“Nusola Ona Nusadila”

1. Adieyi tufwete vanga muna kala ye kiese kiakieleka? Ekuma? (Yesaya 48:17, 18)

O SE dieto dia zulu otoma kutuzolanga ye ozolele vo twayangalela e zingu tuka owau yakuna sentu. (Kim. 3:12, 13) Watuvanga ye ngangu za vanga lekwa yayingi yambote. Kansi, katuvana e lendo kia kukiyala ko ngatu lendo kia sola yeto kibeni edi diambote ye edi diambi. (Kim. 8:9; Yer. 10:23) Yave ozeye wo vo yeto wantu muna kala ye kiese kiakieleka, tufwete kunsadila yo lemvokelanga nkanikinu miandi.—Tanga Yesaya 48:17, 18.

2. Adieyi Satana kazolele vo twakwikila? Adieyi Yave kavanga muna songa vo Satana nkwa luvunu?

² Satana ozolele twakwikila vo tulenda kweto kala ye kiese kondwa kwa lusadisu lwa Yave, i sia vo, o wantu balenda kwau kukiyala. (Tuku 3:4, 5) Muna songa vo Satana nkwa luvunu, Yave wayambula vo wantu bakiyala mu fikolo. Ke diampasi ko mu mona vo luyalu lwa wantu lwafunga. Kuna diak’e nsambu, e Bibila kivovelanga akala ye akento ayingi ana bakala ye zingu kiakiese kadi basola sadila Yave. Yesu Kristu yandi wasunda e kiese muna wantu awaya yau awonso. Mu longi diadi, tulongoka e kuma Yesu kasolela sadila Yave ye kuma Yave wa Se dieto dia zulu kafwanukini e nsambil’eto. Kuna mfoko, tufimpulula yaka kuma tusolelanga sadila Yave.

EKUMA YESU KASOLELA SADILA YAVE?

3. O Satana nki kakayila Yesu? O Yesu nki kasola?

³ Vava kakala ova ntoto, Yesu ntangwa zawonso wasonganga vo wasola sadila Yave. Kasikil’owu, vava kavubwa, ke vavioka kolo ko Satana wamvovesa vo okumvana yintinu yawonso ya nza avo unsambidi kana nkumbu mosi kaka. Yesu wavutula vo: “Katuka, e Satana! Kadi diasonama vo: ‘Yave wa Nzambi aku kaka ofwete sambila, yandi kaka ofwete sadila e salu kiavauka.’” (Mat. 4:8-10) Ekuma Yesu kasolela sadila Yave? Yambula twabadika yaka kuma.

4-5. Nkia kuma yankaka yafila Yesu mu sola sadila Yave?

⁴ E kuma kiantete kiafila Yesu mu sola sadila Yave i zola. Elo, Yesu otoma zolanga Se diandi. (Yoa. 14:31) Vana ntandu, Yesu wasola sadila Yave kadi i diambu diansongi diavavanga vo kavanga. (Yoa. 8:28, 29; Lus. 4:11) Ozeye wo vo Yave i Nto a moyo, wafwana bundwa e vuvu ye nkwa ntim’a mvevo. (Nku. 33:4; 36:9; Yak. 1:17) Ntangwa zawonso Yave wavovanga e ludi kwa Yesu yo kumvana yawonso. (Yoa. 1:14) Kansi nswaswani yo Yave, Satana wafila wantu muna sumu yo lufwa. Satana mvuni ye nkwa loko, wete dia yandi kibeni kaka ketokanenanga. (Yoa. 8:44) Wau vo Yesu watoma zaya Yave yo Satana, kazola tanginina Satana ko muna kolamena Yave.—Fili. 2:5-8.

⁵ E kuma kiankaka kiafila Yesu mu sola sadila Yave i zaya e nluta ketambula avo osikidi ye kwikizi. (Ayib. 12:2) Wazaya wo vo avo osikidi ye kwikizi, ovelelesa nkumbu a Se diandi ye oteta e nzila muna fokola e mpasi zawonso katwasa Nkadi ampemba.

EKUMA YAVE KAFWANUKINI E NSAMBIL’ETO?

6-7. Ekuma wantu ayingi o unu ke besadilanga Yave ko? Ekuma tufwete sambidilanga kaka yandi?

