Nungununa e Ntona Zaku
1 Omu lumbu yayi yambaninu tuzingilanga, o lubangamu mu wokela kaka luna ye ntonta za mpila mu mpila zitwaswanga kwa nkangu a Nzambi mwawonso. (2 Tim. 3:1-5) Yeto awonso lukasakeso tuvwidi o mfunu muna zizidila muna lukwikilu. (1 Kor. 16:13) Tulenda wo vanga mu lusadisu lwa Yave, ekolo tukuyidikilanga ntangwa ke ntangwa mu madia ma mwanda mena vo i Diambu diandi, yo bunda e vuvu muna mwand’andi yo finamang’aka e nkubik’andi.—Nku. 37:28; Roma 8:38, 39; Lus. 2:10.
2 Ekiaki i kuma o ntu a diambu “Nuzikuka Muna Zayi” wasasilwa muna programa ya Lukutakanu lwa lumbu kimosi ya mvu wavioka. Wabongelwa muna 1 Korinto 14:20, muna tutanganga e mvovo mia Paulu wa ntumwa vo: “Abunzi, ke nukadi yingyanangyana muna zayi ko: kansi muna bi, nukala asedia, vo i muna zayi, nuzikuka.” Aweyi wabadikila lukutakanu lwaluna?
3 “Nkia mpila lukasakeso!” I “lwau kikilu twavwanga o mfunu!” i wau bavova akaka. Ese dimosi mpe una vo ke Mbangi a Yave ko wayenda lungana muna lukutakanu lwaluna lwa lumbu kimosi muna mona luvubu lwa mwan’andi a nkento wa kimbuta kia mvu 12 wavova vo o lukutakanu lwaluna lwansivikisa kikilu ye nluta miambote luatwasa kwa esi nzo andi. Nga i wau mpe wabadikila lo? Mbula twasungamena e maka mambu malongwa muna lukutakanu lwaluna.
4 Zayi wa Ludi Mfunu Una Muna Nungununa e Ntona: Mun’elongi diantete, “Wokesa Umbakuzi Waku Owau,” adieyi kayika o mpovi vo dina diamfunu muna sunda e mpasi za unu? Ke ngangu kaka ko tuvwidi o mfunu. Tufwete longa yo wokesa e ntona zeto muna umbakuzi wa Nkand’a Nzambi, muna lembi sundwa mu mbi yawonso ituzungidi. Muna vwa o umbakuzi wau luludiku lwa Nzambi tuvwidi o mfunu. Nze ntozi a nkunga, tufwete lombanga kwa Yave muna sambu katusadisa mu bakula e nsiku ye nkanikinu miandi kimana twansadila muna ntima mosi.— Nku. 119:1, 2, 34.
5 Muna tini kialanda, o nkengi a zunga wasonga vo o Yave, muna Diambu diandi yo nkubik’andi, okutuvananga “Lusadisu Muna Nungunuka muna Umbakuzi wa Nkand’a Nzambi.” O umbakuzi usasilwanga vo “ ngangu za bakula e diambu yo visa oma mena mo yo lwaka muna ntona a diambu.” Nani olenda kutusadisa muna nungununa e ngangu zazi? O Yave watuvana tukau twa wantu muna kutusadisa mu nungunuka muna mwanda. (Ef. 4:11, 12) E nkubik’andi ova Ntoto ikutukasakesanga twatanganga e Diambu dia Nzambi lumbu ke lumbu yo lungananga muna tukutakanu twawonso twa Kikristu. (Nku. 1:2) Tulongwanga una tulenda sadila o Nkand’a Nzambi yo nkanda mieto mia Kikristu mun’elongi dia yeto kibeni, dia esi nzo ye muna kubika mana melongokwa kuna lukutakanu ye mana tuvova mu salu kia umbangi. Nga obakanga e ndandu za nkubika zazi zawonso? Nga una ye programa ya ngeye kibeni ya tangang’o Nkand’a Nzambi e ntangwa zawonso? Ediadi diamfunu kikilu ovo tutaninwa muna lembi bwa mu ngindu za akwa nza, e fu yau, e ndongota yo vunina kwau.—Kol. 2:6-8.
