Nga Lenda Longoka Mawonso Olenda Kuna kwa Yave?

1. Aweyi Yave kebadikilanga diambu dia longoka?

¹ I kani dia Yave wa ‘Nlongi eto Anene’ vo twalongwa kwa yandi. (Yes. 30:20) Wayantika longa vava kasema Mwan’andi antete. (Yoa. 8:28) Kana una vo Adami wakolama, Yave muna zola kwandi, okwamanananga longa wantu alembi lunga.—Yes. 48:17, 18; 2 Tim. 3:14, 15.

2. Nkia salu kia longa kilutidi salwa owau?

² O unu, Yave ofilanga salu kiampwena kia longa wantu mu nza yawonso. Nze una kavova Yesaya wa ngunza, ndonga itombokanga kuna “mongo a nzo a Yave muna” nza yawonso. (Yes. 2:2) Ekuma betombokelanga kuna mongo a nzo a Yave? Elo, muna longwa nzila za Nzambi kwa Yave. (Yes. 2:3) Muna mvu wa 2010, Mbangi za Yave vioka 1.600.000.000 ma ola basala muna samuna nsangu zambote yo longa ludi kia Nkand’a Nzambi kwa wantu. Vana ntandu, konso lumingu malongi ma Nzambi melongokwanga muna 105.000 ma nkutakani mu nza yawonso. O ntaudi akwikizi yo lungalalu ovaikisanga mpe nkanda mia Kikristu muna tezo kia 500 za ndinga.

3. Aweyi lenda vwila nluta mia longwa kwa Yave?

³ Baka Nluta una Ufwene: Ekwe nsambu tuvwanga muna longwa kwa Nzambi! Tulongokanga vo Nzambi una ye nkumbu ye okutuvwanga o mfunu. (Nku. 83:18; 1 Pet. 5:6, 7) Tuzeye mvutu za yuvu eyi isundidi o mfunu muna zingu kieto: Ekuma wantu bemwenanga e mpasi yo fwa? Aweyi ndenda kadila ye zingu kia kiese? Ayeyi i nsas’a zingu? Yave watuvana mpe nkanikinu mia nkal’ambote milenda kutusadisa mu ‘songesa ngyenda zeto.’—Yos. 1:8.

4. Nkia sikola zakubikwa muna longa selo ya Nzambi? Ekuma tufwete longokela mawonso tulenda kuna kwa Yave?

⁴ Vana ntandu, Yave okubikanga sikola zayingi muna longa selo yandi kimana bawokesa yo sala e salu kiandi una ufwene. Tala sikola zazi muna lukaya lwa 4-6! Kana una vo kulenda kota sikola zawonso ko kesadilanga Yave muna kutulonga, nga olenda vanga wawonso muna vwa nluta mia sikola zivangamanga muna zunga kiaku e? Nga tukasakesanga aleke ana bekomekenwanga kwa alongi y’akw’au kuna sikola kimana batanga sikola zanda ke mu vava longwa kwa Nzambi ko e? O longwa kwa Yave dilenda kutusadisa mu kala ye zingu kia kiese tuka wau yo vwa moyo a mvu ya mvu kuna sentu.—Nku. 119:105; Yoa. 17:3.

Sikola ya Longokela Tanga yo Soneka

• Kuma Yakubikilwa: Muna longa wantu bazaya tanga yo soneka kimana balenda kitangila Nkand’a Nzambi yo longa ludi kw’akaka.

• Kolo Izingilanga: Mun’owu wa nsatu za konso nkutakani.

• Fulu: Muna Eseka dia Kintinu.

• Aki Nani Balenda Kisonekesa: Ateleki awonso y’akwa luzolo lwambote.

• Una Lenda Kisonekesa: Mun’owu wa nsatu za nkutakani, akuluntu a nkutakani bekubikanga sikola zazi yo kasakesa awonso bazolele longoka tanga yo soneka.

