Fila Elongi dia Nkand’a Nzambi Dinungunukanga Kunku kia 11
Sadisa Nteleki Ampa mu Vutukila Kingula Wantu
1 Vava nteleki ampa keyantika sala e salu kia umbangi, owanana ye wantu ayingi besonga luzolo lwa wá e nsangu zambote. Aweyi tulenda sadisila nteleki ampa kavutukila kingula wantu awaya mu kumika luzolo lwau?
2 E moko kiantete kiziulanga e nzila mu vutuka kingula o muntu. Muna kuma kiaki, kasakesa nteleki ampa mu songanga luzolo lwakieleka kw’awana kemokenanga yau. (Fili. 2:4) Longa nteleki ampa mu lombanga kwa esi nzo basonganga e ngindu zau yo wunikinanga mana bevovanga. Unzayisa mpe kasonekanga mambu mekubatokanesanga. Avo muntu osongele luzolo lwambote, kafwete soneka mambu mamfunu bamokene. Sadila mambu mama mu kunsadisa muna kubika e moko kiakaka.
3 Nukubama mu Vutuka yo Kingula Wantu: Fimpa mambu mamokenwa muna nkingul’antete, yo songa kwa nteleki ampa e mpila yasolela mambu ma Kintinu malenda yangidika o muntu. (1 Kor. 9:19-23) Nukubika nsongesela mosi yankufi muna nkanda walongokela ye sono kia Nkand’a Nzambi. Vana ntandu, kubika kiuvu kimosi kilenda yuvulwa kuna mfoko a moko eki kivaninwa e mvutu muna nkingula ilanda. Songa kwa nteleki ampa una kalenda sadisila muntu mu nungununa zayi wa Diambu dia Nzambi muna konso nkingula.
4 Diamfunu mpe mu longa kwa nteleki ampa e mvovo mia yantikila e moko. Avo kayisi o muntu, olenda vova vo: “Muna nkingula antete ya yangalela e moko twakala kiau, ngizidi mu kuzayisa diaka diambu diakaka dia Nkand’a Nzambi [yika ntu a diambu una okubikidi].” Songa mpe kwa nteleki ampa una kalenda vova kele vo muntu akaka oziwidi ekielo mu kuntambula.
5 Sia Sungididi kia Vutuka Kingula: Kasakesa nlongoki kasianga sungididi kia vutuka kingula awonso besonganga luzolo lwambote. Muna wana wantu muna nzo zau, nanga divavanga vo kavutuka kubakingula nkumbu miayingi. Longa nteleki e mpila ya wizana yo muntu mu vutuka kunkingula. Unsadisa kalungisanga o nsilu andi. (Mat. 5:37) Longa nteleki ampa kimana kakala muntu ambote, yo vwanga akaka o mfunu yo kubazitisa, ekolo kevavanga awana bena nze mameme yo wokesa luzolo lwau.—Tito 3:2.