Tusala e Salu kia Umbangi Y’etima Diawonso
1 O lutangu lwa ola besalanga Mbangi za Yave muna salu kia umbangi luwokelanga tuka muna mvu a 1992, mu ntalu kaitangakani 1.000.000.000, mu kuma ki’etima diau dia samuna nsangu za Kintinu yo kitula wantu s’alongoki. Tuna ye kiese kia kala muna aya besalanga e salu kiaki ki’esivi!—Mat, 28:19, 20.
2 Kieleka vo, matondo mawonso yo nkembo wa Yave, ona okutulundanga yo kutuvana mawonso tuvwidi o mfunu muna salu kieto kia umbangi mu ‘ntangwa yayi yampasi.’ (2 Tim. 3:1) Adieyi divavwangwa kwa yeto muna lenda zindalala y’etima muna salu kiaki kiamfunu?
3 Etuku di’etima: O zola Nzambi ye mfinangani zeto, kumosi y’etima dia lungisa ekani twayiyekolwela, kulenda kutufila mu sal’e salu kieto kia Kintinu. (Mat. 22:37-39; 1 Yoane 5:3) O zola kulenda kutufila mu kuyivana una ufwene mu salu kia samun’e nsangu zambote.—Luka 9:23.
4 Kwamanana Sala Y’etima Diawonso: Ntantu eto Nkadi Ampemba ovanganga wawonso mu kulula etima dieto muna salu kia umbangi. O lembi tambuka kw’awana bena muna zunga kieto ye luvuki lwa nza yayi ye mambu ma zingu kia lumbu ke lumbu yo tokanena diambu dia vimpi wa yeto kibeni, i mambu kesadilanga Satana mu vava kutuyoyesa.
5 Muna kuma kiaki, tufwete sala una ufwene mpasi vo etima dieto dialembi zima. Diamfunu vo twasungamena e “nzol’[eto] antete.” Ediadi divavanga vo twatanganga yo badika Nkand’a Nzambi, yo bakang’e nluta mia mawonso kekutuvananga Yave muna “Ntaudi Akwikizi yo Lulungalalu” mu kumika lukwikilu lweto.—Lus. 2:4; Mat. 24:45; Nku. 119:97.
6 Nze una utoma songanga ungunza wa Nkand’a Nzambi, e lumbu kia lufwasu lwa wantu ambi kwa Yave mu finama kaka kina. (2 Pet. 2:3; 3:10) Wau tuzeye e diadi, yambula twasala e salu kia umbangi una ufwene y’etima diawonso yo samun’e nsangu zambote mu nza yawonso yo kitula wantu s’alongoki!