Sadila Kristu wa Ntinu ye Kwikizi Kiawonso
“Vavewa kwa yandi wisa yo nkembo ye kintinu, kinuman’e nkangu ye zula ye ndinga zawonso zansadila.”—DANIELE 7:14.
1, 2. Aweyi tuzayidi vo Kristu kayantika yala nz’amvimba ko muna mvu a 33 wa tandu kieto?
NKIA mfumu ona wavana moyo andi mu kuma kia wantu yo zinga diaka mu yala se ntinu? Nkia ntinu wazinga ova ntoto yo fila nkangu wambunda e vuvu yo song’e kwikizi muna yandi, i bosi kayala tuka kun’ezulu? Muntu mosi kaka wavanga mawonso mama ye makaka mpe, i Yesu Kristu. (Luka 1:32, 33) Kina kia Pentikosti ya mvu a 33 wa tandu kieto, yalandila lufwa ye lufuluku lwa Yesu ye ntombok’andi kun’ezulu, Nzambi ‘wansia se ntu a lekwa yawonso muna nkutakani.’ (Efeso 1:20-22; Mavangu 2:32-36) Muna tandu kiakina, Yesu wayantika o yala, kansi ke mu nza yawonso ko. O nkangu antete kayala i Akristu akuswa, beyikilwanga vo Isaele a mwanda, “Isaele a Nzambi.”—Ngalatia 6:16; Kolosai 1:13.
2 Vioka mvu 30 tuka Pentikosti ya mvu a 33 wa tandu kieto, Paulu wa ntumwa wasonga vo Kristu kavewa Kintinu kia nza yawonso vana vau ko, kansi wakala ‘kuna koko kwalunene kwa Nzambi; kuna kavingila, yavan’atantu andi besiwa se nsikinw’a tambi yandi.’ (Ayibere 10:12, 13) I bosi, kuna mbaninu a tandu kiantete, Yoane wa ntumwa ona wakala se nunu, wamona Yave wa Mfumu a nz’amvimba muna mona-meso, wayadika Yesu Kristu se Ntinu muna Kintinu kiampa ki’ezulu. (Lusengomono 11:15; 12:1-5) Lusansu lusonganga vo Kristu wayantika yala kun’ezulu se Masia wa Ntinu muna mvu wa 1914.a
3. (a) Nkia diambu diampa disamunwanga muna nsangu zambote za Kintinu tuka mvu a 1914? (b) Nkia yuvu tulenda kiyuvula?
3 Tuka mvu a 1914, diambu diampa disamunwanga muna nsangu zambote za Kintinu. Kristu oyalanga se Ntinu muna Kintinu ki’ezulu kia Nzambi ‘vana kati kwa mbeni zandi.’ (Nkunga 110:1, 2; Matai 24:14; Lusengomono 12:7-12) Vana ntandu, o nkangu andi akwikizi ova ntoto, besakalelanga e wisa kiandi muna yikamanga muna salu kia longa Nkand’a Nzambi kwa wantu omu nza yawonso, vioka tandu yakaka muna lusansu lwa wantu. (Daniele 7:13, 14; Matai 28:18) Akristu akuswa muna mwanda ana beyikilwanga vo “wan’a kintinu,” besalanga nze “nkunzi mia Kristu.” Besadiswanga kwa ulolo wa “mameme makaka,” ana besalanga nze ntumwa za Kintinu kia Nzambi. (Matai 13:38; 2 Korinto 5:20; Yoane 10:16) Kana una vo i wau, konso muntu mu yeto ofwete kuyifimpa kana vo osakalelanga e wisa kia Kristu. Nga tusonganga e kwikizi muna yandi? Aweyi tulenda songela e kwikizi kieto kwa Ntinu ona oyalanga tuka kun’ezulu? Entete, yambula twazaya e kuma tufwete songela kwikizi muna Kristu.