Sikola ya Salu kia Kimfumu

• Kuma Yakubikilwa: Muna kubika ateleki kimana batoma longanga yo samuna nsangu zambote.

• Kolo Izingilanga: Ikalanga ntangwa zawonso.

• Fulu: Muna Eseka dia Kintinu.

• Aki Nani Balenda Kisonekesa: Ateleki awonso y’awana bekwendanga muna tukutakanu yo kwikila malongi ma Nkand’a Nzambi yo zingila ngwizani ye nkanikinu mia Kikristu.

• Una Lenda Kisonekesa: Mokena yo mfidi a Sikola ya Salu kia Kimfumu.

Sikola ya Longokela Nding’a Kinzenza

• Kuma Yakubikilwa: Muna longa ateleki kimana basamunanga nsangu zambote muna ndinga zakaka.

• Kolo Izingilanga: Ngonde yá yovo tanu. Nkumbu miayingi zikalanga kina kia Sabala mu mene yo zingila ola mosi yovo zole.

• Fulu: Muna Eseka dia Kintinu ziluta vangamenanga.

• Aki Nani Balenda Kisonekesa: Ateleki ana besonganga mbandu ambote, bena ye luzolo lwa samuna nsangu zambote muna ndinga za kinzenza.

• Una Lenda Kisonekesa: Sikola yayi yikubikwanga kuna vula mun’owu wa nsatu za konso nsi.

Atungi a Maseka ma Kintinu

• Kuma Yakubikilwa: Muna sadisa awana betunganga yo vangulula Maseka ma Kintinu. Kana una vo ke sikola ko, muna nkubika yayi awana bekivananga kuna mvevo belongokanga salu ya mpila mu mpila.

• Kolo Izingilanga: Mun’owu wa zingu kia konso muntu ona ukivene kuna mvevo.

• Fulu: Konso fulu kafidilu o muntu kwa Comissão Regional de Construção. Akaka bekivananga muna salu kiaki balenda lombwa vo benda sadisa awana bebwilanga sumbula muna nsi zakaka.

• Aki Nani Balenda Kisonekesa: Mpangi z’akala y’akento avubwa batondwa kwa buka kia akuluntu. Diakala ana bazeye salu kia tunga yovo ve.

• Una Lenda Kisonekesa: Ofwete soneka Petição para o Serviço Voluntário em Construção de Salões do Reino (S-82). Olenda tambula e ndomba yayi kw’akuluntu muna nkutakani.

Sikola ya Salu kia Kimviti a Nzila

• Kuma Yakubikilwa: Muna sadisa aviti a nzila batoma ‘lunganisanga uselo wau.’—2 Tim. 4:5.

• Kolo Izingilanga: Tumingu tole.

• Fulu: Ampangi kuna vula besolanga e fulu; Itoma kalanga muna Eseka dia Kintinu dina lukufi ye zunga kia aviti a nzila.

• Aki Nani Balenda Kisonekesa: Awonso belungisanga mvu amvimba muna salu kia kimviti a nzila a ngonde ke ngonde bebokelwanga vana vau.

• Una Lenda Kisonekesa: Vava aviti a nzila belungisanga mvu amvimba vana vau bebokelwanga kwa nkengi a zunga kiau.

Sikola ya Lubantiku lwa Salu kia Betele

• Kuma Yakubikilwa: E sikola yayi yikubikwanga mu sadisa ampangi ampa kimana bakulukiana ye salu kia Betele.

• Kolo Izingilanga: Ola mosi muna konso lumingu muna ngonde yá.

• Fulu: Betele.

• Aki Nani Balenda Kisonekesa: Ampangi bakivana emvimba muna salu kia Betele yovo mu mvu mosi kaka.

• Una Lenda Kisonekesa: Vava muntu kelungisanga mvu amvimba kuna Betele vana vau obokelwanga.

