Kala y’Etima dia Kimviti a Nzila
1. Aweyi olenda songela etima dia kimviti a nzila?
1 Diakala aviti a nzila yovo ve, ateleki awonso a Kintinu balenda songa etima dia kimviti a nzila. Ateleki awonso bafwete lemvokelanga nkanikinu wa samuna e nsangu zambote yo kitula wantu s’alongoki. (Mat. 28:19, 20; Mav. 18:5) Bafwete vwanga wantu mfunu yo vanga mawonso muna lungisa e salu kiau. (Mat. 9:36; Mav. 20:24) Mbangi za Yave bena ye luzolo lwa sadisa akaka muna kubalonga e ludi. (1 Kor. 9:19-23) Mbula twabadika nona kia Filipo wakala y’etima diadi.
2. Akuluntu ye selo ya salu aweyi balenda tanginina o vema wa Filipo muna salu kia umbangi?
2 Samuna Nsangu Zambote yo Longa: Filipo mbebe ampwena kakala yau muna nkutakani ya tandu kiantete. (Mav. 6:1-6) Nteleki a vema wa nsangu zambote kakala. (Mav. 8:40) O unu, ekolo akuluntu ye selo ya salu belungisanga e mbebe zau muna kala se ntu muna salu kia umbangi, etima dia salu kia kimviti a nzila besonganga. Ediadi dikasakesanga ampangi muna nkutakani.—Roma 12:11.
3. Aweyi tulenda songela etima dia kimviti a nzila vava tutontwanga?
3 Kunima lufwa lwa Setefano, lubangamu lwawokela. Ediadi dia twasa mpasi zayingi kw’alongoki. Kansi, Filipo wakwamanana samuna e nsangu zambote ye wasadilwa muna yantika sila umbangi kwa esi Samaria. (Mav. 8:1, 4-6, 12, 14-17) Yeto mpe vava tutontwanga tulenda tanginina mbandu andi muna kwamanana samuna nsangu zambote lembi swaswanesa wantu.—Yoa. 4:9.
4. Nkia mbandu kasisa Filipo nze nlongi a Diambu dia Nzambi?
4 E ndekwa za Filipo nze nlongi a Diambu dia Nzambi zilenda moneka muna luviluku lwa ntima wa nzimba a Ntiopia. (Mav. 8:26-38) O toma sadilanga Nkand’a Nzambi i mpila yakaka tulenda songela etima dia kimviti a nzila. (Mav. 17:2, 3) Nze Filipo, tufwete samunanga e nsangu zambote muna konso fulu kina wantu.
5. Nki kilenda sadisa mase muna kasakesa wan’au mu kala y’etima dia kimviti a nzila?
5 Esi Nzo ye Nkutakani: Ka lukatikisu ko vo e fu ye mbandu Filipo yakasakesa wan’andi amakento. (Mav. 21:9) Diau adimosi, mase m’Akristu ana besianga Kintinu va fulu kiantete muna zingu kiau bekasakesanga mpe wan’au. Kanele vo bekalanga ye salu yayingi, o se ona osamunanga nsangu zambote yo vema kwawonso olenda songa mbandu ambote kwa wan’andi.—Nga. 22:6.
6. Aweyi tulenda sadisila aviti a nzila muna nkutakani eto?
6 Filipo watambula Paulu ye Luka muna nzo andi, Akristu avema ana bayivana mu salu kia Yave. (Mav. 21:8, 10) Aweyi tulenda songela vo tuyangalelanga e salu kiaki yo sadisa Akristu a vema o unu? Nanga tulenda sala ye aviti a nzila mu mene yovo ku masika vava vekondwanga wantu besala yau muna salu kia umbangi. (Fili. 2:4) Tulenda mpe kubabokela muna nzo zeto muna kubakasakesa. Kana nkutu nkia mpila zingu tuna kiau, yeto awonso tulenda kweto songa etima dia kimviti a nzila.