6 E Ntona Zeto Zifwete Longwa: Muna elongi diandi diantete, yo ntu a diambu vo, “Lunga-Lunga Kimwanda, Muna Longanga e Ntona Zaku,” o mpovi a Nzenza wasasila vo o wantu a nza ke balendi zaya swaswanesa edi diambote y’edi diambi ko. (Yes. 5:20, 21) Ediadi dibwanga wau vo bemengang’o zaya yo lunda e nsiku miansongi mia Nzambi. Nswaswani yo yau, oyeto tulongwanga mu mwanda muna nkubik’a Yave, tuzeye e nsiku mia Nzambi emi mifilanga e salu ye fu yeto. Ozevo, twafwana muna kuyizayila edi diambote ye diatondakana vana meso ma Yave ye mana mena e ngwizani yo luzolo lwandi lwansongi.— Roma 12:2.
7 Muna venga e ngindu zamvwangalakani za nza ye mpasi zilenda twasa tufwete kwamanana longa e ntona zeto. Aweyi divangilwa ediadi? Muna Ayibere 5:12-14 o Paulu wa ntumwa wayika o mfunu wa dianga ke mpasi “kimvumina” kia diambu ko. Madia mangolo ma mwanda tuvwidi o mfunu, nze mana tutambulanga muna ndongoka ya nkanda Mbumba ya Zingu kia Nzo mun’Elongi dia Nkanda dia nkutakani. I bosi tufwete sadila vana vau mana tulongokanga muna zingu kieto. Vava tuvanganga wo, tuzaya e nsiku miansongi mia Yave ye nkanikinu miandi. Ediadi dilonganga e ntona zeto muna toma swaswanesa ewete yo bi.
8 Dia nkenda kikilu vo, wantu akaka bebwanga muna mwanda. Ekuma? Oyau ke besianga e sungididi ko muna mambu mena vo mambote ye mansongi vana meso ma Yave. Nkia mfwilu bebakanga mu diadi? Bavukumunwa muna programa za rádio ye za televisão zina zitumbwanga muna Nkand’a Nzambi, miziki miayiva yovo moko yambi yimokenenwanga muna komputador (salas de bate-papo). Muna kuyikenga, tuvenga vukumunwa mu mambu ma unsafu, ma uzowa yovo ma umpumbulu— Nga. 13:20; Ngal. 5:7; 1 Tim. 6:20, 21.
9 Aleke Bafwete “Kala Yingyanangyana Muna Bi:” E programa yakala ye tini yole yakasakesa aleke muna longanga e ntona zau. O mpovi wasonga vo okala “yingyanangyana muna bi” disongele vo kala wakondw’o kuma, wauna wa asedia akondw’o kuma muna mambu ma mbi vana meso ma Yave. (1 Kor. 14:20) Yeto awonso twakasakeswa mu toma tala e mpila tusadilanga e ntangw’eto muna sunda e mbi yawonso yo venga vukumunwa mu mama. (Ef. 5:15-17) Twakasakeswa muna badikanga e ntangwa tufwasanga muna tanganga e nkanda mina vo ke milendi kutusadisa ko muna wokesa umbakuzi weto muna mambu ma mwanda. Nga ovanganga wo? Nkia nluta diatwasila? Vana ntandu, muna tanganga o Nkand’a Nzambi lumbu ke lumbu, kala ye sungididi kia kwamanana tanga mpe o nkanda mivewanga kwa nkubika. Osadila mama, mesadisa yeto awonso kumosi ye aleke, muna “baka ngangu.”— Nga. 4:7-9.
10 “Nluta mia Sadila e Nsiku mia Nkand’a Nzambi yo Umbakuzi”: Wakala se ntu a diambu w’elongi diansuka dia programa ya Lukutakanu lwa lumbu kimosi. O mpovi a nzenza wasasila vo o Yave i Nto a umbakuzi uvananga moyo, ona osundidi wantu awonso. Badika elau dia vwa o umbakuzi wa Yave! Oyandi mu ntima a mvevo ovananga wo kwa awana bevavanga yo lomba wo muna lukwikilu. (Nga. 2:3-5, 9; 28:5) Nga oyangalelanga o lukau lwandi?