Sikola ya Salu Kia Kintinu

• Kuma Yakubikilwa: Muna longa akuluntu ye selo ya salu kimana batoma zaya nkubik’a Yave yo sala e salu kiau una ufwene. (Mav. 20:28) E Buka kia Selo Yambuta yau besikidisanga mvu mifwete vioka muna kubika sikola yayi.

• Kolo Izingilanga: Muna mvu miavioka e sikola y’akuluntu lumbu kimosi ye ndambu yavanganga, a selo ya salu lumbu kimosi.

• Fulu: Muna Eseka dia Kintinu yovo Eseka dia Lukutakanu Lwampwena dina lukufi.

• Oma Melombwanga: Awana besalanga se akuluntu yovo selo ya salu.

• Una Lenda Kisonekesa: Akuluntu ye selo ya salu bebokelwanga kwa nkengi a zunga.

Sikola mu Kuma kia Akuluntu a Nkutakania

• Kuma Yakubikilwa: Muna sadisa akuluntu kimana batoma salanga e salu kiau muna nkutakani.

• Kolo Izingilanga: Lumbu tanu.

• Fulu: Vula disolanga fulu; nkumbu miayingi yikalanga muna Eseka dia Kintinu yovo muna Eseka dia Lukutakanu Lwampwena dina lukufi.

• Aki Nani Balenda Kisonekesa: Akuluntu.

• Una Lenda Kisonekesa: E vula divananga mboka kw’akuluntu.

Sikola y’Akengi a Zunga ye Mvivu ye Akazi Aub

• Kuma Yakubikilwa: Muna longa akengi a mvivu ye zunga kimana bakingulanga nkutakani una ufwene yo “funtukinanga muna diambu y’elongi” yo toma vungula ekambi dina muna wisa kiau.—1 Tim. 5:17; 1 Pet. 5:2, 3.

• Kolo Izingilanga: Ngonde zole.

• Fulu: Vula disikidisanga e fulu.

• Aki Nani Balenda Kisonekesa: Akengi a zunga yovo akengi a mvivu.

• Una Lenda Kisonekesa: E vula dibokelanga akengi a zunga ye a mvivu y’akazi au.

Sikola ya Nkand’a Nzambi mu Kuma kia Mpangi z’Akala Ampumpac

• Kuma Yakubikilwa: Muna longa akuluntu ye selo ya salu ampumpa mu tambula kiyekwa kia salu muna nkutakani. Kuna mfoko akaka befilwanga muna zunga ivwidi ateleki ayingi o mfunu muna nsi au. Akaka ana bekivananga kuna mvevo balenda filwa muna nsi za kinzenza.

• Kolo Izingilanga: Ngonde zole.

• Fulu: Vula disolanga fulu; nkumbu miayingi yikalanga muna Eseka dia Kintinu yovo muna Eseka dia Lukutakanu Lwampwena dina lukufi.

• Aki Nani Balenda Kisonekesa: Mpangi z’akala za mpumpa ana bena ye mvu 23 yakuna 62 aya bena yo vimpi wambote, musungula ana bazolele sadila ampangi zau yo wokesa salu kia Kintinu muna zunga ivwidi ateleki ayingi o mfunu. (Maku 10:29, 30) Bafwete kala se akuluntu yovo selo ya salu mu tezo kia mvu miole.

• Una Lenda Kisonekesa: Avo sikola yayi ivangamanga muna zunga kia vula dia nsi aku, o lukutakanu lw’awana bazolele kisonekesa lukala muna lukutakanu lwa zunga. Mambu makaka mezayiswa muna lukutakanu lwalu.

Sikola ya Nkand’a Nzambi mu Kuma kia Akristu Asompad

• Kuma Yakubikilwa: Muna longa Akristu asompa kimana balenda sadilwa una ufwene kwa Yave ye nkubik’andi. Ayingi kuna mfoko a sikola yayi befilwanga mu zunga ivwidi ateleki ayingi o mfunu. Akaka ana bekivananga kuna mvevo balenda filwa muna nsi za kinzenza.

• Kolo Izingilanga: Ngonde zole.

