UNA OLENDA YAMBULWILA E FU KIA MENGA AKAKA

4 | Muna Lusadisu Lwa Nzambi Olenda Yambula E Fu Kia Menga Akaka

Bibila kivovanga vo:

“E mbongo a mwanda i zola, kiese, luvuvamu, luzindalalu, walakazi, wete, lukwikilu, lulembamu, volo.”—NGALATIA 5:22, 23.

E sono kiaki aweyi kisongele?

Nzambi olenda sadisa o muntu kayambula e fu kia menga akwandi. O mwand’avelela Nzambi ulenda yima fu omu yeto ina ke tulenda yima ko muna ngolo za yeto kibeni. Muna kuma kiaki, vana fulu kia vava sunda e fu kia menga akaka muna ngolo za yeto kibeni, diambote twabundanga e vuvu muna lusadisu lwa Nzambi. Avo tuvangidi wo, tumona una Paulu wa ntumwa kamona, oyandi wavova vo: “Muna mambu mawonso ngina ye nkuma muna ndiona okunkumikanga.” (Filipi 4:13) Ye tuvova mpe vo: “O lusadisu lwame kwa Yave lutuka.”—Nkunga 121:2.

Aweyi e sono kiaki kilenda kusadisila?

“O Yave wansoba, nkwa mavangu mansoki yakala owau yakituka se nkwa luvuvamu.”—WALDO

Samba kwa Yave, umlomba mwand’andi avelela. (Luka 11:13) Umlomba mpe kasadisa kimana wasonga e fu yandi muna zingu kiaku. Longoka e fu iyikwanga muna Bibila eyi ilenda kusadisa mu sunda e fu kia menga akaka, e fu nze: zola, luvuvamu, luzindalalu ye volo. Vanga e ngolo za yima yo songa e fu yayi muna zingu kiaku. Vanga kikundi yo wantu bevanganga e ngolo za songa e fu yayi. O wantu awaya balenda kusadisa “wasikamesa o zola ye mavangu mambote.”—Ayibere 10:24.

Lusansu lwa—WALDO

Wayambula e Fu kia Menga Akaka yo Nsoki

Waldo zingu kiampasi kakala kiau vava kakolanga, ediadi diamfila mu yima e fu kia menga akaka. Wavova vo: “Nkumbu miayingi yanuananga ye awana bavanganga kinkita kia droga . . . Lumbu kimosi, buka kimosi ke kiatuzolanga ko kiafuta e nzimbu kwa muntu walongoka e salu kia vonda kimana kamponda. Kansi yalenda tina, nkumbu mosi kaka kandweka muna mbele.”

O Waldo kayangalala ko vava nkento andi kayantika longoka e Bibila ye Mbangi za Yave. Wavova vo: “Kiazolanga Mbangi za Yave ko, nkumbu miayingi yabavoveselanga mu mpila yambi. Kansi oyau ntangwa zawonso bamvutulwilanga kuna ngemba.”

Kuna kwalanda, Waldo wayantika longoka e Bibila. Wavova vo: “Ke diakala diasazu ko mu sadila mana yalongokanga. Yabanzanga vo kilenda yambula ko e fu kia funga makasi yo mavangu mansoki.” Kansi vena ye diambu kalongoka muna Bibila dina diatoma kunsadisa.

Waldo wavova vo: “Lumbu kimosi, o Alejandro wa nlongi ame a Bibila wandomba yatanga e sono kia Ngalatia 5:22, 23. . . . I bosi wasasila vo e fu yayi kilendi yo vuila mu ngolo za mono kibeni ko, kansi muna lusadisu lwa mwand’avelela Nzambi kaka. Vava yalongoka vo Nzambi okunsadisa, yabakula vo ndenda kwame sunda e fu yayina yambi.”

Waldo wasunda e fu kia menga akaka, kadi wayambula vo Nzambi kansadisa. Wavova vo: “E yitu ye akundi ame ke bekwikilanga ko vava bemonanga e nsobani yavanga.” Wakudikila mpe vo: “O Yave wansoba, nkwa mavangu mansoki yakala owau yakituka se nkwa luvuvamu.”