Ntinu ona Otuntanga o Nkangu mu Kala ye Kwikizi
4. O Yesu wa Ntinu Wasolwa kwa Nzambi nkia mambu kavanga vava kakala ova ntoto?
4 E kwikizi kieto muna Kristu kitukanga muna luyangalalu lweto lwa mana kavanga ye fu yandi eyi isundidi. (1 Petelo 1:8) Vava Yesu ona Wasolwa se Ntinu kakala ova ntoto, wasonga mana kevanga vava keyala se Ntinu a nza yawonso muna ntangwa yasikidiswa kwa Nzambi. Wadikila akwa nzala. Wawuka ambevo, mpofo, avanguki, afwa matu ye mababa. Wafula nkutu mafwa. (Matai 15:30, 31; Luka 7:11-16; Yoane 6:5-13) Vana ntandu, o zayi wa zingu kia Yesu ova ntoto, ukutusadisa mu zaya e fu kesonga vava keyala se Mfumu a nza, musungula e nzol’andi amvevo. (Maku 1:40-45) Muna kuma kiaki, Napoleão Bonaparte wavova vo: “Alexandre, Kaisa, Carlos Magno yo mono kibeni, yintinu yanene twayala. Kansi, aweyi twayadilanga yintinu yayi? Mu ngolo. Yesu Kristu kaka wasikidisa kintinu kiandi muna zola, yamu unu kiaki mazunda ye mazunda ma wantu befwanga mu kuma kiandi.”
5. Nkia kuma e fu ya Yesu yatuntilanga akaka?
5 Wau vo Yesu nlembami ye nkwa ntim’anleka, awana bafuntukanga yo bimuka yo mazitu, bavuvikwanga muna malongi mandi ma lukasakeso ye kiwuntu kiandi kiambote. (Matai 11:28-30) Kana nkutu yingyana-ngyana bayangalala kwiza kwa yandi. Alembami ye akwa umbakuzi bakitukanga s’alongoki andi. (Matai 4:18-22; Maku 10:13-16) E fu yandi yambote yatunta akento ana bavuminanga Nzambi mu songa kwikizi muna yandi. Ndonga mu yau basadila ntangwa, ngolo ye mavwa mau mu kunsadisa ekolo kasalanga e salu kiandi kia umbangi.—Luka 8:1-3.
6. O Yesu nkia fu kasonga vava Lazaro kafwa?
6 Yesu wasonga walakazi wandi vava Lazaro wa nkundi andi kafwa. Vava kamona Maria yo Mareta badilanga, Yesu wakendalala yo ‘dila.’ O ‘moyo andi watelama’ mu kuma kia ntantu, nana kazaya vo ke kolo ko ovutula Lazaro o moyo. I bosi, muna kuma kia zola ye nkenda, wasadila e wisa kavewa kwa Nzambi mu fula Lazaro muna mafwa.—Yoane 11:11-15, 33-35, 38-44.
7. Ekuma tufwete songela kwikizi kieto muna Yesu? (Tala muna lukaya lwa 31.)
7 Tumonanga e nzola kasonga o Yesu mun’oma mansongi ye mbenga kamenga umpuki y’oma mambi. Nkumbu miole, Yesu wasonga unkabu vava kayinga minkiti mia akw’eloko ana batekanga muna tempelo. (Matai 21:12, 13; Yoane 2:14-17) Vana ntandu, vava kakala ova ntoto, Yesu wamona mpasi zayingi. Ediadi diansadisa mu zaya lubangamu ye mpasi zina tumonanga. (Ayibere 5:7-9) Yesu wamengwa mpe yo vangwa e mpasi zakondwa kuma. (Yoane 5:15-18; 11:53, 54; 18:38–19:16) Kuna mfoko, wayivana kuna unkabu wawonso mu fwa lufwa lwansoki, kimana kalungisa luzolo lwa S’andi yo vana moyo a mvu ya mvu kw’awana bekunsakalelanga. (Yoane 3:16) Nga fu yayi keyikufilanga ko mu kunsadila ye kwikizi kiawonso? (Ayibere 13:8; Lusengomono 5:6-10) Kansi, adieyi divavwanga mu kala muna luyalu lwa Kristu wa Ntinu?
Edi Divavwanga Muna Vwila Kintinu kia Kristu
8. Adieyi divavwanga mu vwila Kintinu kia Kristu?
8 Badika e nona eki: Muna kituka se mwisi nsi yakaka, divavanga vo walungisa mana melombwanga. Ndiona ozolele kala mwisi nsi yakaka kafwete kala ye fu yambote yo lemvokela mambu ma vimpi. Diau adimosi, awana bazolele kala muna luyalu lwa Kristu bafwete kala ye fu yambote yo vimpi wambote wa mwanda.—1 Korinto 6:9-11; Ngalatia 5:19-23.
