Yave ke kubadikila ko vo u ntovoki avo kulendele lungisa ko e kani dina wasikidisa. (2 Kor. 8:12) Longoka diambu avo nkakalakani zilwakidi. Yindulanga makani mana walungisa kala. E Bibila kivovanga vo “Nzambi kakondelo unsongi ko kavilakana e salu kieno.” (Ayib. 6:10) Ngeye mpe vanga diau adimosi. Sungamenanga mana walungisa kala nze, ngwizani aku yambote yo Yave, osamunanga oma ma Yave kwa akaka yo luvubu lwaku. Wauna walendela nungunukina muna mwanda yo lungisa makani mama, kala ye ziku vo olenda mpe lungisa makani mana osikidisi. Muna lusadisu lwa Yave olenda lungisa makani maku. Vavanga bakula una Yave kekusadisilanga, muna mpila yayi okala ye kiese ekolo ovanganga e ngolo muna lungisa makani maku. (2 Kor. 4:7) Muna kuma kiaki avo kuyoyele ko, nsambu zayingi ovua.—Ngal. 6:9. w23.05 31 ¶16-18

Yave ovavanga mpila za songela kwa awana kezolanga vo okubayangalelanga. Muna Bibila nkumbu miole kavovesa Yesu vo Mwan’andi anzolwa, Mwan’andi ona keyangalelanga. (Mat. 3:17; 17:5) Aweyi omona kele vo Yave uvovese vo okuyangalelanga? Yave ke kutuvovesanga ko tuka kuna zulu, kansi okutuvoveselanga muna Diambu diandi. Tulenda “wá” nding’a luyangalalu lwa Yave vava tutanganga e mpila Yesu kavovesela alongoki andi vo okubazolanga. Yesu watanginina kiwuntu kia Se diandi mu mpila yalunga. Muna kuma kiaki, vava tutanganga mvovo mia Yesu mina kasongela edienga kw’alandi andi akwa kwikizi kana una vo wantu alembi lunga bakala, tulenda bakula vo Yave diau dimosi mpe kevovanga kwa yeto. (Yoa. 15:9, 15) Vava tukalanga mu mpasi ke disonganga ko vo Nzambi ke kutuyangalelanga diaka ko. Kansi, e mpasi zikutuvananga e lau mu songa vo tutoma zolanga Yave yo kumbunda e vuvu.—Yak. 1:12. w24.03 28 ¶10-11

Avo u se, sadisa wan’aku bakubikanga e mvutu mun’owu wa ntela au. Ezak’e ntangwa, mambu nze, lukazalu ye fu ya nkal’ambote metoma vovelwanga mu longi, kansi valenda kala ye tini yankaka ina wan’aku balenda vanina e mvutu. Sadisanga mpe wan’aku babakula vo ke ntangwa zawonso ko bezangula o moko besolwa mu vana e mvutu. O bakula e diambu diadi, dikubasadisa mu lembi kendalala avo ke basolelo ko mu vana e mvutu. (1 Tim. 6:18) Yeto awonso tulenda kubika e mvutu zina zilenda kumika mpangi zeto yo twasa nkembo kwa Yave. (Nga. 25:11) Ekolo tuvananga e mvutu, ezak’e ntangwa tulenda yika nona kiankufi kia diambu diatubwila kala, kansi tufwete venga e fu kia vova kwayingi mu kuma kia yeto kibeni. (Nga. 27:2; 2 Kor. 10:18) Tuzolele vanga mawonso muna fila akaka basia e sungididi muna Yave, muna Diambu diandi ye muna nkangu andi.—Lus. 4:11. w23.04 24-25 ¶17-18