Aleke, Nga Nuvavanga Kiyekwa mu Nkutakani?
1. Nkia ntangwa o nleke w’eyakala kafwete yantika sadila luludiku luna muna 1 Timoteo 3:1?
1 ‘O muntu ovo kiyekwa kevava, salu kiambote kazolele.’ (1 Tim. 3:1) E mvovo miami miavumunwinwa, mikasakesanga ampangi zamakala mu kuyifwanisa mu tambula e kiyekwa mu nkutakani. Nga ofwete kala mbuta muna tambula kiyekwa? Diambote kikilu mu vavanga kiyekwa ekolo wakinu nleke. Muna mpila yayi, olenda tambula luludiku yo songa vo okuyifwanisanga mu tumbikwa se selo kia salu vava okituka se mbuta. (1 Tim. 3:10) Avo u nleke w’eyakala wavubwa, aweyi olenda vavila kiyekwa?
2. Aweyi olenda yimina yo songa e fu kia kuyivana kuna mvevo?
2 Kuyivana Kuna Mvevo: Sungamena dio vo salu kiambote ovavanga kansi ke tunda ko. Muna kuma kiaki, kalanga ye luzolo lwa sadisa mpangi zaku mu nkutakani. Imosi muna mpila olenda wo vangila, i tangininanga mbandu ambote a Yesu. (Mat. 20:28; Yoa. 4:6, 7; 13:4, 5) Lomba kwa Yave kasadisa mu vavanga e wete di’akaka. (1 Kor. 10:24) Nga olenda sadisa awana bena vo anunu yovo mbevo muna nkutakani? Nga okuyivananga kuna mvevo mu zenga titi, komba yovo lunga-lunga lekwa yakaka muna viengesa e Seka dia Kintinu? Nga olenda kuyivana kuna mvevo mu lungisa kiyekwa kia muntu akaka muna Sikola ya Salu kia Kimfumu? Okuyivana kuna mvevo mu sadisa akaka, kiese kiayingi dikutwasila.—Mav. 20:35.
3. Ekuma kimwanda kinina o mfunu? Aweyi tulenda kadila akwa kimwanda?
3 Kimwanda: O kala ye kimwanda kiambote i diambu disundidi o mfunu kwa selo ya Yave mu nkutakani ke mu ngangu zau ko yovo ndekwa za vangila e salu. O nkwa kimwanda, obadikilanga mambu nze una Yave yo Yesu bebadikilanga mo. (1 Kor. 2:15, 16) Osonganga e fu ya “mbongo a mwanda.” (Ngal. 5:22, 23) Okalanga yo vema yo sia oma ma Kintinu va fulu kiantete. (Mat. 6:33) Olenda yima e fu ya mwanda muna kalanga ye nkubika yambote ya longi dia ngeye kibeni dia Nkand’a Nzambi. Ediadi divavanga vo watanganga o Nkand’a Nzambi lumbu yawonso, tanganga konso Eyingidilu ye Despertai! kubika malongi yo lungananga muna tukutakanu. (Nku. 1:1, 2; Ayib. 10:24, 25) Vava Paulu kakasakesa o nleke Timoteo mu nungunuka muna mwanda, wasoneka vo: ‘Toma tala elongi diaku.’ (1 Tim. 4:15, 16) Muna kuma kiaki, toma kubamanga vava ovewanga kiyekwa muna Sikola ya Salu kia Kimfumu. Kubamanga yo kwendanga ntangwa zawonso muna salu kia umbangi. Sikidisa makani ma mwanda nze sala se mviti a nzila, sadila kuna Betele yovo kota Sikola ya Nkand’a Nzambi mu Kuma kia Mpangi z’Akala Ampumpa. O kala nkwa kimwanda dikusadisa mu ‘tina maketo ma toko.’—2 Tim. 2:22.
4. Ekuma e ziku ye kwikizi kinina o mfunu?
4 Ziku ye Kwikizi: Wau vo ampangi ana basolwa mu kaya madia muna nkutakani ya tandu kiantete akwa “zitu” bakala, nanga bazayakana vo akwa ziku ye kwikizi. Antumwa ke bakala ye kuma ko mu tokanena e mpila yadi kayilwa e madia. Ediadi diabasadisa mu sia sungididi mu mambu masundidi o mfunu. (Mav. 6:1-4) Muna kuma kiaki, vava ovewanga kiyekwa mu nkutakani, lungisanga kio una ufwene. Tanginina mbandu a Noa ona walemvokela luludiku kavewa mu tunga nzaza. (Etu. 6:22) Yave ozolanga awana besonganga kwikizi, kadi o nkwa kwikizi osonganga vo wazikuka muna mwanda.—1 Kor. 4:2; tala e babu kina yo ntu a diambu: “Nluta mia Tambula Luludiku.”
5. Ekuma aleke Akristu bafwete vavilanga kiyekwa mu nkutakani?
5 Nze una wasakulwa, Yave ozabulanga e salu kia kutika wantu. (Yes. 60:22) Konso mvu mafunda ye mafunda ma wantu bevubwanga. Wau vo wantu ayingi ampa bezayanga e ludi, akala azikuka muna mwanda bavwilu o mfunu muna vita o ntu mu nkutakani. Owau salu kiayingi tuna kiau muna salu kia Yave. (1 Kor. 15:58) Aleke Akristu, nga nuvavanga kiyekwa mu nkutakani? Avo i wau, salu kiambote nuvavanga.
[Mvovo mia Sina muna lukaya lwa 2]
Wau vo, wantu ayingi ampa bezayanga e ludi, akala azikuka muna mwanda bavwilu o mfunu muna vita o ntu mu nkutakani
[Babu kina muna lukaya lwa 3]
Nluta mia Tambula Luludiku
Aleke amakala azikuka bebakanga nluta vava akuluntu bekubavanaga e salu yo kubasonga una balenda kio lungisila. Nkengi a zunga mosi, kuna mfoko a lukutakanu wafonga kuna tenda nkongolo mu kasakesa nteleki mosi. Wamona nleke ayakala watelama vana ndambu andi, wanyuvula kana vo yandi kavingilanga mu mokena yandi. O nleke ayakala wavutula vo kiyekwa kavewa kia velelesa e tenda nkongolo kuna mfoko a konso lukutakanu. O mase mandi bakubama bakala mu kwenda, kansi oyandi kazola kwenda ko lembi lungisa kiyekwa kiandi. O nkengi a zunga wasoba e fulu. Wavova vo: “Akuluntu muna nkutakani yayina bazayanga ludika aleke azikuka muna kubavananga kiyekwa muna nkutakani. Muna kuma kiaki, konso ntangwa yakingulanga e nkutakani yayina, akuluntu batumbikanga nleke ayakala se selo kia salu.”