Tuwokesa Salu Kieto kia Umbangi
1 Paulu wa ntumwa wakasakesa Akristu bakangalelanga muna nzil’a Nzambi yo ‘nungunukina wo vanga.’ (1 Tes. 4:1) Ediadi aweyi disonganga kwa yeto? Disonganga vo tufwete vavanga mpila tulenda wokesela e salu ya mwanda, yo sia ngolo za ‘lunganisa uselo weto.’—2 Tim. 4:5.
2 Dina Dikutufilanga: O luzolo lwa sadila Mvangi eto una ufwene lukutufilanga mu wokesa salu kieto kia umbangi. Tuzolele nungunuka muna mwanda yo vava e mpila ya wokesela salu kieto kia umbangi. O kala ye nkubika ambote dilenda kutusadisa mu sala e salu ya mwanda.—Nku. 1:1, 2; Fili. 4:6; Ayib. 10:24, 25.
3 Muna wokesa salu kieto kia umbangi divavanga vo twayima e fu kia kuyivana kuna mvevo. Muna yima e fu kiaki tufwete sambanga yo tanginina mbandu ambote a Yesu. (Mat. 20:28) Yesu wakala ye kiese kiayingi muna sadila akaka muna salu kiandi kia umbangi. (Mav. 20:35) Tulenda tanginina Yesu muna vwanga akaka o mfunu yo toma sadila konso elau dikutulwakila muna wokesa salu kieto kia umbangi.—Yes. 6:8.
4 Kiyekwa kia Mase: O luzolo lwa sadila akaka yo wokesa salu kieto kia umbangi lulenda longwa kwa wana tuka muna kileke. Aleke betangininanga e mbandu ya esi nzo ya kuyivana yo wokesa salu kiau kia umbangi. Mpangi mosi w’eyakala vava kakala nleke wakasakeswa mu tambula kiyekwa ekolo kasalanga e ntwadi ye nkak’andi muna salu ya nkutakani. Vava kamona o vema ye kiese kia nkak’andi, diamfila mu vava elau dia sadila mpangi zandi. Owau selo kia salu muna nkutakani.
5 Mpangi Zamakala Bavwilu Mfunu: “O muntu ovo [kiyekwa] . . . kevava, salu kiambote kazolele.” (1 Tim. 3:1) E mvovo miami mikasakesanga ampangi zamakala mu kuyifwanisa mu tambula e kiyekwa muna nkubika a Yave. Ke akwa ngangu ko bevavwanga muna tambula kiyekwa. O mpangi ovavanga tambula kiyekwa, osianga e Kintinu va fulu kiantete yo sala e salu kia umbangi yo vema kwawonso. (Mat. 6:33; 2 Tim. 4:5) Osianga ngolo za kala se mbandu ambote kw’akaka.
6 Mu Nza Yawonso: Yave ozabulanga e salu kia kutika wantu. (Yes. 60:22) Diamfunu vo awonso belandanga mbandu a Yesu bawokesa e salu kiau kia umbangi. E nsangu za salu kia mvu wa 2006 zisonganga vo 248.327 ma wantu bavubwa. I sia vo tezo kia 680 lwa wantu ampa bevubwanga konso lumbu. Yambula yeto awonso twakwamanana vava mpila ya wokesela e salu kieto kia umbangi.