Nga Otanginina o Vema kwa Yave yo Yesu Muna Nsungi a Luyindulu?
1. Nkia ngolo bevanganga Mbangi za Yave muna nsungi a Luyindulu?
1 Yave olungisanga makani mandi yo vema kwawonso. Muna yika e zaka nsambu zitwasa Kintinu kia Nzambi, muna Yesaya 9:7 tutanganga vo: “Eketo dia [yovo vema kwa] Yave a vu divanga dio.” Diau a dimosi mpe, ekolo kasalanga e salu kiandi ova ntoto, Mwan’a Nzambi wasonga o vema muna nsambil’a ludi. (Yoa. 2:13-17; 4:34) Konso mvu muna nsungi a Luyindulu ulolo wa ateleki mu nza yawonso bevanganga e ngolo za tanginina o vema kwa Yave yo Yesu muna wokesa e salu kiau kia umbangi. Nga okubayikama?
2. Adieyi o vema kukutufila mu vanga tuka kina kia 14 kia Malusu?
2 Kaya e Mboka za Luyindulu: O mvu wau, e salu kia kaya e mboka kiyantika kina kia 14 kia Sabala kia ngonde a Malusu. Vanga e nkubika owau kimana wasala e salu kia umbangi yo vema kwawonso. E nkutakani zikala ye kiese kiayingi ekolo bevanga e ngolo mu sila umbangi mu zunga kiawonso. Vanga mawonso mu bokela alongoki aku a Nkand’a Nzambi, awana okingulanga, akw’aku a salu ye a sikola ye yitu yaku muna kubavana e mboka yovo muna sadila e nzila jw.org.
3. Aweyi tulenda wokesela e salu kieto kia umbangi muna ngonde a Malusu ye Abidi?
3 Salu kia Kimviti a Nzila Ansadisi: O vema kukutufila mpe mu wokesa e salu kieto kia umbangi. Ka lukatikisu ko vo ndonga besala se aviti a nzila ansadisi muna ngonde a Malusu ye Abidi wau vo tukala ye lau dia sola sala ola 30 zivavwanga. Muna nsambil’eno ya esi nzo yovo longi dia ngeye kibeni, samba kwa Yave kimana wazaya una olenda wo vangila. (Nga. 15:22) O vema kwaku muna salu kiaki, kulenda kasakesa akaka mu sala mpe salu kiaki yo vema kwawonso. Avo ovangidi e nsobani muna nkubik’aku kimana wawokesa e salu kiaku, otanginina o vema kwa Yesu.—Maku 6:31-34.
4. Nkia nsambu tuvwa avo tutanginini o vema kwa Yave yo Yesu?
4 O tanginina o vema kwa Yave yo Yesu muna nsungi a luyindulu, nsambu zayingi dikututwasila. Ndonga muna zunga kieto besilwa umbangi. Tukala ye kiese yo luyangalalu lutukanga muna sadila Yave ye akaka. (Mav. 20:35) Edi disundidi o mfunu, o vema kweto kuyangidika Nzambi yo Mwan’andi.