Ng’ozolele Sala Kwayingi?
1 O Yesu watezanisa Kintinu nze lusalu lwa ntalu. (Mat. 13:44-46) E salu kia mwanganisa e nsangu za Kintinu lusalu lwa ntalu mpe. E salu kiaki kifwete siwanga vana fulu kiantete muna zingu kieto, muna lenda wo vanga, kuyiyekola emvimba divavanga. (Mat. 6:19-21) Ng’ozolele sala kwayingi mu salu kia Kintinu?
2 Badika Oma Mamfunu: Mambu mayingi men’o mfunu muna wokesa e salu kieto kia umbangi: (1) Siang’e mambu ma Kintinu vana fulu kiantete muna zingu. (Mat. 6:33) (2) Kalanga yo lukwikilu ye bundanga e vuvu kwa Yave. (2 Kor. 4:1, 7) (3) Vavang’o lusadisu lwa Nzambi ye ziku kiawonso yo kwamanana muna sambu. (Luka 11:8-10) (4) Kwamanana vanga oma men’e ngwizani ye sambu yaku.—Yak. 2:14, 17.
3 Mpila ya Wokesela e Salu Kieto: Yeto awonso tulenda sia etima dia kalanga ye ntangwa ya kwenda muna salu kia umbangi mu konso ngonde. Ng’osadilanga elau diawonso dia sia umbangi muna kinsalukisa yo vanga ngolo za tomesa e mpil’aku a sunzulwila e nsangu yo sia sungididi kia kingula o wantu, yo una fila elongi dia nkand’a Nzambi? Ng’olenda sala nze mviti a nzila a nsadisi yovo mviti a nzila a ngonde ke ngonde yovo sadila kuna kuvwilu o mfunu ayingi? Kele vo u mpangi a yakala wavubwa, ng’olenda kuyifwanisa mu kala se selo yovo nkuluntu? (1 Tim. 3:1, 10) Ng’olenda nungununa e salu kiaku muna vava kuyifwanisa mu salu kia Betele, Sikola ya Nkubama a Uselo yovo missionário wakubikwa kuna Sikola ya Ngiladi?—Luka 10:2.
4 Mpangi mosi wasalanga e lumbu kia mvimba, wafwasanga mpe ntangwa ayingi muna nsaka wakasakeswa mu kituka se mviti a nzila a ngonde ke ngonde. Wayantika sala e salu kia mviti a nzila a nsadisi ibosi wavangulula e mpila zingu kiandi muna kota mu salu kia ntangwa ke ntangwa. I bosi wa kota muna Sikola ya Nkubama a Uselo, eyi yansadisa mu kituka se nkengi a zunga. Wayangalala kikilu wau katambulwila o lukasakeso kavewa, wavova vo una ye kiese kiayingi muna nzengo zandi za sala kwayingi mu salu kia Kintinu.
5 O Yave osambulanga awana bekuyivananga. (Yes. 6:8) Kuyambula konso diambu ko diakakidila mu wokesa e salu kiaku kia umbangi, kinumana vo wabaka nluta mia kiese ye luvuvamu.