⁶ Wantu ayingi o unu ke besadilanga Yave ko, kadi ke bazeye fu yandi ko ye mawonso kevanganga muna wete diau. Ediadi i diau diavangama kwa wantu kuna Atenai ana Paulu wa ntumwa kasamunuina e nsangu zambote.—Mav. 17:19, 20, 30, 34.

⁷ Paulu wasasila kwa nkangu kuna Atenai vo Nzambi a ludi “wavana moyo ye fulumwinu kwa wantu awonso ye lekwa yawonso.” I bosi, wakudikila vo: “Muna yandi i twinina o moyo, diata yo zinga.” Nzambi i Mvangi, “muna muntu mosi kavangila zula yawonso.” Muna kuma kiaki, yandi kaka tufwete sambila.—Mav. 17:25, 26, 28.

8. Nkia diambu o Yave ke singa vanga ko? Aweyi kesongelanga vo ozolanga konso muntu mu yeto?

⁸ Wau vo Yave i Mvangi ye Mfumu a nsema wawonso, wafwana vanga mawonso muna komekena wantu bansadila. Kansi, Yave ke singa dio vanga ko. Vana fulu kia komekena wantu, osonganga e ziku vo yandi una kieleka ye ozolanga konso muntu mu yeto. Ozolele vo wantu ayingi bakala se akundi andi yakwele mvu. (1 Tim. 2:3, 4) Muna kuma kiaki, Yave okutusadisanga kimana twalonganga akaka e kani diandi yo kubazayisa e mambu mambote kesinga vanga mu kuma kia wantu. (Mat. 10:11-13; 28:19, 20) Muna diadi, Yave watuvana nkutakani kimana twansambilanga una ufwene ye akuluntu akwa zola muna kutulunga-lunga.—Mav. 20:28.

9. Mu nkia mpila Yave kezolelanga wantu awonso?

⁹ O zola kwa Yave kumonekanga muna mpila kekadilanga ye awana bekwikilanga vo Nzambi kena ko. Yindula edi: Muna lusansu lwawonso lwa wantu, ndonga vana fulu kia lemvokela Yave, bebakanga e nzengo za vanga mana yau kibeni beyindulanga vo mambi ye mambote. Kana una vo i wau, Yave kuna mvevo wawonso okubavananga ina bevuanga o mfunu muna zingu kiau yo yangalela yo. (Mat. 5:44, 45; Mav. 14:16, 17) Okubavananga e lau dia kala ye akundi, sompa, wuta wana yo vua e nsendo mia salu yau. (Nku. 127:3; Kim. 2:24) Mawonso mama i ziku kisonganga vo Se dieto dia zulu ozolanga wantu awonso. (Luv. 34:6) Yambula twavovela yaka kuma tusolelanga sadila Yave ye una kekutusambulwilanga.

EKUMA TUSOLELANGA SADILA YAVE?

10. (a) Nkia kuma kiantete kikutufilanga mu sadila Yave? (Matai 22:37) (b) Aweyi omonanga mu zaya vo Yave nkwa luzindalalu? (Nkunga 103:13, 14)

¹⁰ Nze Yesu, o zola i kuma kiantete kikutufilanga mu sadila Yave. (Tanga Matai 22:37.) Vava twalongoka e fu yandi, twakituka se akundi a Yave. Kasikil’owu, badika o luzindalalu luna Yave kekutusonganga. Vava Aneyisaele bankolamena, Yave wabadodokela vo: “Dodokolo, nuyambula nzila zeno zambi.” (Yer. 18:11) Kana nkutu vava tusumukanga nkumbu miayingi, Yave okutulolokanga kadi osungamenanga vo tu ntoto. (Tanga Nkunga 103:13, 14.) Vava oyindulanga o luzindalalu lwa Yave ye fu yandi yankaka, nga ke dikufilanga ko mu kunsadila yakwele mvu?

11. Nkia kuma yankaka ikutufilanga mu sola sadila Se dieto dia zulu?

¹¹ E kuma kiankaka kikutufilanga mu sadila Yave i kia sia vo i diambu diansongi divavanga vo twavanga. (Mat. 4:10) Vana ntandu, tuzeye mpe nluta tutambula avo tusikidi ye kwikizi muna Yave. Avo tusikidi ye kwikizi tuvelelesa e nkumbu a Yave, tusonga vo Nkadi ampemba mvuni ye tumwesa e ntima Se dieto e kiese. Avo tusolele sadila Yave tuka owau, tukala ye vuvu kia kunsadila yakwele mvu.—Yoa. 17:3.

