Lukutakanu lwa Zunga Lukutusadisanga mu Lunga-lunga Kimwanda Kieto
1. Nkia nkubik’a Yave ikutusadisanga mu sala e salu kieto kia samuna e nsangu zambote?
1 Kuna zola kwawonso Yave okutuvananga malongi ye lukasakeso tuvwidi o mfunu mu sala e salu kieto kia samuna e nsangu zambote. (Mat. 24:14; 2 Tim. 4:17) Lukutakanu lwa zunga tukalanga lwau nkumbu mosi muna mvu, lumosi muna lusadisu lwalu. Lukutakanu lwa zunga lwa mvu wa salu wa 2010 lukala yo ntu a diambu vo: “Lunga-lunga Kimwanda Kiaku,” ubongelo muna sono kia Roma 8:5 ye Yuda 17-19. E nkubika yayi iyantika muna lumingu lwa 31 lwa Agositu lwa mvu a 2009.
2. (a) Lukutakanu lwa zunga aweyi lukututwasila e nluta? (b) Lukutakanu lwa zunga lwa vioka aweyi lwasadisila muna salu kia umbangi?
2 Nkia Nluta Lukutuvananga: Lukutakanu lukutulukisa mu vonza kia vunzanesang’e ngindu mu mambu malenda kutudia e ntangwa yo kutusadisa twasia sungididi muna mambu masundidi o mfunu. Tulongwa una tulenda vengela e fu kia kivangila dina tuzolele yo badika dina dikitulanga muntu se nkwa kimwanda. Elongi dia kunku yayingi difilwa kina kia Lumingu, disadisa konso muntu y’esi nzo mu zaya dina balenda vanga mu kumika kimwanda kiau mu lenda zizidila ntonta za lukwikilu ye mpasi za zingu ziwokelang’aka. Lukutakanu lukutusadisa mu lunga-lunga ntima mieto ye mavimpi meto ma mwanda yo sungamena nsambu zayingi bevwa awana belunga-lunganga kimwanda kiau.
3. Nkia lumbu kikala lukutakanu lweno lwa zunga ye adieyi i kani diaku?
3 Vava ozaya e lumbu ye fulu kikala lukutakanu lweno, kubama kimana wakala lumbu yau yole yo landa malongi mawonso. Kala ye ziku vo Yave osambulanga e salu kia nkwa fululu.—Nga. 21:5.
4. Nki tutambula muna lukutakanu lwa zunga tukala lwau?
4 Kieleka, Yave i mvani a tukau twatu twambote. Lukutakanu lukubikwanga kwa ntaudi akwikizi i lwau kikilu ovwidi o mfunu mu sala e salu kiaku kia Kikristu. Tuvutulanga matondo kwa Yave muna nkubika zazi zawonso zikutusadisanga mu ‘tatidil’e ntambulwil’a vuvu kieto, ke yanikuka.’—Ayib. 10:23-25; Yak. 1:17.