Estere Ovulwizi Nkangu Andi

Estere mwisi Yuda kakala, wazingilanga muna mbanza Susani, kuna Parasa. Vitila mvu miayingi, e yitu yandi yakatulwa muna Yerusaleme kwa ntinu Nebukandesa. Wasanswa kwa Modekai wa mwan’a ngudi andi ankazi. Modekai selo kia Akasurose wa ntinu a Parasa kakala.

O ntinu Akasurose nkento ankaka kavavanga. Selo yandi yantwasila akento ana basunda vienga muna nsi. Mosi muna yau i Estere. Muna akento awaya awonso, o ntinu wasola Estere kimana kakituka se ntinu ankento. Modekai wakanikina Estere kalembi vova vo mwisi Yuda.

Muntu mosi wakala ye nkumbu Amani, yandi wakala mfumu a akuluntu awonso. Nkwa lulendo kakala. Wazolanga vo wantu awonso bamvubamenanga. Wau vo Modekai kazola kumvubamena ko, Amani wafunga kikilu makasi yo vava kumvonda. Vava Amani kabakula vo Modekai mwisi Yuda, wabak’e nzengo za vonda Ayuda awonso muna nsi. Wavovesa ntinu vo: ‘Ayuda nkangu ambi, ofwete kubafukisa.’ Akasurose wavova vo: ‘Vanga mawonso ozolele.’ Wamvana e wisa kia sikidisa nsiku. Amani wasia nsiku vo nkangu wavonda Ayuda awonso muna lumbu kia 13 kia ngonde a Adare. Yave wamonanga mawonso.

Estere kazaya diambu ko mu kuma kia nsiku wau. Muna kuma kiaki, Modekai wantwikila kopi ya nsiku wau yo kumvovesa vo: ‘Wenda mokena yo ntinu.’ Estere wavova vo: ‘Konso ndiona okwenda kwa ntinu lembi bokelwa, vondwa kevondwa. Se lumbu 30 iviokele kala lembi bokelwa kwa ntinu. Kansi, kwenda ikwenda. Avo ntinu olambwidi e mvual’andi oku ngina, kivondwa ko.’

Estere wayenda vana yanzala kia ntinu. Vava o ntinu kamona Estere, walambula e mvual’andi. Vava Estere kayenda vana kakala, wanyuvula vo: ‘Adieyi ozolele e Estere?’ Wavutula vo: ‘Nzolele vo ngeye yo Amani nuiza kuna nkinzi inukubikidi.’ Vava bakala kuna nkinzi, Estere wababokelesa mu nkinzi wankaka. Muna nkinzi wanzole, o ntinu wayuvula diaka vo: ‘Adieyi ozolele yavanga?’ Estere wavova vo: ‘Muntu ozolele kumponda kumosi yo nkangu ame. Dodokolo, ututanina.’ O ntinu wayuvula vo: ‘Nani ozolele kunuvonda?’ Wavutula vo: ‘I kimpumbulu kia Amani.’ Akasurose wafunga kikilu makasi yo kanikina vo Amani kavondwa vana vau.

Kansi, ke vakala muntu ko olenda kulula nsiku a Amani, kana nkutu yandi kibeni o ntinu. Muna kuma kiaki, watumbika Modekai se mfumu a akuluntu awonso yo kumvana wisa kia sikidisa nsiku wampa. Modekai wasia nsiku una wavana Ayuda o nswa wa kuyitanina avo bezidi kubanuanisa. Muna lumbu kia 13 kia ngonde a Adare, Ayuda basunda e mbeni zau. Tuka wauna, Ayuda bakembelelanga e nsunda yayi konso mvu.