9. Aweyi tulenda songela kwikizi muna Kristu?
9 Yesu Kristu ovavanga vo awana bazolele kala muna luyalu lwandi basonga kwikizi muna yandi ye Kintinu kiandi. Besonganga kwikizi kiaki muna zingilanga ngwizani ye mana kalonga vava kakala ova ntoto nze Ntinu Asolwa. Kasikil’owu, bafwete sianga e Kintinu yo luzolo lwa Nzambi va fulu kiantete, ke mu mavwa ko. (Matai 6:31-34) Bafwete tanginina kiwuntu kia Kristu, kana nkutu mu ntangw’a mpasi. (1 Petelo 2:21-23) Vana ntandu, awana bazolele kala muna luyalu lwa Kristu bafwete landa e mbandu andi muna vanganga owu wambote kw’akaka.—Matai 7:12; Yoane 13:3-17.
10. E kwikizi muna Kristu aweyi kilenda songelwa muna (a) nzo ye (b) muna nkutakani?
10 Alandi a Yesu besonganga mpe kwikizi muna yandi muna tangininanga e fu ya Yesu muna nzo zau. Kasikil’owu, akala besonganga e kwikizi muna Ntinu au ezulu muna tangininanga e fu ya Kristu mu mpila bekadilanga y’akazi au yo wana. (Efeso 5:25, 28-30; 6:4; 1 Petelo 3:7) Akento besonganga e kwikizi muna Kristu muna nkal’au ambote yo songanga “ntim’anleka yo lembama.” (1 Petelo 3:1-4; Efeso 5:22-24) O wana besonganga kwikizi muna Kristu vava belandanga e mbandu andi ya lemvoka. Vava kakala nleke, Yesu wasakalelanga mase mandi, kana una vo wantu alembi lunga. (Luka 2:51, 52; Efeso 6:1) Awana bazolele kala muna luyalu lwa Kristu bafwete sia ngolo za kuntanginina muna kalanga “akwa ngyambani muna mpasi yo wete, ye nzolani a ungudi” yo “walakazi.” Bafwete siang’e ngolo za kala nze Kristu, akwa ‘lusakalalu lua ntima, lembi vutula mbi muna mbi, ngatu malevo muna malevo.’—1 Petelo 3:8, 9; 1 Korinto 11:1.
O Nkangu a Kristu Ufwete Kulemvokela
11. Nkia nsiku bafwete sakalela awana bazolele yalwa kwa Kristu?
11 Waun’o muntu ozolele zingila mu nsi akaka ke lemvokelanga nsiku mia nsi yayina, awana bazolele yalwa kwa Kristu bafwete sakalela “o nsiku a Kristu” muna sianga zingu yau betela ye mana kalonga Yesu yo kanikina. (Ngalatia 6:2) Bafwete zingila e ngwizani yo “nsiku akintinu” wa zola. (Yakobo 2:8) Adieyi divavwanga muna zingila e ngwizani ye nsiku miami?
12, 13. Aweyi tulemvokelanga “o nsiku a Kristu”?
12 Awana bevavanga yalwa kwa Kristu wantu alembi lunga, vilwa bevanganga. (Roma 3:23) Muna kuma kiaki, bafwete kwamanana kala ye “nzolani a ungudi yakondwa kuvùnina” kimana ‘bazolana kikilu ye nsi a ntima.’ (1 Petelo 1:22) “Ovo muntu obakidi nkw’andi diambu,” Akristu belemvokelanga nsiku a Kristu muna ‘vezananga mambu yo yambuziana.’ O lemvokela nsiku wau dikubasadisa mu kwamanana yambulwila usumuki wa mpangi zau yo kala ye kuma kia zola muntu yo nkw’andi. Nga kuyangalelanga kala vamosi ko y’awana besakalelanga Ntinu eto anzodi muna vwat’o zola kwina vo i “kangwa kia zikuka.”?—Kolosai 3:13, 14.
