Tufwete Songanga Luzindalalu Muna Salu Kieto kia Umbangi
1. Aweyi Yave kesongelanga luzindalalu kwa wantu?
1 Nzambi osonganga luzindalalu muna mpila kekadilanga yo wantu. (Luv. 34:6; Nku. 106:41-45; 2 Pet. 3:9) Nzambi otoma songanga luzindalalu muna salu kia samuna nsangu za Kintinu kisalwanga mu nza yawonso. Vioka 2000 ma mvu Yave osalanga kumosi yo wantu, yamu wau okwamanananga tunta akwa ntima miansongi muna kumfinama. (Yoa. 6:44) Aweyi tulenda tanginina luzindalalu lwa Yave muna salu kieto kia umbangi?
2. Aweyi tulenda songela luzindalalu vava tusilanga umbangi muna zunga kieto?
2 Sila Umbangi Muna Nzo ye Nzo: Tutangininanga luzindalalu lwa Yave vava tusilanga umbangi ‘lembi vwena’ muna zunga ina vo wantu ke bezolanga wá ko e nsangu zambote. (Mav. 5:42) Tuzizidilanga luvezo, lembi tambulwa ye lubangamu muna salu kieto kia umbangi. (Maku 13:12, 13) Kana una vo diampasi mu wanana ye akwa luzolo lwambote muna nzo zau, kuna luzindalalu lwawonso tusianga ngolo mu kwamanana yitila maza muna mbongo aludi.
3. Ekuma tufwete songela luzindalalu vava tuvutukanga kingula wantu yo longoka yau Nkand’a Nzambi?
3 Alongoki a Nkand’a Nzambi: O nti muna kula luzindalalu divavanga. Tulenda wo yitila maza kansi ka tulendi wo kudisa mu nzaki ko. (Yak. 5:7) Diau adimosi mpe ye mbongo a mwanda, malembe-malembe inungunukanga. (Maku 4:28) Awana tulongokanga yau, balenda mona vo diampasi mu yambula malongi ma luvunu ye fu ya kisi nsi ke ina ngwizani ko ye Nkand’a Nzambi. Katufwete vava komekena alongoki eto ko bavanga nsobani mu nzaki kimana banungunuka muna mwanda. Luzindalalu divavanga muna yambula ntangwa yafwana kimana mwand’a Nzambi wasadisa ntim’a nlongoki.—1 Kor. 3:6, 7.
4. Aweyi luzindalalu lulenda kutusadisila mu sila umbangi kwa yitu yeto mindembi kwikila?
4 Yitu Yeto Mindembi Kwikila: Kanele vo tuna ye luzolo vo yitu yeto balongoka ludi, tufwete songanga luzindalalu muna vingila e ntangwa yambote mu kubasila umbangi, kansi tufwete kala ye ndekwa muna lembi kubavovesa mayingi. (Kim. 3:1, 7) Vana ntandu, tusonganga mbandu ambote yo kala wakubama muna sila lukwikilu lweto umbangi kuna lembama yo vumi. (1 Pet. 3:1, 15) Kieleka, avo tusongele luzindalalu muna salu kieto kia umbangi tuvwa nluta ye tuyangidika S’eto ezulu.