“Yamengwanga kwa wantu ayingi”

ZINGU KIAME:

Kuna mbaza Santiago, Chile, yasansukila, wantu bakivananga muna lekwa ya nkolwa, vanga buka ya yimpumbulu yo mavangu ma nsoki mawokelanga. Vava yakala ye mvu tanu, se diame wavondwa. I bosi, o ngudi ame wasompana yo yakala dimosi wakala ye mavangu mansoki. Nkumbu miayingi katuwandanga. E diadi diamfila mu kituka se nkwa nsoki.

Vava yanungunukanga, yayantika kuyivana muna mavangu mansoki yo kituka se mbangiki. Yayantika wá nkunga miambi (heavy-metal), kolwa malavu ye nua fomo zangolo. Nkumbu miayingi yanwananga ye awana batekanga fomo za ngolo ana bavavanga kumponda. Lumbu kimosi, buka kiakaka kia yimpumbulu bafuta nzimbu kwa kimpumbulu kimosi kimana kamponda. Kana una vo wandweka, kansi yalenda tina. Lumbu kiakaka, e buka kia yimpumbulu kiatekanga e fomo za ngolo bankanga nsinga va laka muna kumponda.

Muna mvu wa 1996 yazola nkento mosi una ye nkumbu a Carolina. Twakazala muna mvu wa 1998. Vava mwan’eto antete kawutuka, yawokesa mavangu mame mansoki yo bangika esi nzo ame nze una se diame diansasi kavanganga. Yayenda kuna lupitalu muna vava lusadisu. Yabaka nlongo ye mpila zayingi za lusadisu, kansi ke vasoba diambu ko. Yakwamanana funga makasi kana nkutu mu diambu diakete, kiakalanga diaka ye volo ko. Yavava kuyivonda muna lembi mwesa diaka esi nzo ame e mpasi, kansi kialenda wo vanga ko.

Kana una vo kiakwikilanga mu Nzambi ko, kansi yakala yo luzolo lwa zaya Nzambi. Muna kuma kiaki, yayikotesa mu dibundu dimosi. Muna kolo kiakina, o nkaz’ame wayantika longoka Nkand’a Nzambi ye Mbangi za Yave. Wau vo yamenganga kikilu e Mbangi za Yave, nkumbu miayingi yabatiangunanga. Kansi, ke bamvutulanga mbi ko.

Lumbu kimosi, Carolina wandomba vo yatanga e sono kia Nkunga 83:18 muna Nkand’ame a Nzambi. E sono ­kiaki kitoma kiesesanga vo Yave i nkumbu a Nzambi. Yasivika kikilu wau vo muna dibundu diame kialongoka nkumbu a Yave ko, kansi nzambi kaka. Muna mvu wa 2000, mono mpe yayantika longoka Nkand’a Nzambi ye Mbangi za Yave.

UNA NKAND’A NZAMBI WASOBELA ZINGU KIAME:

Ekolo yanungunukanga muna mwanda, yafiaulwiswa mu zaya vo Yave, Nzambi a nkenda ye nloloki. Muna bonga e nona, muna Luvaiku 34:6, 7, Nkand’a Nzambi uyikilanga Yave vo “Nzambi a nkenda ye nsambu, nkwa ntim’evundu, o mwingi muna walakazi ye ziku; olundilanga mazund’o walakazi, oyambulwilanga bi y’ekuzuka y’esumu.”

Kana una vo i wau, diampasi diakala mu sadila mana yalongokanga. Yakala ye ziku vo mavangu mame mansoki kilenda mo sunda ko. Konso ntangwa yabwanga muna mavangu mama, kuna zola kwawonso Carolina wankasakesanga. Wansugamesanga vo Yave wamonanga e ngolo yavanganga. O lusadisu lwandi lwankumika mu kwamanana vanga luzolo lwa Yave kana nkutu vava yamonanga vo kilenda diaka soba ko.

Lumbu kimosi, Alejandro wa Mbangi a Yave ona wandonganga, wandomba vo yatanga sono kia Ngalatia 5:22, 23. E sono kiaki kivovanga vo e mbongo a mwand’avelela a Nzambi i ‘zola, kiese, luvuvamu, nlandu a lutantu, walakazi, unsongi, kwikizi, lembama, volo.’ Alejandro wavova vo kilendi yima fu yayi muna ngolo za mono kibeni ko, kansi muna lusadisu lwa mwand’avelela a Nzambi kaka. E ludi kiaki kiasoba emvimba e ngindu zame.

I bosi, yayenda kuna lukutakanu lwa mvivu lwa Mbangi za Yave. E kadilu kia wantu, velela ye ngwizani ambote ina wantu bakala yau, mawonso mama mankwikidisa vo yasolola e nsambil’aludi. (Yoane 13:34, 35) Yavubwa muna ngonde ya Fevelelo, 2001.

MPILA YABAKILA E NLUTA:

Nkwa nsoki yakala, kansi Yave wankitula se nkwa luvuvamu. Yamona vo Yave wankatula muna ntambu yakala. Wantu ayingi bambenganga, kansi kikubatumbanga ko. Ngina ye kiese kia sadila Yave kuna luvuvamu kumosi yo nkaz’ame yo wan’eto wole.

E yitu ye awana bakala akundi ame, besivikanga e mpila yasobela. Muna kuma kiaki, ayingi muna yau besonganga luzolo lwa longoka e ludi kia Nkand’a Nzambi. Ngina mpe ye lau dia sadisa wantu ayingi mu zaya Yave. Ekwe kiese mu mona una e ludi kia Nkand’a Nzambi kisobelanga e zingu kia wantu awaya!