E Fu kia Menga Akaka Kifokoka Emvimba
Kana nkutu vo tukatwidi e fu kia menga akaka muna ntima eto, o wantu batuzungidi ke tulenda kubasima ko bayambula songa e fu kiaki. E minkondwa kuma bakinu mengwa yamu wau. Ozevo, aweyi e fu kia menga akaka kilenda fokokela emvimba?
Yave wa Nzambi yandi kaka olenda fokola emvimba e fu kia menga akaka omu nza. E Bibila kisianga o nsilu vo i diau kikilu kevanga o Nzambi.—Ngana 20:22.
NZAMBI OFOKOLA E TUKU DIA FU KIA MENGA AKAKA
1. SATANA WA NKADI AMPEMBA. Satana una vo i mbasi ina yakolamena Nzambi, yandi i tuku dia fu kia menga akaka. Nzambi ofwasa Satana kumosi yo wantu awonso betangininanga e fu kiandi kia menga akaka.—Nkunga 37:38; Roma 16:20.
2. NZA YAMBI YA SATANA. Nzambi osinga fukisa mambu mawonso mefilanga wantu mu mengaziana, kumosi ye fu kia tuyalu kia tambula e mbabu ye afidi a mabundu ana bekasakesanga e fu kia menga akaka. Nzambi ofwasa mpe yinkita yaloko, ikasakesanga e fu kia tambuta mbabu yo mwesa nkangu e mpasi.—2 Petelo 3:13.
3. USUMUKI WA WANTU. E Bibila kivovanga vo wantu awonso mu nza basambukilwa e sumu. E sumu i diau difilanga wantu mu yindula yo vanga mambu mambi. (Roma 5:12) O menga akaka yo kubavanga e mbi i dimosi muna mambu mama. Nzambi osadisa wantu awonso basunda e fu yawonso yambi itukanga muna usumuki, muna mpila yayi, e fu kia menga akaka kifokoka emvimba.—Yesaya 54:13.
BIBILA KISIANGA NSILU VO E FU KIA MENGA AKAKA KIFOKOKA EMVIMBA OMU NZA
1. KE VEKALA DIAKA MUNTU KO OVANGWA MAMBU MALEMBI SONGA. E nza yawonso iyalwa kwa Kintinu kia Nzambi. E kintinu kiaki kuna zulu kiyadila ye kitwasa unsongi wakwele mvu. (Daniele 2:44) E fu kia sia mpambula yo lembi tonda e ngindu za wantu akaka ke kikala diaka ko. Nzambi ofokola mambu mawonso makondwa unsongi bevangwanga o wantu.—Luka 18:7.
2. WANTU AWONSO MU LUVUVAMU BEZINGILA. Ke vekala diaka muntu ko ovangwa diambu diansoki ngatu vita. (Nkunga 46:9) O wantu awonso ova ntoto akwa luvuvamu bekala, ozevo fulu kiambote kikilu kikala muna zingila.—Nkunga 72:7.
3. WANTU AWONSO BEZINGA YAKWELE MVU, BEKALA YE ZINGU KIAMBOTE. Wantu awonso ova ntoto besongaziana o zola. (Matai 22:39) Ke vekala muntu ko omona e mpasi, kana nkutu mpasi za yindula diambu diambi. (Yesaya 65:17) Muna ntangwa yayina, vava e fu kia menga akaka kifokolwa, o wantu “bezingila muna luvuvamu ye kiese kiayingi.”—Nkunga 37:11.
Nga ozolele zingila muna nza yayina? Kana nkutu owau, o wantu mu sunda bena e fu kia menga akaka muna sadila e nkanikinu mia Bibila. (Nkunga 37:8) Ediadi i diau divangamanga kwa mafunda ye mafunda ma Mbangi za Yave omu nza yawonso. Kanele vo fu ya kisi nsi yaswaswana bena yau ye mu mpila zaswaswana basansukila, mu kintwadi bezingilanga ye bezolanga muntu yo nkwandi.—Yesaya 2:2-4.
Mbangi za Yave bena ye kiese kia zayisa kwa akaka una bezizidilanga mambu ma kondwa unsongi ye fu kia sia mpambula. Mana bekulonga malenda kusadisa mu yambula menga akaka yo yantika kubazola. Olongoka una olenda zingila kuna ngemba yo wantu awonso, kana nkutu awana ke bevutulanga matondo ko ye awana bemenganga akwau. Muna mpila yayi, okala ye zingu kiakiese owau, e kikundi kiaku mpe yo wantu akaka kiwokela. Vana ntandu, olongoka mana ofwete vanga muna yalwa kwa Kintinu kia Nzambi, vava e fu kia menga akaka kifokoka yakwele mvu.—Nkunga 37:29.