Kembelela Yave Muna Silanga Umbangi ku Kinsalukisa
1 Selo ya Yave yakwikizi bevavanga e mpila ya kunkembelela konso lumbu. (Nku. 96:2, 3; Ayib. 13:15) Mpila mosi tulenda wo vangila i sila umbangi ku kinsalukisa. O unu asambidi ayingi a Yave bevutulanga matondo wau vo bazayiswa e nsangu za Kintinu ku kinsalukisa.
2 Osila umbangi ku kinsalukisa kwa muntu nkumbu miayingi divanang’elau kwa akaka bawa nsangu za Kintinu. Nze nona, e moko kia Yesu yo nkento wa Nsamaria vana sima kia maza kia Yakobo kiasadisa wantu ayingi mu wá e nsangu zambote. (Yoa. 4:6-30, 39-42) Vava Paulu ye Sila bakala muna pelezo kuna Filipi, basila umbangi kwa nyingidi a pelezo, i bosi esi nzo andi awonso batambula e ludi.—Mav. 16:25-34.
3 Malau: Nki’elau ovwidi mu sila umbangi ku kinsalukisa? Akaka bevanganga wo vava bekwenda sumbanga e lekwa, muna fulu yabakila makalu yovo muna nzo za wukila. Akaka besianga umbangi muna ntangw’a vundu kuna salu yovo kuna sikola. Osianga e nkanda mieto va fulu kimonekanga, dilenda fila akaka mu yuvula mambu ma lukwikilu lweto.—1 Pet. 3:15.
4 Vava e Mpila ya Yantikila: Mwan’a ndumba mosi una ye kimbuta kia mvu nsambwadi wa nkwa nsoni, wa wá muna lukutakanu ekuma awonso bafwete samunwinanga e nsangu zambote. Muna kuma kiaki, vava kayenda yo ngw’andi kuna zandu wanata yinkanda-nkanda yole muna nkutu andi. Vava ngw’andi kasumbanga lekwa, mwan’a ndumba wafinama nkento mosi yo kunkayila finkanda fimosi, nkento ndiona wayangalela fio tambula. Vava kayuvulwa kana nkia mpila kavwila unkabu mu mokena yo nkento ndiona, mwan’a ndumba wavova vo: “Mono kibeni yavova vo mbula ya mokena yandi! Muna kuma kiaki yavanga wo!”
5 Muna sila umbangi ku kinsalukisa, yeto awonso tufwete kala ye unkabu nze mwan’a ndumba ndioyo. Adieyi dilenda kutusadisa? Lomba unkabu wa vova muna sambu. (1 Tes. 2:2) Kubika kiuvu yovo ntu a diambu wa mfunu una olenda sadila muna yantika e moko. I bosi sia vuvu vo Yave osambula e ngolo zaku—Luka 12:11, 12.
6 Osila umbangi ku kinsalukisa kwa wantu tuwananga konso lumbu ditwasanga nkembo kwa Yave yo kutuvana kiese. Dilenda sadisa muntu mu kota mu nzila ifilanga ku moyo a mvu ya mvu.