12-13. Adieyi tulongokele muna nona kia mpangi Jane yo Pamela?

¹² Tuka muna kileke, tulenda yantika zola Yave yo kwamanana siamisa o zola kwaku ekolo tukulanga. Badika e nona kia mpangi zole zamakento, Jane yo Pamelaa bena vo mbuta yo nleke. Vava bayantika longoka e Bibila, Jane mvu 11 kakala miau, o Pamela mvu 10. Kana una vo se yo ngudi au ke bakala ye luzolo lwa longoka Bibila ko, bavana nswa kwa Jane yo Pamela mu longoka e Bibila ye Mbangi za Yave. Kansi, bavova vo muna nsuk’a lumingu bafwete kwendanga muna nzo a Nzambi ye esi nzo au yawonso. Jane wavova vo: “Mana yalongoka kwa Mbangi za Yave muna Bibila mansadisa mu zizidila e ntonta za akundi ame ana bankomekenanga mu sadila droga yo kuyivana muna mavangu ma zumba.”

¹³ Ke vavioka mvu miayingi ko, yau awole bakituka se ateleki yo vubwa. Kuna kwalanda, bayantika sala se aviti a nzila ye basadisanga mpe mase mau ana bakala se anunu. Ekolo keyindulanga mawonso mana Yave kavanga muna wete diau, Jane wavova vo: “Yamona vo Yave osadisanga akundi andi. Nze una uvovanga 2 Timoteo 2:19, ‘Yave ozeye awana bavuilu kwa yandi.’” Kalukatikisu ko vo Yave osadisanga awana bekunsadilanga kuna zola.

14. Aweyi tulenda tanina e nkumbu a Yave muna mvovo ye mavangu meto? (Tala mpe mafoto.)

¹⁴ Tuzolele sadisa wantu akaka bazaya wo vo mambu mayingi belongwanga mu kuma kia Nzambi, ma luvunu. Badika e nona eki: Ngeye una ye nkundi ambote, nkwa ngemba, nkwa ntima mvevo ye nloloki. Lumbu kimosi owidi muntu ovovanga vo nkundi aku nkwa nsoki ye ke nkwa ziku ko. Adieyi ovanga? Kalukatikisu ko vo tanina okuntanina. Diau dimosi mpe, vava Satana ye awana bena muna wisa kiandi bevavanga safula e nkumbu a Nzambi, i sia vo, bemwanganesanga luvunu mu kuma kiandi, oyeto tutaninanga e nkumbu andi muna samuna e ludi mu kuma kia Yave. (Nku. 34:1; Yes. 43:10) Muna mvovo ye mavangu meto tusonganga vo tuzolanga Yave yo kunsadila ye nsi a ntima yawonso.

15. Nkia nluta katambula o Paulu wa ntumwa vava kavanga e nsobani muna zingu kiandi? (Filipi 3:7, 8)

¹⁵ Tukalanga twakubama mu soba makani meto muna zingu kimana twasadila Yave una ufwene. Kasikil’owu, muna kituka se nlandi a Kristu yo sadila Yave, Paulu wa ntumwa wabembola e fulu kia tunda muna nsambil’a Kiyuda. (Ngal. 1:14) Nkia nluta katambula? Wavua nsambu zayingi muna salu kia Yave yo vewa e lau dia yala kumosi yo Kristu kuna zulu. Paulu kayibanza ko muna nzengo za sadila Yave kabaka, oyeto mpe ke tusinga kuyibanza ko.—Tanga Filipi 3:7, 8.

