Nga Nkadi Ampemba Una Kieleka?

Mvutu za Bibila

Ingeta, Nkadi ampemba una kieleka. Yandi i “nyadi a nza,” ona wakituka se vangwa kiambi kia mwanda yo telamena Nzambi. (Yoane 14:30; Efeso 6:11, 12) Bibila kisenzekanga kiwuntu ye mazina ma Nkadi ampemba nze una usonganga e sono ilende.

• Nkumbu Satana, ina ye nsasa vo “Mbeni.”—Yobi 1:6.

• Nkumbu Nkadi ampemba, ina ye nsasa vo “Nkumbi.”—Lusengomono 12:9.

• Nkumbu Nioka, mun’owu wa Bibila ina ye nsasa vo “Mvuni.”—2 Korinto 11:3.

• Mpukumuni.—Matai 4:3.

• Nkwa luvunu.—Yoane 8:44.

Satana ke lubantiku lwambi ko

Wantu ankaka bevovanga vo Satana wa Nkadi ampemba i mbi ina muna kati kweto. Kansi, Bibila kiyikanga e moko kia Nzambi yo Satana. Wau vo Nzambi muntu walunga, kadi mokena ye ndambu andi yambi ko. (Nsiku 32:4; Yobi 2:1-6) Diau dimosi mpe, Satana wantonta Yesu ona kakala ye sumu ko. (Matai 4:8-10; 1 Yoane 3:5) Ozevo, Bibila kisonganga vo Nkadi ampemba muntu kieleka, ke mbi ko ina muna kati kwa wantu.

Nga tufwete sivika wau vo wantu ayingi ke bekwikilanga ko vo Nkadi ampemba una kieleka? Ve, kadi Bibila kivovelanga e ntambu Satana kesadilanga muna lungisa makani mandi. (2 Tesalonika 2:9, 10) Ovonda meso ma wantu muna kimwanda, i ntambu ketoma sadilanga mu vukumuna wantu kimana balenda kwikila vo una kieleka.—2 Korinto 4:4.

Ngindu zabendomoka mu kuma kia Nkadi ampemba

Luvunu: Lúcifer i nkumbu ankaka ya Nkadi ampemba.

Ludi: O mvovo wa Kiyibere “Lúcifer,” wasekolwa mu nsekola zankaka za Bibila, una ye nsasa vo “nkezimi.” (Yesaya 14:12) E mvovo mivitidi ye mina milende mu sono kiaki, misonganga vo mvovo wau uyikanga luvila lwa atinu a Babele ana bakala vo akwa lulendo ye badi kululwa kwa Nzambi. (Yesaya 14:4, 13-20) O mvovo wau, “nkezimi,” wasadilwa muna veza atinu a Babele vava kintinu kiaki kiabwa.

Luvunu: Satana osadilanga Nzambi nze “kimpovela kia mfundi.”

Ludi: Nkadi ampemba mbeni a Nzambi, ke selo kiandi ko. Satana wa Nkandi ampemba otelamenanga yo yika mfundu mialuvunu mu kuma kia awana besadilanga Nzambi.—1 Petelo 5:8; Lusengomono 12:10.