Nkubika Ampa ya Lukutakanu lwa Zunga

Wau vo mu ‘ntangw’ampasi’ tuzingilanga, ngangu za Nzambi mfunu zina mu vwa edienga dia Yave. (2 Tim. 3:1) O lukutakanu lwa zunga lwa mvu a 2005, luna ye ntu a diambu “Filwa kwa Ngangu za Ntandu” lukutuvana malongi mambote ye malukasakeso.—Yak. 3:17.

Elongi diantete dia kunku yá, “tusadila ngangu za Nzambi” dikutusadisa muna zaya edi divavwanga mu kala ye luvuvamu, wavelela, alembami ye nzaki muna lemvokela. O nkengi a zunga osasila mambu matatu mamfunu ma ngangu za Nzambi. O nkengi a mvivu ofokola e lumbu kiantete muna songa vo kana una vo Akristu bebadikilwanga nze “wantu balembi longwa,” bafwana muna longa e ngangu za Nzambi.—Mav. 4:13.

Muna lumbu kiazole, elongi dia kunku yá dina yo ntu a diambu “Tuyivana mu Mambu Mevangamesanga” dikutusadisa mu zaya yo venga mambu malenda fwasa kimwanda kieto. Dikutusonga mpe aweyi tulenda siamisina akaka muna nkutakani, muna salu kia umbangi ye muna zingu kia nzo. Elongi dia nkangu wawonso dina yo ntu a diambu “E ngangu za Nzambi Aweyi Zikutusadisilanga?” diwokesa e kiese kieto muna mawete tutambulanga vava tusadilanga e nsiku mia Nzambi mu zingu kieto. Elongi dia nsuka dina yo ntu a diambu “Ngangu za Nzambi Zikututaninanga,” dikutusadisa mu sadila ngangu za Yave mu lumbu yayi yambaninu.

Muna konso lukutakanu o luvubu lw’alongoki ampa i diambu disundang’o mfunu. E Sikola ya Salu kia Kimfumu y’elongi dia Sentinela dia lumingu lwaluna dilongokwa mpe muna lukutakanu. Yave ozolele vo yeto awonso twavwa nluta mia ngangu zandi. Tuvwa nluta mia kimwanda muna malongi ma lukasakeso mekutuvingilanga muna lukutakanu lwa zunga.—Nga. 3:13-18.