16. Adieyi tulongokele muna nona kia mpangi Julia? (Tala mpe mafoto.)

¹⁶ Avo tusidi salu kia Yave va fulu kiantete muna zingu kieto, nsambu zayingi tutambula tuka owau yakuna sentu. Badika e nona kia mpangi ankento una ye nkumbu Julia. Vitila kazaya e ludi, vava kakala dumbelele nyimbidi kakala muna buka kia ayimbidi a dibundu. Nyimbidi mosi vava kamona vo Julia ozeye yimbila, wayantika kunlonga e ndekwa za yimbidila. Ke vavioka kolo ko, Julia wakituka se nkwa tunda ye wayimbidilanga muna fulu itomene zayakana. Ekolo katangilanga muna sikola mosi ya longokela yimbila yatoma zayakana, nkwandi mosi a sikola wayantika kunzayisa oma ma Nzambi ye wansasila vo Nzambi una ye nkumbu, i sia vo, Yave. Ke vavioka kolo ko Julia wayantika longoka Bibila nkumbu miole muna lumingu. Kuna kwalanda, wabaka nzengo za sadila e zingu kiandi muna salu kia Yave ke mu salu kia miziki ko. Diampasi kikilu diakala mu baka e nzengo zazi. Julia wavova vo: “Wantu ayingi bampovesa vo salu kiame yafwasanga. Kansi, yazola sadila e zingu kiame muna salu kia Yave.” Aweyi o mpangi kemonanga mu kuma kia nzengo zina kabaka se vioka mvu 30? Wavova diaka vo: “Ngina ye luvuvamu lwa ntima ye vuvu vo kuna sentu, Yave olungisa e zolela yawonso ya ntim’ame.”—Nku. 145:16.

KWAMANANA SADILA YAVE

17. Ekuma dinina o mfunu mu zaya e kolo tuzingilanga?

¹⁷ Ku mfoko a lumbu yambaninu a nza yayi tuzingilanga. Paulu wa ntumwa wasoneka vo: “Kadi ‘kolo kiakete kaka kisidi,’ ‘ndiona okwizanga olwaka, ke zingila ko.’” (Ayib. 10:37) Ekuma dinina o mfunu mu zaya ediadi? Kadi e kolo kisidi kwa wantu mu baka e nzengo za sadila Yave, kiankufi kikilu. (1 Kor. 7:29) Avo twakibakila kala e nzengo za sadila Yave, tulenda kala ye vuvu vo e mpasi tusinga zizidila, za “kolo kiakete kaka” zikala.

18. Adieyi o Yave yo Yesu bazolele vo twavanga?

¹⁸ Yesu wakasakesa wantu bakituka se alandi andi ye bakwamanana kunlanda. (Mat. 16:24) Muna kuma kiaki, avo se mvu miayingi osadilanga Yave, vanganga mawonso olenda mu lembi vutuka manima. Yeto awonso tufwete vanganga e ngolo kimana twakwamanana tatidila e nzengo twabaka za sadila Yave. Kana una vo ke diasazu ko, e nzengo zazi kiese kiayingi ye nsambu zayingi zitwasa, kana nkutu tuka owau.—Nku. 35:27.

19. Nkia diambu tulongokele muna nona kia mpangi Gene?

¹⁹ Akaka beyindulanga vo kele vo babakidi e nzengo za sadila Yave ke bekala ye luvevoko ko muna zingu kiau. Avo u nleke, nga oyindulanga vo vena ye malau ovidisa mu kuma kia sadila Yave? Mpangi mosi wanleke una ye nkumbu Gene wavova vo: “Yamonanga vo okala se Mbangi a Yave diakala se nkaku kwa mono. Yamonanga vo aleke ayingi ana yakula yau batoma yangalelanga e zingu ekolo bavanganga mambu mayingi, nze kwenda muna nkinzi, banda kimakangu yovo sakana e nsaka za nsoki muna videogames. Kansi omono . . . yayendanga kaka muna tukutakanu ye muna salu kia umbangi.” E ngindu zazi nkia diambu zavanga muna zingu kia Gene? Wavova vo: “Yayantika nata e zingu kia disu ku nsi a lukaya. Yakala ye kiese mu fikolo. Kansi, kiakala ye kiese kiakieleka ko. Yayantika yindula e nluta mia lemvokela e nkanikinu mia Bibila. Muna diadi yabaka e nzengo za yantika sadila Yave ye nsi a ntima. Tuka muna kolo kiakina, imonanga vo Yave ovananga e mvutu za sambu yame.”

20. Nkia nzengo tufwete baka?

²⁰ Ntozi a nkunga wayimbidila Yave vo: “Kiese kwa muntu ona osolele yo kuntwasa oku wina kakala muna yanzala yaku.” (Nku. 65:4) Yambula twabaka e nzengo za kwamanana sadila Yave. Nze Yosua, tuzolele vova vo: “Vo i mono ye esi nzo ame, Yave tusadila.”—Yos. 24:15.