Vutula Matondo Muna Walakazi wa Yave
Luyindulu lwa Lufwa lwa Kristu kia 24 kia Ngonde a Malusu Lukala
1. O Yave aweyi katusongela walakazi?
1 Ntozi a nkunga wayimbila vo: ‘Yambula wantu bakembela Yave muna walakazi wandi, yo muna masivi mandi kwa wan’a wantu.’ (Nku. 107:8) O walakazi wa Nzambi kesongelanga wo mu nkenda kaka ko kemwenanga wantu. Ditoma monekanga muna mvovo emi miavumunwinwa: “O walakazi waku, e Yave, unsikini.” (Nku. 94:18) Nkia mpila walakazi kasonga o Yave muna vana Mwan’andi amosi muna wete dieto!—1 Yoa. 4:9, 10.
2. Aweyi tulenda vutulwila matondo kwa Yave?
2 Ekolo kifinamanga lumbu kia Luyindulu lwa lufwa lwa Kristu, aweyi tulenda vutulwila matondo kwa ‘Nzambi a walakazi’? (Nku. 59:17) Konso muntu mu yeto lenda songa luzolo lwa vaula ntangwa yayindula mana mabwa muna lumbu yambaninu ina o Yesu kakala ova nza. (Nku. 143:5) Ediadi dilenda vangama muna landa e programa ya tanga Nkand’a Nzambi ya lumbu ivitila Luyindulu, muna Examina as Escrituras Diariamente—2005. Kele vo dilendakana, tanga mpe kapu kia 112-116 kia nkanda O Maior Homem que Já Viveu kumosi ye nkanda miakaka. Badika mana otanga kimana makota muna ntima. (1 Tim. 4:15) Oteka samba vava tulongokanga Diambu dia Nzambi ke dikutukumikanga kaka ko kansi disonganga mpe zola kweto muna Yave.—Mat. 22:37.
3, 4. (a) Aweyi tulenda tanginina e fu kia esi Libéria? (b) Nani ozolele bokela mu kwiza ku Luyindulu?
3 Kasakesa Akaka Bavutula Matondo kwa Nzambi: Muna mvu wavioka, wantu 16.760.607 bakala muna Luyindulu muna nza yawonso. Muna evata dimosi kuna Libéria, ampangi basoneka nkanda kwa mfumu evata mu lomba nswa wa vangila lukutakanu lwa Nlekelo a Mfumu muna vata diandi. Mfumu wavana nswa kw’ampangi mu sadila yanzala kitelwanga e somba dia malu ye wazayisa nkangu muna zunga mu kwiza lungana. Kana una vo ateleki atanu kaka bena muna vata diodio, wantu 636 balungana muna Luyindulu lolo.
4 Diau adimosi, yeto mpe tuzolele sadisa wantu ayingi kele vo dilendakana mu kutuyikama muna lumbu kia Luyindulu. Ekuma olembi sonekena nkumbu za wantu ozolele bokela mu kwiza lungana? E fwaniswa yina vana fukwa kia Despertai ya kia 8 kia ngonde ya Malusu y’Eyingidilu dia 15 kia ngonde a Malusu isonganga mpila ya bokelela wantu mu kwiza lungana. E mboka zanietekwa za Luyindulu lwa lufwa lwa Kristu zilenda mpe sadilwa. Soneka e ola ye fulu kikala lukutakanu lwa Luyindulu yo vana yo kwa konso muntu obokele. Ekolo kifinamanga e lumbu kia 24 kia ngonde a Malusu, vutukila sungamesa konso muntu yo kubika konso edi divwilu o mfunu.
5. Aweyi tulenda kasakesela nlongoki mu kwiza lungana muna lumbu kia Luyindulu?
5 Aweyi olenda sadisila nlongoki ona ke lungananga yeto ko mu bak’e nluta mia kwiza muna lukutakanu lwa Luyindulu? Vaulanga e ntangwa muna kolo ki’elongi mu sadisa nlongoki kabakula o mfunu wa lumbu kia Luyindulu. E mpila yambote ya vangila wo ina mun’Eyingidilu dia 15 kia ngonde ya Malusu 2004, lukaya lwa 3-7, ye muna nkanda Raciocínio, lukaya lwa 86-90.
6. Ekuma dinina mfunu dia kaisa anzenza bekwiza ku Luyindulu?
6 Kaisa Anzenza: Muna lumbu kia Luyindulu, kaisa yo mokena ye anzenza. (Roma 12:13) Fonga kumosi y’awana obokele yo vava zaya kana vo bena yo Nkand’a Nzambi ye cancioneiro. Tufwete kaisa konso nteleki wayambula samuna nsangu zambote ovenge ngolo za kwiza lungana. O luzolo lweto lwambote lulenda kubasadisa mu vutukila kutakana muna tukutakanu twa nkutakani ntangwa zawonso muna. (Luka 15:3-7) Muna kolo kiaki kiavauka, tulenda vanga mawonso tulenda muna kasakesa akaka batuyikama mu vutula matondo kwa Yave muna “walakazi wandi wesivi.”—Nku. 31:21.