• Fulu: E sikola yayi nkumbu miayingi ivangamene kala kuna Patterson, Centro Educacional da Torre de Vigia, Estados Unidos. Kuna sentu, e sikola yayi yikala mpe muna nsi zakaka. Konso e vula dikubika e fulu ivangamena musungula muna Maseka ma Kintinu yovo muna Maseka ma Lukutakanu Lwampwena.

• Aki Nani Balenda Kisonekesa: Akazi bena ye mvu 25 yakuna 50 aya bena yo vimpi wambote, bakondelo nkakalakani muna kwenda sadila mu zunga ivwidi ateleki ayingi o mfunu; musungula aya balenda tambulwila nze Yesaya vo: “Mono oyu; untuma.” (Yes. 6:8) Vana ntandu, bafwete kala wasompa yo salanga e salu kia ntangwa ke ntangwa mu tezo kia mvu miole mia mvimba.

• Una Lenda Kisonekesa: Avo sikola yayi ikubikwa kuna vula dia nsi aku, o lukutakanu lw’awana bazolele kisonekesa lukala muna lukutakanu lwa lumbu kimosi. Mambu makaka mezayiswa muna lukutakanu lwalu.

Sikola ya Nkand’a Nzambi ya Ngiladi

• Kuma Yakubikilwa: Muna longa salu kia misionario kw’aviti a nzila ye selo yakaka ya ntangwa ke ntangwa.

• Kolo Izingilanga: Ngonde tanu.

• Fulu: Patterson, Centro Educacional da Torre de Vigia, Nova York, Estados Unidos.

• Aki Nani Balenda Kisonekesa: Akazi bavubwa se mvu tatu bena ye kimbuta kia mvu 21 yakuna 38 balenda soneka ndomb’au antete. Bafwete zaya Kingelezo, basompa mu tezo kia mvu miole yo salanga e salu kia ntangwa ke ntangwa mu tezo kia mvu miole miamvimba. Bafwete kala ye mavimpi mambote. Awana besalanga mpe se aviti a nzila muna nsi za kinzenza, (bena muna lutangu lwa Misionario); akengi a zunga ye mvivu; ana besadilanga ku Betele; ana bakota Sikola ya Nkubama ya Uselo; Sikola ya Nkand’a Nzambi mu Kuma kia Mpangi z’Akala Ampumpa ye Sikola ya Nkand’a Nzambi mu Kuma kia Akristu Asompa balenda soneka ndomba zau kele vo balungisi oma melombwanga.

• Una Lenda Kisonekesa: Muna mavula masolwa, o lukutakanu lwa awana bazolele kota sikola yayi lukalanga muna lukutakanu lwa mvivu. Mambu makaka mezayiswanga muna lukutakanu lwalu. Kele vo zolele kota mu sikola yayi, kansi muna lukutakanu lwa mvivu lwa nsi aku ke mukalanga lukutakanu lwalu ko, olenda soneka kuna vula dieno mu lomba luludiku.

Sikola ya Afidi a Mavula y’Akazi Au

• Kuma Yakubikilwa: Muna sadisa ambuta muna mavula batoma lunga-lunganga mavula ma Betele, nkutakani, salu kia akengi a zunga ye a mvivu ye zunga yau, salu kia asekodi, salu kia nieteka yo fila nkanda muna zunga yakaka ye salu yakaka mpe.—Luka 12:48b.

• Kolo Izingilanga: Ngonde zole.

• Fulu: Patterson, Centro Educacional da Torre de Vigia, Nova York, Estados Unidos.

• Aki Nani Balenda Kisonekesa: Awana bena muna Buka kia Afidi a Mavula yovo muna Buka kia Afidi a Salu kia Nsi yovo mpangi osinga tumbikwa muna buka kiaki.

• Una Lenda Kisonekesa: E Buka kia Selo yambuta kibokelanga Afidi a Mavula y’akazi au.

[Mvovo Vana Yand’a lukaya]