Programa Yampa ya Lukutakanu lwa Lumbu Kimosi

O ntu a diambu wa programa ya lukutakanu lwa lumbu kimosi i wau, ‘Nuzikuka Muna Zayi’ luyantika muna ngonde ya Setemba ya mvu a 2000. (1 Kor. 14:20) Ekuma dikadila e ndandu kwa yeto mu lungana kuna lukutakanu lwalu? Mu nza yazala yo umpumbulu tuzingilanga. Muna lenda yo fila manima tufwete nungunuka muna zikuka yo zayi wa mwanda kimana twasund’o bi muna wete. Lukutakanu lwa lumbu kimosi lukutusadisa mu vanga dio.

Muna tini kiantete o nkengi a zunga osonga “Lusadisu Muna Lenda Zikuka Muna Zayi wa Nkand’a Nzambi.” Okutusonga una tulenda sikidisila lukwikilu lweto lwa Kikristu. O mpovi wa nkingudi mun’elongi divova vo “Lunga-lunga Kimwanda, Muna Longanga e Ntona Zaku,” osonga o mfunu wa sadila yo lemvokela e nsiku mia Nkand’a Nzambi muna wokesa e ntona.

Aleke mpe bafwete nungunukanga muna zayi. Disasilwa mun’elongi edi: “Ekuma Tufwete Kadila Yingyanangyana Muna Bi” ye “Aleke ana Bebakang’o Zayi Owau.” Wunikina aleke bevova mana bevanganga muna kuyisikidisa muna mwanda kimana bayingila konso yenge-yenge di’evangu diayiva dia nza yo kuyivengola muna mpasi.

Aweyi tulenda sololwela e kiese muna zingu? O mpovi wa nkingudi osasila dio mun’elongi dia nsuka “Baka e Ndandu Muna Lemvokelanga e Nsiku mia Nkand’a Nzambi yo Umbakuzi.” Oyandi oyik’e mbandu isonganga vo olemvokela Diambu dia Nzambi kusadisanga mu sunda e mpasi, yo mu baka e nzengo yo bak’e ndandu za kieleka muna mana kekutulonganga o Yave.

Awana bazolele songa kuyiyekola kwau kwa Nzambi muna vubwa muna maza muna lukutakanu lwalu bafwete zayisa kwa nkengi a mfidi. Soneka e lumbu kia lukutakanu lwa lumbu kimosi muna manaka maku vava kizayiswa yo toma kubama wavwila lukutakanu lwalu e ndandu. Kukondwa kana elongi dimosi ko dia lukutakanu lwalu! Dikusiamisa muna zizidila muna tandu kiaki kiayiva yo sikila ye kwikizi kwa Yave.