Yosiya Akundi Ambote Kakala Yau

Nga diampasi dikalanga kwa ngeye mu vanga owu wansongi?— Diampasi dikalanga kwa wantu ayingi. Nkand’a Nzambi ukutuzayisanga vo diampasi kikilu diakala kwa Yosiya mu vanga owu wansongi. Kansi, akundi ambote kakala yau ana bansadisa. Yambula twalongoka diaka mayingi mu kuma kia Yosiya ye akundi andi.

Yosiya mwan’a Amone wa ntinu a Yuda kakala. Amone muntu ambi kikilu kakala, teke kasambilanga. Vava se dia Yosiya kafwa, Yosiya wakituka se ntinu a Yuda. Kansi, mvu nana kaka kakala miau. Nga obenze vo yandi mpe muntu ambi kakala nze se diandi?— Ve, kakala muntu ambi ko.

Kana nkutu vava kakala nleke, Yosiya wazola lemvokela Yave. Muna kuma kiaki, wavanganga kaka kikundi y’awana bazolanga Yave. Akundi awaya Basadisa Yosiya mu vanga owu wansongi. Aki nani i akundi a Yosiya?

Mosi mun’akundi a Yosiya, i Sefaniya. Sefaniya ngunza kakala ona walukisanga nkangu a Yuda vo avo basambidi e teke, mfwilu bebaka. Yosiya walemvokela lulukisu lwa Sefaniya. Wasambilanga Yave vana fulu kia sambila teke.

Yeremiya i nkundi akaka a Yosiya. Kimbuta kimosi kakala yo Yosiya. Fulu kimosi mpe bazingilanga vava basansukanga. Wau vo akundi ambote kikilu bakala, vava Yosiya kafwa, Yeremiya wasoneka nkunga mu songa e viangi kamonanga mu kuma kia Yosiya. Yeremiya yo Yosiya basalaziananga mu vanga owu wansongi yo lemvokela Yave.

Adieyi olenda longoka muna lusansu lwa Yosiya?— Kana nkutu vava Yosiya kakala nleke, wazolanga vanga owu wansongi. Wazaya wo vo kafwete vanga kikundi y’awana bazolanga Yave. Ongeye mpe ofwete solanga akundi bezolanga Yave ana balenda kusadisa mu vanga owu wansongi.