Nga Nzambi okubakulanga?

ADIEYI TULENDA LONGOKA MUNA NSEMA?

Yindula e ngwizani ilenda kala vana vena wantu, musungula awana bena vo mapasa. Betoma bakulanga muntu yo nkwandi. Nancy Segal una vo dipasa ye mfidi a buka kimosi kilongokanga e kadilu kia mapasa, wavova vo mapasa mankaka “bezayanga dina o nkwandi kazolele vova kana nkutu kasasidi dio ko.” Nkento mosi wayika e ngwizani kena yau ye dipasa diandi. Wavova vo: “Tuzeye mawonso mu kuma kia muntu yo nkwandi.”

Adieyi disadisanga mapasa mu toma bakula muntu yo nkwandi? Lufimpu lusonganga vo dimosi muna mambu mekubasadisanga i mpila basansilwa yo longwa kwa mase mau. Kansi, edi kikilu ditoma sadisanga mapasa mu bakula muntu yo nkwandi i genes zafwanana bekalanga zau.

YINDULA EDI: O Mvangi eto otomene kutuzaya lutila nkutu yeto kibeni. Davidi wa ntozi a nkunga wavova vo: “Umfukidi muna vumu kia ngw’ame. E visi yame ke yaswekam’oko wina ko, vava yavangamena kuna sweki. . . . O meso maku mambona una kiavangamene ko, e yikwa yame yawonso yasonama muna nkand’aku.” (Nkunga 139:13, 15, 16) Nzambi kaka otoma bakulanga una twavangilwa ye mambu mabwa muna zingu kieto oma masoba kiwuntu kieto. Wau vo Nzambi otomene zaya e mpila twavangilwa, ediadi disongele vo obakulanga mawonso ma zingu kieto.

ADIEYI NKAND’A NZAMBI UKUTULONGANGA MU KUMA KIA NGANGU ZA NZAMBI?

Davidi wasamba vo: “E Yave, nge wansete yo kunzaya. Ozeye mfong’ame ye ntelam’ame, obakula ngindu zame o vala. Kadi ke vena diambu va lubini luame ko, onge, e Yave, ozeye dio kala.” (Nkunga 139:1, 2, 4) Vana ntandu, Yave ozeye oma mena muna ntima mieto, ‘obakulanga nkutu makani ma ntima’ mieto. (1 Tusansu 28:9; 1 Samuele 16:6, 7) Adieyi e sono yayi isonganga mu kuma kia Nzambi?

Kana nkutu vo ke tulendele vova mawonso ko mena muna ntima vava tusambanga kwa Nzambi, o Mvangi eto ke sianga kaka sungididi mu mana tuvanganga ko, kansi obakulanga mpe e kuma tuvangilanga mo. Vana ntandu, o Nzambi obakulanga oma mambote tuzolele vanga kana nkutu vava usumuki weto ukutukakidilanga mu lungisa makani tuna mau muna ntima. Wau vo Nzambi yandi wasia o zola muna ntima mieto, una mpe ye tima dia zaya yo bakula o zola ye makani tuna mau.—1 Yoane 4:7-10.

O Nkand’a Nzambi uvovanga vo:

• “Meso ma Yave muna ansongi mena, o matu mandi muna ndodokela zau.”—1 PETELO 3:12.

• Nzambi wasia nsilu vo: “Ikulonga yo kusonga nzil’okwenda: Ikulongesela, yo kusia meso.”—NKUNGA 32:8.

NZAMBI NKWA NKENDA KIKILU

O zaya vo Nzambi obakulanga makani meto, nga dilenda kutusadisa mu zizidila e mpasi? Badika dina diabwila Anna wa mwisi Nigéria. Wavova vo: “Muna kuma kia mpasi yanuananga zau, yakiyuvulanga kana vo e zingu mfunu kikilu kina. Vava yabakama kimbevo kia câncer de mama (mayeno) kiavavanga vo yapasulwa, i nkento ansona yakala, mono mosi kaka yasansanga mwan’ame ankento wakala kuna lupitalu mu kuma kia kimbevo kia tomfo. Diampasi kikilu diakala kwa mono mu kala kuna lupitalu muna vava mawuku mu kuma kia kimbevo kiame ye kia mwan’ame.”

Adieyi diasadisa Anna mu zizidila e mpasi zazi? “Yabadikanga e sono kia Filipi 4:6, 7 kivovanga vo ‘luvuvamu lwa Nzambi luna luviokele umbakuzi wawonso luyingila ntima mieno ye makani meno.’ Konso ntangwa yayindulanga e sono kiaki, yamonanga vo Yave una yame yo sungamena vo otoma kumbakulanga lutila nkutu mono kibeni. Yakasakeswa mpe kwa mpangi zame vava yayendanga muna tukutakanu twa Kikristu.”

“Kana una vo yakinu nuana ye mpasi za mayela, e zingu kiame ye kia mwan’ame kiatoma fioti. Wau vo Yave una kuna sambu dieto, tuvenganga kendalala kwayingi vava tunuananga ye mpasi. E sono kia Yakobo 5:11 kivovanga vo: ‘Tubadikilanga ana bazindalala vo akwa nsambu. Nwawá o luzindalalu lwa Yobi ye nsendo una Yave kamvana, numwene vo Yave nkwa walakazi wayingi ye nkenda.’” Wau vo Yave watoma zaya e mpasi kanuananga zau o Yobi, tulenda kala ye ziku vo ozeye konso mpasi tunuananga zau.