13 Vana ntandu, Yesu wavova vo, o zola kasonga kulutidi o zola kuna o wantu besonganga kwa muntu yo nkw’andi. (Yoane 13:34, 35) Avo tuzolele kaka awana bekutuzolanga, ‘ke tuvanga diambu ko.’ Muna mpila yayi, o zola kweto ke kukala kwalunga ko. O Yesu wavova vo twatanginina o zola kwa S’andi muna songanga e nzola kana nkutu kw’atantu ana bekutumenganga yo kutubangika. (Matai 5:46-48) O zola kufilanga mpe awana beyalwa kwa Kintinu mu zizila ye kwikizi kiawonso muna salu kisundidi o mfunu kina besalanga. Nkia salu kiaki?
E Kwikizi ki’Akristu Kitontwa
14. Ekuma e salu kia samun’e nsangu zambote kinina kiamfunu?
14 O nkangu a Kintinu kia Nzambi bena ye salu kia ‘sila Kintinu kia Nzambi umbangi.’ (Mavangu 28:23) O sala kio diamfunu kikilu kadi e Kintinu kia Masia kitundidika kimfumu kia Yave kia nz’amvimba. (1 Korinto 15:24-28) Vava tusamunanga e nsangu zambote, tuvananga ana bekutuwanga elau dia yalwa kwa Kintinu kia Nzambi. Vana ntandu, o Kristu wa Ntinu ofundisa wantu muna mpila bebadikilanga e nsangu tusamunanga. (Matai 24:14; 2 Tesalonika 1:6-10) Muna kuma kiaki, e mpila yisundidi, tusongelanga kwikizi kieto muna Kristu i lemvokela o nkanikinu andi wa zayisa kw’akaka oma ma Kintinu.—Matai 28:18-20.
15. Ekuma e kwikizi kia Akristu kitontelwanga?
15 Elo, o Satana ovanganga wawonso mu sima e salu kia umbangi, ayadi mpe ke betambulwilanga ko e wisa kina o Kristu kavewa kwa Nzambi. (Nkunga 2:1-3, 6-8) Muna kuma kiaki, Yesu wazayisa alongoki andi vo: “O ntaudi kasundidi mfumu andi ko. Ovo bambangika, oyeno mpe bekunubangika.” (Yoane 15:20) I dianu vo, alandi a Kristu vita ya mwanda benwananga, ina itontanga e kwikizi kiau.—2 Korinto 10:3-5; Efeso 6:10-12.
16. Awana beyalwa kwa Kintinu kia Nzambi aweyi bevaninanga “kwa Nzambi ina ya Nzambi”?
16 Kana una vo i wau, awana bazolele yalwa kwa Kintinu kia Nzambi bekwamanananga songa e kwikizi muna Ntinu au olembi monekanga yo lembi kolamena ayadi a nza. (Tito 3:1, 2) Yesu wavova vo: “Nuvana kwa Kaisa ina ya Kaisa, kuna kwa Nzambi ina ya Nzambi.” (Maku 12:13-17) Muna kuma kiaki, awana beyalwa kwa Kristu belemvokelanga e nsiku mia luyalu mina ke mikululanga nsiku mia Nzambi ko. (Roma 13:1-7) Kansi, vava afundisi Ayuda bakulula nsiku a Nzambi mu kanikina alongoki a Yesu vo ke basamuni diaka nsangu zambote ko, alongoki kuna unkabu wawonso yo zitu bavova vo bafwete ‘lemvokela Nzambi nze nyadi ke mu wantu ko.’—Mavangu 1:8; 5:27-32.
17. Ekuma tulenda zizidila yo unkabu vava kwikizi kieto kitontwanga?
17 Elo, unkabu uvavwanga kw’awana beyalwa kwa Kristu mu kwamanana songa kwikizi muna Ntinu au vava bebangikwanga. Kansi, Yesu wavova vo: “Nu akwa nsambu, ovo wantu bekunutumba, yo kunubangika, yo kunuyikila bi wawonso kuna luvunu, muna kuma kiame. Nukemba, nwayangalala kikilu: kadi nsendo eno unene kun’ezulu.” (Matai 5:11, 12) Alandi antete a Kristu bamona e ziku kia mvovo miami. Kana nkutu vava bawandwa mu kuma kia samun’e nsangu zambote za Kintinu, bayangalalanga ‘wau vo bafwanesw’o tiakidilwa muna nkumbu a Yesu. E lumbu yawonso, muna tempelo yo muna nzo, ke bayambula longa ko, yo samun’e nsangu zambote za Yesu, vo i Kristu.’ (Mavangu 5:41, 42) Yeno mpe, nwafwana sanisinwa ekolo nusonganga e kwikizi muna ntangw’a mpasi, mayela ye kitantu.—Roma 5:3-5; Ayibere 13:6.
