Nkia Ntangwa Kintinu kia Nzambi Kiayantika Yala?​—Kunku kia 2

LUFIMPU LWA NDOZI YA NEBUKANDESA

Malungu: E João, ngiangalele muna kumona diaka. E longi dieto dia Bibila kiese kiayingi dikumpananga.a Aweyi kaka, watoma leka?

João: Ingeta, ntomene leka.

Malungu: Ngiangalele mu zaya vo una kiambote. E nkumbu ansuka yayiza kukingula, twalongoka e kuma Mbangi za Yave bevovelanga vo Kintinu kia Nzambi mu mvu wa 1914 kiayantika yala.b Twafimpa ungunza una muna kapu kia 4 kia nkand’a Daniele mu mona e ziku kia diambu diadi. Nga osungamene mambu masonama mu kapu kiaki?

João: Ingeta, ndozi ya Ntinu Nebukandesa mu kuma kia nti wanene kivovelanga.

Malungu: I diau kikilu, muna ndozi yayi Nebukandesa wamona nti wanene walwakanga yakuna zulu. Wawá mpe vava mbasi a Nzambi kakanikina vo nti wazengwa, kansi e sinza kia mianzi miandi kiasiswa. Vioka “kolo nsambwadi,” o nti wau wadi savuka diaka.c Twalongoka mpe vo ungunza wau ndungana zole wadi lungana. Nga osungamene e ndungana antete?

João: E nkumbu antete, ungunza wau walunganena muna Nebukandesa. Nebukandesa wazengomoka mu mvu nsambwadi.

Malungu: I wau kikilu. Vava Nebukandesa kazengomoka, luyalu lwandi lwavunzaneswa. Kansi muna ndungana yazole ya ungunza wau, luyalu lwa Nzambi lwadi vunzaneswa mu kolo nsambwadi. Nze una twalongoka, ekolo kiaki kiayantika vava e mbanza Yerusaleme yafwaswa muna mvu wa 607 V.T.K. Tuka ntangwa yayina, ke vakala diaka atinu a wantu ko ova ntoto ana basunzulanga Yave wa Nzambi muna yala nkangu andi. Vava kiadi fokoka ekolo kiaki, Nzambi wadi sola Ntinu ampa kuna zulu mu yala nkangu andi. Ozevo, e mfoko a kolo nsambwadi kiadi kala se lubantiku lwa Kintinu kia Nzambi kuna zulu. Ozevo, twamona e ntangwa kiayantika e kolo nsambwadi. Avo tubakwidi o lutangu lwa mvu mia kolo kiaki, dikutusadisa mu zaya nkia ntangwa Kintinu kia Nzambi kiayantika yala. Nga obakwidi mawonso mpovele?

João: Ingeta, unsungamese kikilu mawonso twamokena.

Malungu: Ntondele. Owau tuzaya mvu nkwa e kolo nsambwadi kiazingila. Yateza fimpulula ntu wa diambu wau kimana yasimbinina mambu masina. Yambula yateza sasila mana ndongokele.

João: Ke diambu ko.

MFOKO A KOLO NSAMBWADI YE LUBANTIKU LWA LUMBU YAMBANINU

Malungu: Vava ungunza walungana mu nkumbu antete muna Nebukandesa, ekolo nsambwadi mvu nsambwadi kiazingila. Kansi, muna ndungana yazole itadidi Kintinu kia Nzambi, e kolo kiaki ke kiazingila kaka mvu nsambwadi ko.

João: Ekuma ovovele diadi?

Malungu: Entete, sungamena vo ekolo nsambwadi kiayantika vava e mbanz’a Yerusaleme yafwaswa muna mvu wa 607 V.T.K. Avo tuyantikidi tanga ekolo kiaki muna mvu wa 607 nze una tutangilanga e mvu, ekolo nsambwadi kiadi fokoka muna mvu wa 600 V.T.K. Kansi, muna mvu wa 600 ke mwavangama diambu ko diasonga vo Kintinu kia Nzambi kiayantika yala. Nze una twalongoka, vava Yesu kakala ova ntoto wasonga vo ekolo nsambwadi ke kiakifokokela ko.

João: Ingeta, nsungamene dio.

Malungu: Ozevo, e kolo nsambwadi ke kisunzulanga kaka mvu nsambwadi ko kansi kolo kiandá kisunzulanga.

