Aweyi Tulenda Sadila Mvovo Mialeboka mu Yantika Mokena yo Wantu?
1. Nkia mpila tufwete sadilanga nsunzula zamoka zaleboka zivayikiswanga?
1 Mpila za sazu mu yantika e moko muna kayanesa yinkanda-nkanda yeto ye nkanda miakaka zisongwanga muna Salu Kieto kia Kintinu. Vava tusalanga e salu kia umbangi, ke dina mfunu ko mu landanga mawonso masonama. E nsunzula zazi zivayikiswanga mu kutuvana e ngindu za mana tulenda vova. Avo tulenda sadila mvovo mia yeto kibeni muna nsunzula zazi tulenda baka nluta miambote. Osadila mvovo mia yeto kibeni disadisa awana tumokena yau mu kala avuvama, disonga mpe vo mana tuvovanga masikila ye makieleka.—2 Kor. 2:17; 1 Tes. 1:5.
2. Ekuma tufwete badikila e fu ya zunga tuzingilanga vava tukubikanga nsunzula zeto?
2 Sobanga Nsunzula Zaku: Muna samuna e nsangu zambote una ufwene tufwete zaya e fu ya zunga ina tuzingilanga. Muna mokena yo muntu muna zunga kiaku, nga divavanga vo wankayisa ntete? Ezak’e ntangwa ediadi diswaswana muna konso zunga yovo muna konso muntu. Umbakuzi mpe uvavwanga muna sadila e yuvu. E yuvu yisadilwanga muna yaka e zunga ilenda kendeleka wantu muna zunga yakaka. Muna kuma kiaki, tufwete kala ye umbakuzi kimana twasianga e nsunzula zeto ngwizani ye mpila yiyangalelwanga muna zunga kieto.
3. Ekuma tufwete teka badikilanga e nsansuka ye ngindu z’awana tumokena yau?
3 Vana ntandu, vava tusalanga salu kia umbangi tufwete badikanga nsansuka ye ngindu za wantu muna zunga kieto. Muna bong’e nona, e mpila olenda mokena ye muntu osambilanga muna dibundu dia Katolika muna tanga Matai 6:9, 10, yaswaswana y’ona olembele zaya e sambu kia “S’eto.” Muna teka kubamanga tulenda soba nsunzula zeto kimana zayangidika awana tuwanana yau muna salu kia samuna e nsangu zambote.—1 Kor. 9:20-23.
4. Oteka kubama nkia ekuma kunina o mfunu?
4 Kana una vo tuzolele sadila nsunzula nze una zasonama, oteka kubama i diambu disundidi o mfunu. Tufwete tanganga elongi yovo kapu kina tuzolele sadila muna salu kia umbangi yo vava mambu malenda sikamesa luzolo lwa wantu. I bosi tusadila mo muna nsunzula zeto. Avo tutomene zaya mambu mena muna nkanda mieto tulenda mio kayanesa ye kiese kiawonso.
5. Ekuma tufwete sadilanga nsunzula zakaka? Aweyi tulenda wo vangila?
5 Nsunzula Zakaka: Nga vena ye nsiku uvovanga vo tufwete sadilanga kaka nsunzula zina zivayikiswanga? Ve. Avo diafwana kwa ngeye mu sadila nsunzula zakaka zina tomene zaya, sadila zo. Musungula vava okayanesanga yinkanda-nkanda, sianga sungididi kia sadila malongi malenda yangidika wantu muna zunga kiaku ke mu yika kaka ntu a diambu ko wa finkanda-nkanda. E nsongesela zisonganga mpila ya kayanesa yinkanda-nkanda muna Lukutakanu lwa Salu, zikubikwanga mu songa mpila ya mokena yo wantu muna zunga kia nkutakani. Ediadi disadisanga awonso mu samuna nsangu zambote una ufwene.