Kaya Yinkanda-nkanda Isilang’e Ludi o Umbangi
1. Nki i mfunu w’Eyingidilu ye Despertai!?
1 Eyingidilu disamunanga Kintinu kia Yave kumosi ye Despertai! i sadilwa yantete isadilwanga mu samuna e nsangu zambote za Kintinu yo kitula wantu s’alongoki. (Mat. 24:14; 28:19, 20) Tuyangalalanga sunzula yinkanda-nkanda yayi yau yole ekolo tusalanga e salu kia Kintinu mu mpila zayingi.
2. Adieyi disoba mun’Eyingidilu ye Despertai! y’ekuma?
2 Ekolo mvu miviokanga tumonanga nsobani za mambu muna yinkanda-nkanda kumosi ye mpila tusadilanga mu kaya yo. E nsobani zazi zikitulanga yinkanda-nkanda yeto se yambote ye mpila ya kotesa e nsangu zambote muna ntima mia ‘wantu a mpila zawonso bavuluzwa yo luaka muna visa kia zay’e ludi.’—1 Tim.2: 4.
3. E yinkanda-nkanda aweyi isadilwa muna salu kia umbangi?
3 Tuka muna ngode ya Yanuali ya 2006, tumonanga nsobani zayingi muna mpila tusunzulwilanga mambu ma konso Despertai! O wau mpe tusadila nsunzula zayingi zaswaswana mu kaya yinkanda-nkanda y’Eyingidilu Disamunanga Kintinu muna konso ngonde, muna salu kieto kia umbangi. E mpila yasunzulwila konso finkanda-nkanda yasonama kuna lukaya lwa nsuka lwa Salu Kieto kia Kintinu. E nsunzula zazi ntangwa zayingi malongi mantete ma yinkanda-nkanda zivovanga, kansi e ntangwa zakaka nsamu mitoma yangalelwanga kwa nkangu zivovanga. E nsunzula zazi zilenda sadilwa mu mpila yambote vava tutoma bakulanga elongi yo sadila mvovo mia yeto kibeni mu sunzula yinkanda-nkanda muna zunga kieto.
4. Ekuma dinina mfunu dia kubikanga nsunzula zakaka ke mu zina kaka ko zisiwanga muna Salu Kieto kia Kintinu?
4 Kana una vo e Salu Kieto kia Kintinu tuludiku tole kivananga muna mpila ya sunzulwila konso yinkanda-nkanda, ke diambi kwandi ko dia sadila nsunzula zakaka. E kuma olenda wo vangila, kilenda kala vo vena ye nsamu akaka utoma yangalelwanga kwa wantu muna zunga kieno. Dilenda kala mpe vo zolele sadila nsunzula zayingi mun’elongi diyangidikidi.
5. Adieyi fwete vanga ekolo kukubikidi ko e nsunzula osadila mu kaya yinkanda-nkanda?
5 Una Lenda Kubikila e Nsunzula Zaku: E ntete, ofwete vava zaya oma mena mun’elongi zolele sunzula. Ke divavanga ko vo wazaya ntete malongi mawonso mena muna yinkanda-nkanda una kukayidi yo ko muna salu kia umbangi. Kansi divavanga vo wasonga e kiese ye ziku vava osunzulanga elongi osolele. Ediadi lenda dio vanga kele vo otekele zaya oma mena mun’elongi osunzula.
6. Aweyi tulenda kubikila e nsunzula za yeto kibeni?
6 I bosi, sobanga e mvovo miaku miantete. Kubika kiuvu kiamfunu kina e betela y’elongi kilenda kusadisa mu yantika e moko. Siang’e vuvu muna nkum’a Diambu dia Nzambi mu kotesa e ludi muna ntima mia wantu. (Ayib. 4:12) Kubika e sono yin’e betela ye diambu ovova yovo sadila sono kina mun’elongi dia yinkanda-nkanda okaya. Badika una owizanesena e sono y’elongi ovova.
7. Aweyi tulenda tomesena e nsunzula zeto?
7 Muna Konso Elau: Muna kala yambote, e nsunzula ifwete sadilwa. Salanga kumosi ye nkutakani muna konso kia Sabala kikaywanga yinkanda-nkanda. Vana yinkanda-nkanda kwa wantu ana batambula nkanda miakaka. Konso ntangwa vananga yinkanda-nkanda kw’alongoki aku a Nkand’a Nzambi ye kwa wantu akaka owananga vava ovutukilanga kingula akwa luzolo lwambote. Olenda mpe vana yinkanda-nkanda kwa wantu ana omokenanga yau vava okwendanga ku zandu, vava kangalanga yovo vava ovingilanga dotolo. Tomesanga e nsunzula zaku osadila konso ngonde.
8. Eyingidilu ye Despertai! aweyi yiswaswanini ye nkanda miakaka?
8 Eyingidilu ye Despertai! yaswaswana ye nkanda miakaka. Yitundidikanga Yave nze Mfumu a nsema. (Mav. 4:24) Yifiaulwisanga wantu ye nsangu zambote za Kintinu kia Nzambi yo kumika kwikizi kieto muna Yesu Kristu. (Mat. 24:14; Mav. 10:43) Vana ntandu, yifimpanga mambu ma nza ekolo melunganesanga ungunza wa Nkand’a Nzambi. (Mat. 25:13) Sadisa wantu muna zunga kiaku babak’e nluta mia yinkanda-nkanda yayi, muna diadi, kubamanga mu kaya yo konso ntangwa obakidi elau!
9. Adieyi tulenda vanga mu vutukila kingula wantu?
9 Vava okayanga yinkanda-nkanda yovo mokena diambu dia mwanda yo muntu, kubikanga kiuvu yovo diambu dilenda ziula e nzila mu vutukila kunkingula yo mokena mambu makaka ma mwanda. Avo tukala y’etima muna kuna mbongo a ludi, tulenda kala ye ziku vo Yave oziula ntima mi’awana bazolele kunzaya yo kunsadila.—1 Kor. 3:6.