João: Kolo kwa kisunzulanga?

Malungu: O nkand’a Lusengomono uyikanga lusansu lwa nkand’a Daniele, ukutusadisa mu zaya o lutangu lwa mvu miyikwanga muna kolo nsambwadi. O nkanda wau uyikanga kolo tatu ye ndambu, i sia vo 1.260 ma lumbu.d Avo tubundidi kolo tatu ye ndambu nkumbu miole, tulungisa kolo nsambwadi, e kolo kiaki kikutuvana 2.520 ma lumbu. Nga obakwidi?

João: Ingeta. Kansi, ediadi nkia ngwizani dina yo lubantiku lwa Kintinu kia Nzambi muna mvu wa 1914?

Malungu: Yambula twafimpa e diambu diadi. Ezak’e ntangwa, ungunza wa Nkand’a Nzambi usadilanga lumbu muna yika mvu.e Avo tusadidi nsiku wa Nkand’a Nzambi wa konso lumbu mvu umosi, e kolo nsambwadi kikutuvana 2.520 ma mvu. Owau, avo tutangidi mvu miami tuka muna mvu wa 607 V.T.K., tulwaka mu mvu wa 1914.f E ndekwa zazi zatusadisa mu bakula vo ekolo nsambwadi mu mvu wa 1914 kiafokoka, twabakula mpe vo Yesu wa Ntinu a Kintinu kia Nzambi mu mvu wauna kayantika yala. Vana ntandu, mambu mayingi masakulwa mu kuma kia lumbu yambaninu, mayantika lungana muna mvu wa 1914.

João: Nkia mambu?

Malungu: Tala e mvovo mia Yesu muna Matai 24:7. Yesu wayika mambu mevangama vava keyantika yala kuna zulu, wavova vo: “Zula itelamena zula kintinu ye kintinu: Mukala mvengele ye nzakama za ntoto o mwakamwaka.” Muna mvovo miami, Yesu wasonga vo vekala mvengele ye nzakama za ntoto muna ntangwa keyantika yala. Tumonanga mambu mama ye makaka mevangamanga ova nza, nga ke wau ko?

João: I wau kikilu.

Malungu: Mu sono kiaki, Yesu wasakula mpe vo vekala vita muna ntangwa keyala muna Kintinu kia Nzambi. O nkanda Lusengomono wasakula vita zibwa mu nza yawonso muna lumbu yambaninu.g Nga osungamene o mvu yabwa vita antete ya nz’amvimba?

João: Mu mvu wa 1914 yabwa, i mvu una nuvovanga vo Yesu kayantika yala! Kiazayanga wo ko.

Malungu: Avo tufimpidi ungunza mu kuma kia kolo nsambwadi yo ungunza wakaka uvovelanga oma ma lumbu yambaninu, tulenda bakula diambu diadi. Mbangi za Yave bena ye ziku vo Yesu mu mvu wa 1914 kayantika yala se Ntinu muna Kintinu kia Nzambi, e lumbu yambaninu mpe mu mvu wau yayantika.h

João: Owau, ngiantikidi bakula.

Malungu: Diamatondo. Mono mpe kiabakula diambu diadi vana vau ko, kolo kiayingi kiavioka. Kana una vo o mvu wa 1914 ke wasonama ko muna Bibila, ngina ye vuvu vo e moko kieto kisadisi mu zaya vo mana Mbangi za Yave belonganga mu kuma kia mvu wau mu Bibila metukanga.

João: Omono sivika itoma kunusivikanga, kadi mawonso nulonganga mu Bibila kikilu metukanga. Ke nulonganga ngindu za yeno kibeni ko. Ezak’e ntangwa ikukiyuvulanga, ekuma Bibila kinina kiampasi muna bakula? Ekuma Nzambi kalembi sonekesena mu Bibila vo Yesu mu mvu wa 1914 kadi yantika yala kuna zulu?

Malungu: E kiuvu kiaki kiambote kikilu. Vena ye mambu mayingi ke masonama ko mu Bibila. Ozevo, ekuma Nzambi kalembi sonekesena mambu mawonso muna Bibila kimana wantu babakula mo mu sazu? Nga tulenda vovela diambu diadi muna nkingula ilanda?

João: Ingeta.