11 Twakasakeswa mu zayanga e nsiku mina tutanganga mu Nkand’a Nzambi. (2 Tim. 3:16, 17) Toma mio longokanga muna kala yo umbakuzi wa ludi mu mana kevovanga o Yave. Vaulanga e ntangwa muna badikanga e nsiku miami ye kotisa mio muna ngindu yo ntim’aku. Ediadi dilonga e ntona zaku yo baka e ndandu vava obakanga e nzengo muna zingu kiaku. (Yos. 1:8) Mbula twatala e maka mambu o wantu ayingi benwananga mau yo mona aweyi o sadila e nsiku mia Nkand’a Nzambi milenda kutusadisa mu vwa e nluta miambote.
12 ‘Nga mfwete tanginina eyaka mpila a mvwatu ye kuyikubika?’ E ntangwa zayingi e mpila ya mvwatu mia nza yo kuyikubika fu yambi yisonganga. E fu yayi yivukumunanga o wantu mu vwata mu mpila mvwangalakani ye yakondwa o mfunu yovo ina isonganga kiyakala ye kinkento. Nkia nsiku mia mfunu mia Nkand’a Nzambi milenda kutusadisa muna nwana ye fu yayi yambi? Muna longanga e ntona zeto, tuzitisa o nsiku una muna 1 Timoteo 2:9, 10 muna vwatanga “yo vumi yo lulungalalu . . . , wauna usongele muna [wantu] bekusanang’o vumina Nzambi.” E nsiku miakaka mifwete sadilwa miyikwanga muna 2 Korinto 6:3 yo Kolosai 3:18, 20.
13 ‘Adieyi ndenda vanga muna kwamanan’o sikidisa e kintwadi kia esi nzo ame?’ E mbokena ambote kwa konso muntu muna nzo mfunu kikilu kwina. Yakobo 1:19 ukutuvovesanga vo: “Konso muntu, mbula kawa-wa-wa; o vova, malembe; o makasi, malembe.” E esi nzo bafwete toma wanga yo mokena muntu yo nkw’andi. Kana nkutu edi tuvovele dia kieleka, kansi kele vo divovelo kuna matingu, yovo kuna lulendo yovo ku ntim’ambadi, mbi kaka divanga ke wete ko. Ozevo twakala yakala yovo nkento, se yovo mwana, e mpova zeto zifwete kala ‘zangemba e lumbu yawonso, yasiw’o mungwa.’—Kol. 4:6.
14 ‘Nga ivukumunwanga mun’eloku dia vwa mavwa mayingi?’ E loko dia vwa mavwa mayingi zingu ya wantu dibangikanga. Ediadi ke disadisanga o muntu ko mu kala ye kiese kia kieleka. (Kim. 5:10; Luka 12:15; 1 Tim. 6:9, 10) Muna kutusadisa mu venga e ntambu mi’eloko dia vwa mavwa mayingi, o Yesu watulonga o nsiku wau wamfunu vo: Kala ye disu dia kumosi, i sia vo sia mambu ma Kintinu vana fulu kiantete. Ediadi divavanga vo twakala ye zingu kiavevoka ye kiakonda mpimpita yo sianga oma makaka vana fulu kiezole.—Mat. 6:22, 23, 33.
15 Nki i Kani Dieto: Tuvwidi muna Diambu dia Nzambi e nto ya nsiku miansongi muna kutufila mu bakanga e nzengo. Tuvwidi o mfunu wa longoka e nsiku miami, badika mio, yo bakula una tulenda mio sadila muna zingu kieto. Muna diadi o longanga e ntona zeto mu ‘zaya mpambula za wete yo bi,’ tutambula e ndandu yeto kibeni yo zitisa Yave.—Ayib. 5:14.