“Nkia Nzaya Ndenda mo Zaya, Ovo Kisongelo mo Kwa Muntu ko?”

¹ Vav’o Filipo wa nteleki kayuvula nzimba wa Ntiopia kana vo ozeye mana katanganga muna Diambu dia Nzambi, oyandi wavutula vo: “Nkia nzaya ndenda mo zaya, ovo kisongelo mo kwa muntu ko?” O Filipo wansadisa mu zaya e nsangu zambote mu kuma kia Yesu, e diadi diamfila mu vubwa vana vau. (Mav. 8:26-38) O Filipo watumama o nkanikinu a Kristu wa ‘kitula wantu a zula yawonso s’alongoki, yo kubavuba yo kubalonga.’—Mat. 28:19,20.

² Tufwete tumamang’o nkanikinu wa kitula wantu s’alongoki nze una kavanga Filipo. Kansi kadi, e ndungunuka a nswalu kavanga muna mwanda o nzimba wa Ntiopa, ke yau tumonanga ko kwa wantu tulongokanga yau o Nkand’a Nzambi. O muntu ndiona wa munkwikidi a Kiyuda wateka zaya e Sono, o ntim’andi wa lemvoka wakala, edi kaka kafwan’o vanga i tambulwila vo Yesu i Masia wasilw’o nsilu. Diampasi dikalanga muna longoka yo wantu ke bazeye Nkand’a Nzambi ko, bamana bendomonwa yo malongi ma nsambila za luvunu yovo ana bemonanga e mpasi za zingu kiau. Nki kilenda kutusadisa twavwa e nluta mia fila alongoki a Nkand’a Nzambi bayiyekola yo vubwa?

³ Zayanga e Nsatu za Mwanda za Nlongoki a Nkand’a Nzambi: E nkundikilwa wa Salu Kieto kia Kintinu kia Agositu kia mvu a 1998 wasonga kana kolo kwa kifwete zingila elongi dia finkanda fiamvimba fia Adieyi Kevavanga yo nkanda Zayi. Wavana o luludiku vo: “Tufwete vavang’o zaya e tezo kia konso nlongoki. . . . Ka tufwete kwendanga nzaki ko yo lembi bakulwisa e ludi kia diambu kwa nlongoki. Konso nlongoki ofwete sikidiswa muna lukwikilu lwandi lwampa muna Diambu dia Nzambi.” Muna kuma kiaki, tususumwinu twalembi filang’elongi dia Nkand’a Zayi mu nzaki za vav’o fokola o nkanda mu ngonde sambanu. Akaka nanga kolo kiayingi bevavanga ke ngonde sambanu kaka ko, muna nungunuka mu mwanda yo vubwa. Vava ofilanga elongi lumingu ka lumingu, vaulanga e ntangwa yafwana mu sadisa nlongoki kabakula yo tambulwila oma kelongokanga muna Diambu dia Nzambi. Ezak’e ntangwa nanga kapu kimosi kia nkanda Zayi kilenda longokwa mu tumingu tole yovo tutatu. E diadi disadisa mu bakanga e ntangwa ya tanganga yo sasila e sono yina mun’elongi.—Roma 12:2.

⁴ Kansi, adieyi ovanga kele vo o nlongoki ofokwele o nkanda Zayi kansi kazikukidi ko muna mwanda yovo wakinu muna bak’e nzengo za sikila muna ludi yo yekola zingu kiandi kwa Nzambi? (1 Kor. 14:20) Aweyi ofwete vanga diaka mu kumfila muna nzila ya moyo?—Mat. 7:14.

⁵ Lungisa e Nsatu za Mwanda za Nlongoki a Nkand’a Nzambi: Kele vo o muntu mu nungunuka kena, kana una vo mu malembe malembe, yo yangalelanga mana kelongokanga, vava kefokola e finkanda Adieyi Kevavanga yo nkanda Zayi olenda landakana elongi dia Nkand’a Nzambi muna nkanda wakaka w’ezole. Nanga ke diamfunu ko dia vanga wo kwa alongoki awonso, kansì tu, kele vo mfunu kikilu divwilu olenda landakana elongi muna nkanda Paz e Segurança, Unidos na Adoração yovo nkanda Palavra de Deus. Ateleki ayingi bavwidi nkanda miami balenda mio sadila kele vo nkutakani kena miau ko. E nkanda miami milenda lombwa kuna Filiale kuna Luanda. Kansi kadi, e finkanda Adieyi Kevavanga yo nkanda Zayi i mifwete teka longokwa. Elongi dia Nkand’a Nzambi dina ofila, ye nkingula zawonso ye ntangwa ovanganga ofwete zo soneka muna nsangu za salu kiaku, kana una vo o nlongoki wavubwa una kafokwele longoka nkanda w’ezole ko.

⁶ Nga diadi disongele vo awana balongoka nkanda mosi kaka yo vubwa bafwete longoka diaka nkanda w’ezole? Ve, nanga kele vo mfunu kaka divwilu. Oyau nanga bayoya muna salu kiaki yovo lembi nungunuka muna ludi owau lusadisu bavwidi o mfunu muna sadila e ludi muna zingu kiau. Muna yantika diaka elongi yo nteleki wateka vubwa ofwete teka zayisa nkengi a salu. Kansi ovo ozeye muntu wafokola nkanda Zayi kansi kanungunuka ko ya mu tezo kia kuyiyekola yo vubwa, olenda mokena yandi kana vo ozolele vutukil’o fimpulula mana kalongoka.

⁷ O vwanga o mfunu yo lunga-lunganga konso muntu olongokanga yandi i sinsu kia nzol’a Kikristu. Etima dieto i sadisa alongoki bavwa o zayi wafwana wa ludi kia Diambu dia Nzambi. Oyau balenda baka e nzengo zamfunu yo sikila muna zayi wa kieleka yamu tezo kia yekola e zingu kiau kwa Yave yo vubwa muna maza.—Nku. 40:8; Ef. 3:17-19.

⁸ Nga osungamenanga dina diabwila nzimba wa Ntiopia kuna nima luvubu lwandi? ‘Wayenda muna nzil’andi kuna kiese’ kadi se nlongoki ampa a Yesu Kristu. (Mav. 8:39, 40) Mbula oyeto y’awana tufilanga muna ludi twasolola e kiese kiayingi kitukanga muna sadila Yave wa Nzambi—owau yakwele mvu!