelesa eseka dia dila. Akaka besadilanga kuna kunietekenwanga e nkanda, velelesa e nzo, sukula e mvuatu, lunga-lunga yo vangulula e lekwa ye salu yakaka mpe.

I fulu kiyikamenwanga e salu kia Kintinu. Ekani dia konso Betele i mwanganesa e ludi kia Nkand’a Nzambi kwa wantu awonso. E finkanda fiafi i ziku kia diambu diadi. Fiakubikwa muna lutumu lwa Selo Yambuta, ye fiatwikwa muna nzila internete kwa asekodi a nkanda mia Mbangi za Yave mu nza yawonso. Fianietekwa mu Betele zayingi zisadilanga masini menietekanga e nkanda mu nzaki zawonso yo twika fio muna vioka 110.000 ma nkutakani. Esi Betele bevanganga mayingi mu yikama e salu kiaki kiamfunu kia samuna e nsangu zambote.—Maku 13:10.

Aki nani besadilanga kuna Betele? Aweyi belungwa-lungilwanga?
Nkia salu kisalwanga mu nzaki muna konso Betele?