18. E mvovo mia Yesu kwa Pontio Pilatu adieyi misonganga?
18 Vava kakala ova ntoto nze Ntinu Asolwa, Yesu wavova kwa Pontio Pilatu wa Mfumu a Roma vo: “E kintinu kiame ke kia nza yayi ko. E kintinu kiame, kala vo kia nza yayi, o makesa mame nga nwana madi nwana, kiayekolwa kwa Ayuda. Kansi owau, e kintinu kiame ke kia kwaku ko.” (Yoane 18:36) Muna kuma kiaki, awana beyalwa kwa Kintinu ki’ezulu ke balendi simba nkele ko mu vonda muntu ngatu kuyisia mu ntatani za wantu. Muna songa kwikizi muna “Nkuluntu a Luvuvamu,” ke bekuyisianga mu mambu ma mbumba za nza ko.—Yesaya 2:2-4; 9:6, 7.
Akwa Kwikizi Bevwa Nsambu Zakwele mvu
19. Awana beyalwa kwa Kristu nkia kuma bafwete kadila ye vuvu kiasikila kia kusentu?
19 Ana besonganga kwikizi muna “Ntinu a ntinu,” bena ye vuvu kiasikila kia kusentu. Besinga mona una kesongela o nkum’andi a kintinu ova ntoto. (Lusengomono 19:11–20:3; Matai 24:30) E nsadiswa ya “wan’a kintinu” bakuswa muna mwanda, bena ye vuvu kia bak’evwa diau diantalu dia kala atinu kumosi yo Yesu kun’ezulu. (Matai 13:38; Luka 12:32) E “mameme makaka” ma Kristu bevingilanga ye kiese kiawonso vava o Ntinu au kevova vo: “Nwiza, yeno nwasambulwa kw’Es’ame, nwavwil’e [zingu kia Paradiso muna] kintinu, kina kianukubamena tuka kun’esemo dia nza.” (Yoane 10:16; Matai 25:34) Muna kuma kiaki, awonso bazolele yalwa kwa Kintinu kia Nzambi, bafwete baka e nzengo za kwamanana sadila Kristu wa Ntinu ye kwikizi kiawonso.
[Mvovo Vana Yand’a lukaya]
a Tala muna nkanda Raciocínios à Base das Escrituras, “Por que afirmam as Testemunhas de Jeová que o Reino de Deus foi estabelecido em 1914?” lukaya lwa 110-112, wavaikiswa kwa Mbangi za Yave.
Nga Olenda Sasila?
• Ekuma tufwete songela kwikizi muna Kristu?
• Awana beyalwa kwa Kristu aweyi besongelanga kwikizi muna yandi?
• Ekuma tuzolele songela kwikizi muna Kristu wa Ntinu?
[Mvovo mia Fwaniswa mina muna lukaya lwa 31]
E FU YA KRISTU EYI ISUNDIDI
[Mvovo mia Fwaniswa mina muna lukaya lwa 31]
Lembi sia mpambula—Yoane 4:7-30.
Nkenda—Matai 9:35-38; 12:18-21; Maku 6:30-34.
Nzol’amvevo—Yoane 13:1; 15:12-15.
Kwikizi—Matai 4:1-11; 28:20; Maku 11:15-18.
Ngemba—Maku 7:32-35; Luka 7:11-15; Ayibere 4:15, 16.
Ntim’anleka—Matai 15:21-28.
[Mvovo mia Fwaniswa mina muna lukaya lwa 29]
Tulemvokela “o nsiku a Kristu” ye kwikizi kiawonso muna songanga zola kwa muntu yo nkw’andi
[Mvovo mia Fwaniswa mina muna lukaya lwa 31]
Nga fu ya Kristu ikutuntanga mu kunsadila ye kwikizi kiawonso?