Yave ovavanga mpila za songela kwa awana kezolanga vo okubayangalelanga. Muna Bibila nkumbu miole kavovesa Yesu vo Mwan’andi anzolwa, Mwan’andi ona keyangalelanga. (Mat. 3:17; 17:5) Aweyi omona kele vo Yave uvovese vo okuyangalelanga? Yave ke kutuvovesanga ko tuka kuna zulu, kansi okutuvoveselanga muna Diambu diandi. Tulenda “wá” nding’a luyangalalu lwa Yave vava tutanganga e mpila Yesu kavovesela alongoki andi vo okubazolanga. Yesu watanginina kiwuntu kia Se diandi mu mpila yalunga. Muna kuma kiaki, vava tutanganga mvovo mia Yesu mina kasongela edienga kw’alandi andi akwa kwikizi kana una vo wantu alembi lunga bakala, tulenda bakula vo Yave diau dimosi mpe kevovanga kwa yeto. (Yoa. 15:9, 15) Vava tukalanga mu mpasi ke disonganga ko vo Nzambi ke kutuyangalelanga diaka ko. Kansi, e mpasi zikutuvananga e lau mu songa vo tutoma zolanga Yave yo kumbunda e vuvu.—Yak. 1:12. w24.03 28 ¶10-11

Avo u se, sadisa wan’aku bakubikanga e mvutu mun’owu wa ntela au. Ezak’e ntangwa, mambu nze, lukazalu ye fu ya nkal’ambote metoma vovelwanga mu longi, kansi valenda kala ye tini yankaka ina wan’aku balenda vanina e mvutu. Sadisanga mpe wan’aku babakula vo ke ntangwa zawonso ko bezangula o moko besolwa mu vana e mvutu. O bakula e diambu diadi, dikubasadisa mu lembi kendalala avo ke basolelo ko mu vana e mvutu. (1 Tim. 6:18) Yeto awonso tulenda kubika e mvutu zina zilenda kumika mpangi zeto yo twasa nkembo kwa Yave. (Nga. 25:11) Ekolo tuvananga e mvutu, ezak’e ntangwa tulenda yika nona kiankufi kia diambu diatubwila kala, kansi tufwete venga e fu kia vova kwayingi mu kuma kia yeto kibeni. (Nga. 27:2; 2 Kor. 10:18) Tuzolele vanga mawonso muna fila akaka basia e sungididi muna Yave, muna Diambu diandi ye muna nkangu andi.—Lus. 4:11. w23.04 24-25 ¶17-18

Muna kwamanana lungalala yo yingila, o zola mfunu kikilu kwina. (Mat. 22:37-39) O zola muna Nzambi, kukutusadisanga mu kwamanana zindalala muna salu kia umbangi kiakala nkia diambu diampasi dilenda kutubwila. (2 Tim. 1:7, 8) Wau vo tuzolanga o wantu kana nkutu awana ke besambilanga Yave ko, tukwamanananga sila umbangi, muna telefone yo soneka e nkanda. Ke tudimbulanga vuvu ko vo vekala ye lumbu e mfinangani zeto besoba yo vanga edi diansongi. (Yez. 18:27, 28) Tuzolanga mpe e mpangi zeto. Tusonganga o zola muna “kasakesanga yo kumika muntu yo nkwandi.” (1 Tes. 5:11) Nze masoladi besalanga kumosi muna nuana, oyeto tukasakesanga muntu yo nkwandi. Ke tulwekanga mpangi zeto ko kuna lukanu yovo kubavutula e mbi. (1 Tes. 5:13, 15) Tusonganga mpe o zola muna zitisanga e mpangi zeto ana bevitanga o ntu muna nkutakani.—1 Tes. 5:12. w23.06 10 ¶6; 11 ¶10-11