Yosiya Watoma Zolanga Nsiku a Nzambi

Yosiya kimbuta kia mvu nana kakala vava kayantika yala muna Yuda. Muna lumbu yayina, o nkangu wayivananga muna mavangu ma mpandu yo sambila teke. Vava Yosiya kalungisa mvu 16, wayantika longoka e mpila yambote ya sambila Yave. Vava kalungisa mvu 20, wayantika fwasa teke ye maziku mawonso muna nsi. Vava kalungisa kimbuta kia mvu 26, wavanga nkubika kimana e tempelo a Yave yatungululwa.

Muna tempelo, Kilekiya wa ngang’ambuta wasolola nkand’a Nsiku a Yave, nanga nkanda wankulu wasonekwa kwa Mose. O Safani wa nsoneki a ntinu watwasa nkanda wau kwa Yosiya yo yantika tanga Nsiku muna ndinga yangolo. Ekolo Yosiya kawanga o nsiku watangwanga, wabakula vo nkangu ke walemvokelanga Yave ko se vioka mvu miayingi. Yosiya wa ntinu wavovesa Kilekiya vo: ‘Yave utufungidi makasi. Nuenda mokena yandi. Yave okutuzayisa dina tufwete vanga.’ Yave wabavana e mvutu muna nzil’a Kuleda wa ngunza ankento, oku vo: ‘O nkangu a Yuda wambembola. Tumba ikubatumba. Kansi, ke mu lumbu ya luyalu lwa Yosiya ko kadi nkwa lulembamu.’

Vava ntinu Yosiya kawá e nsangu zazi, wayenda kuna tempelo yo kutakesa nkangu a Yuda. I bosi, watanga Nsiku a Yave vana meso ma nkangu awonso. Yosiya yo nkangu basia nsilu wa lemvokela Yave ye nsi a ntima wawonso.

Mvu miayingi miavioka, o nkangu a Yuda ke wadianga lambu dia Nduta ko. Kansi, vava Yosiya katanga muna Nsiku vo nkinzi a Nduta ufwete vangamanga konso mvu, wavovesa nkangu vo: ‘Tudila Yave e lambu dia Nduta.’ I bosi, Yosiya wakubika tukau twayingi ye buka kia awana bayimbilanga muna tempelo. Muna mpila yayi, o nkangu wadia e lambu dia Nduta owu walandilwa kwa Nkinzi a Mbolo ke Zafuna ko wavanga lumbu nsambwadi. Ke vasidi vangwa lambu dia Nduta dia mpila yayi ko tuka muna lumbu ya Samuele. Kieleka, Yosiya watoma zolanga Nsiku a Nzambi. Ongeye, nga ozolanga longoka mambu ma Yave?