Nkia Lukau Lusundidi Tukau Twawonso?

“Konso lukau lwambote ye konso lukau lwalunga kuna ntandu lutukanga, kadi kwa Se dia ntemo a zulu lukulumukanga.” (Yakobo 1:17) E sono kiaki ntim’a mvevo a Yave wa Nzambi una vo Se dieto kuna zulu kiyikanga. Vana vena tukau twayingi kevananga o Nzambi kwa wantu, vena yo lukau lusundidi tukau twawonso. Nkia lukau? E mvovo mia Yesu mitomene zayakana miasonama muna Yoane 3:16 mikutuvovesanga vo: “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.”

O lukau lwa Mwana mosi a Nzambi, i lukau lusundidi o mfunu kalenda tambula konso muntu mu yeto, kadi lulenda kutuvevola muna ubundu wa sumu, kinunu ye lufwa. (Nkunga 51:5; Yoane 8:34) Kana nkutu nkia ngolo tulenda vanga, ke vena muntu ko olenda kuyivevola muna ubundu wau yandi kibeni. Kansi, Nzambi muna nzola andi ampwena, wavanga diambu muna kutuvevola. Muna vana mwan’andi mosi Yesu Kristu se lukûlu, Yave wa Nzambi wavana e vuvu kia vua moyo a mvu ya mvu kw’awana besonganga o lemvo. Nki i lukûlu? Ekuma lwinina o mfunu? Aweyi tulenda bakila nluta muna lukûlu?

O lukûlu i ntalu ifutwanga muna sumbulula e lekwa kifwasilu yovo vevola mbakami muna ubundu. Nkand’a Nzambi uvovanga vo mase meto mantete Adami yo Eva, alunga basemwa ye vuvu kia zinga yakwele mvu muna paradiso ova ntoto kumosi yo wana badi wuta. (Etuku 1:26-28) Diankenda kikilu, kadi basola kolamena Nzambi. Muna kuma kiaki, basumuka. Nkia mfwilu diatwasa? Nkand’a Nzambi uvutulanga vo: “Wauna e sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso, e kuma kadi awonso basumuka.” (Roma 5:12) Vana fulu kia vana moyo walunga kwa wan’andi, Adami wabasambukisa e sumu yo lufwa.

Kina kifutwanga se lukûlu, kifwete kala betela ye kina kifwasilu. Vava Adami kakolamena Nzambi kuna lukanu, wasumuka yo vidisa moyo andi alunga. Nkand’a Nzambi usonganga vo o ukolami wa Adami wakotesa mbongo andi muna ubundu wa sumu yo lufwa. Ozevo, moyo a muntu ankaka walunga wavavuanga, i sia vo moyo a Yesu owu wavewa se kimenga muna kubavevola muna ubundu wa sumu yo lufwa. (Roma 5:19; Efeso 1:7) Wau vo Nzambi kuna zola kwawonso wafuta lukûlu lwalu, o wantu bena ye vuvu kia vua moyo una Adami yo Eva bavidisa, i sia vo moyo a mvu ya mvu muna paradiso ova ntoto.​—Lusengomono 21:3-5.

Mu kuma kia mana lwalungisa, kalukatikisu ko vo o lukûlu kavana Nzambi, olu lwaziula nzil’a moyo a mvu ya mvu, i lukau lusundidi tukau twawonso. Muna yangalela o ‘lukau lwalu lwalunga,’ yambula twatala una lulungisilanga mambu mana malenda kutusadisa mu vana tukau twambote tuyangidika akaka nze una tumwene muna longi diviokele.

Lukûlu lulungisanga zolela yeto. Yeto wantu twavangwa ye tima dia kwamanana zinga. (Kimpovi 3:11) Kana una vo yeto kibeni katulendi lungisa zolela yeto ko, lukûlu lulenda lungisa e diambu diadi. Nkand’a Nzambi uvovanga vo: “Kadi o mfutu a sumu i lufwa, kansi o lukau lwa Nzambi i moyo a mvu ya mvu muna Kristu Yesu wa Mfumu eto.”—Roma 6:23.

Lukûlu lulungisanga nsatu zeto. Wantu ke balendi vana lukûlu ko. Nkand’a Nzambi uvovanga vo: “E ntalu a lukûlu lwa moyo andi isundidi kikilu.” (Nkunga 49:8) Muna kuma kiaki, lusadisu lwa Nzambi tuvuidi o mfunu muna vevolwa muna ubundu wa sumu yo lufwa. Kansi Nzambi wavanga dina diavavuanga “muna ntalu a lukûlu yafutwa kwa Kristu Yesu.”​—Roma 3:23, 24.

Muna ntangwa yafwana. Nkand’a Nzambi ukutuvovesanga vo: ‘Kristu watufwila ekolo twakala asumuki.’ (Roma 5:8) Wau vo lwavewa “ekolo twakala asumuki,” o lukûlu i ziku kia nzola ampwena a Nzambi kwa yeto kana una vo tw’asumuki. Lukutuvananga mpe vuvu kiasikila kia kusentu, kana una vo tuzizidilanga e mfwilu mia sumu.

Lusonganga e kani diambote yo ntim’a mvevo. Nkand’a Nzambi usonganga dina diafila Nzambi mu vana Mwan’andi se lukûlu: “Muna mpila yayi kwasengomokena o zola kwa Nzambi omu yeto, o Nzambi watuma Mwan’andi mosi ova nza kimana twavuila moyo muna yandi. I kwau kuku o zola, ke yeto ko twazola Nzambi, kansi yandi watuzola.”​—1 Yoane 4:9, 10.

Aweyi olenda songela vo oyangalelanga lukau lusundidi tukau twawonso? Sungamena vo e mvovo mia Yesu muna Yoane 3:16 misonganga vo awana kaka ‘bekwikilanga’ muna yandi i bevuluzwa. Mun’owu wa Nkand’a Nzambi, lukwikilu i “lusikidisu lwa mana mesiwanga e vuvu.” (Ayibere 11:1) Muna kala ye lusikidisu lwalu ofwete vua o zayi. Muna kuma kiaki, tuwondelele wavaula e ntangwa kimana walongoka oma ma Yave wa Mvani a “lukau lwalunga” ye mana ofwete vanga muna vua moyo a mvu ya mvu muna nzil’a lukûlu lwa Yesu.

Olenda longoka mawonso mama muna fimpa malongi ma Nkand’a Nzambi mena muna www.jw.org. Mbangi za Yave bekala ye kiese kia kusadisa. Tuna ye vuvu vo ekolo olongoka oma ma lukau lwalu lusundidi tukau twawonso yo baka nluta, dikufila mu vova vo: “Ntondele Nzambi muna Yesu Kristu wa Mfumu eto!”​—Roma 7:25.