O Nkand’a Nzambi Adieyi Kieleka Kelonganga Sadilwa Kiamfunu Muna Fil’elongi
1 Ekwe kiese twamona vava twatambula nkanda wampa, O Nkand’a Nzambi Adieyi Kieleka Kelonganga? muna Lukutakanu lwa Mvivu “Lemvokela Nzambi!” Yeto awonso twayangalala vava twatambula nkanda wau kina kia Sabala ku masika. Aweyi tusadila o nkanda wau? Wavaikiswa mu fidil’elongi dia Nkanda Nzambi. Kana una vo nkanda wau wampa mu ngonde a Malusu ukaywa, ateleki bakasakeso mu yantika wo sadila mu fil’elongi dia Nkanda Nzambi.
2 Alongoki a Nkanda Nzambi: Ateleki ana befilanga elongi dia Nkanda Nzambi mu nkanda Zayi yovo muna finkanda O Nzambi Adieyi Kevavanga, bafwete kala yo umbakuzi muna yantika sadila nkanda wau wampa. Kele vo nlongoki ampa, ofwete yantika longoka yandi mu nkanda wau wampa. Kele vo muntu olongokanga yandi mu nkanda Zayi, olenda soba muna nkanda O Nkand’a Nzambi Adieyi Kieleka Kelonganga yo yantikila muna kapu kina nulongokanga muna nkanda Zayi. Kele vo nulweke kala ku kapu ya nsuka ya nkanda Zayi, nulenda kweno fokola o nkanda wau.
3 Dialudi, yeto awonso tuzeye wantu ayingi balenda baka nluta muna longok’o nkanda O Nkand’a Nzambi Adieyi Kieleka Kelonganga. Ekuma olembi yantikila longoka yo wantu o nkanda wau wampa utoma kiesesanga e ludi kia Nkanda Nzambi? Kasikil’owu, ana balongoka finkanda O Nzambi Adieyi Kevavanga yovo Zayi ke bakiyekwele ko yo vubwa, kansi bazolele kwamanana longoka, balenda kwau longoka nkanda wau wampa. Amase balenda kwau sadila nkanda wau muna longokanga Nkand’a Nzambi yo wan’au.—Kol. 1:9, 10.
4 Nkand’e Zole Walongoka: Avo muntu o fokwele o nkanda O Nkand’a Nzambi Adieyi Kieleka Kelonganga, nga vena ye nkubika ya longoka nkand’ezole? Elo. Avo nlongoki oyangalelanga mana kelongokanga, elongi dilenda kwandi kwamanana muna sadila o nkanda Sambila Nzambi Mosi Kaka Aludi. Tuna ye vuvu vo o nkanda wau Adieyi Kieleka Kelonganga Nkand’a Nzambi, ukala se sadilwa kiamfunu muna salu kieto kia kitula o wantu se alongoki.—Mat. 28:19, 20.