Aweyi Olenda Zayila Nsambila Aludi?

MABUNDU mayingi mevovanga vo malongi mau kwa Nzambi metukanga. Kansi, diamfunu twawa e mvovo mia Yoane wa ntumw’a Yesu ona wasoneka vo: “Azolwa, ke nukwikila mianda miawonso ko, nutont’ak’e mianda, kana mia Nzambi: kadi ngunza zingi zaluvunu zavaik’omu nza.” (1 Yoane 4:⁠1) Aweyi tulenda tontela yovo fimpila e diambu mu zaya kana vo kwa Nzambi ditukidi?

Konso dina dituka kwa Nzambi, kiwuntu kia Nzambi disonganga, musungula nkal’andi eyi isundidi, zola. Kasikil’owu, mazunu meto mekutusadisanga mu wa e nsunga za titi ye mvuma, ye za mbolo zatiya, i ziku kia zola kwa Nzambi. O meso mekutumwesanga e ndimuk’a ntangwa ye lumbemba-mbemba yovo mona tusevo twa kingyana-ngyana, mawonso mama mesonganga zola kwa Nzambi eto. Diau adimosi mpe ye matu, mekutusadisanga mu wa nkunga mia nuni, miziki miambote, yovo nding’a nzolw’eto. Kana una vo tu’asumuki, tubakanga e nluta muna zola kwa Nzambi. Ediadi disonganga e ziku kia mvovo mia Yesu vava kavova vo: “Edi diviokele e nsambu, dia vana, ke mu tambula ko.” (Mavangu 20:​35) Tusongang’o zola kadi mu “mpw’a Nzambi” twavangilwa. (Etuku 1:​27) Kana una vo Yave una ye fu yayingi, o zola i nkal’andi ilutidi.

Nkanda watuka kwa Nzambi ufwete songanga o zola kwandi. Mabundu ma nza yayi mavwidi ulolo wa sono yankulu. Nga yitoma songanga o zola kwa Nzambi?

E ludi kia diambu i kiaki, ulolo wa sono yoyo yankulu ke yisonganga zola kwa Nzambi ko kuna kwa yeto ye mpila tulenda zolela Nzambi. Muna kuma kiaki, mazunda ma wantu ke betambulanga mvutu ko vava beyuvulanga: “Wau vo Nzambi nkwa zola, ekuma tumwenanga e mpasi?” Nkand’a Nzambi kaka usonganga o zola kwa Nzambi. Ukutulonganga mpe e mpila tulenda songela o zola muna mavangu.

Nkanda Usengomonanga Zola kwa Nzambi

Nkand’a Nzambi uyikilanga Yave vo “Nzambi a zola.” (2 Korinto 13:​11) Nkand’a Nzambi usonganga una zola kwafidila Yave mu vana e yakala yo nkento antete zingu kiambote, kiakondwa mayela ngatu lufwa. Kansi, o kolamena wisa kia Nzambi kwatwasa mpasi kwa wantu. (Nsiku 32:​4, 5; Roma 5:​12) Muna vutulwisa zingu kiambote kina bavidisa, Yave wavanga diambu. Nkand’a Nzambi uvovanga vo: “Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoane 3:​16) E sono yavelela yisonganga vo o zola kwa Nzambi kuna kwa wantu ke kwavola ko, kadi wasikidisa luyalu lwalunga luyalwa kwa Yesu Kristu mu vutulwisa luvuvamu kwa wantu alemvoka.​—⁠Daniele 7:​13, 14; 2 Petelo 3:⁠13.

Nkand’a Nzambi usonganga e mbebe kena yau o muntu mu mvovo emi: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe. Una wezole ufwananini, i wau wuwu, Zola nkw’aku, konso un’okuzolela. Muna nkanikinu miau amiole mumanamenang’o nsiku wawanso.” (Matai 22:​37-40) Nkand’a Nzambi uvovanga vo kwa Nzambi wavumunwinwa. Wau vo kiwuntu kia Nzambi usonganga, tulenda kala ye ziku vo kwa “Nzambi a zola” watuka.​—⁠2 Timoteo 3:⁠16.

Muna sadilanga nkanda wau i tulenda zayila nkia sono yankulu yatuka kieleka kwa Nzambi. O zola mpe kuswaswanesanga asambidi aludi, kadi Nzambi betangininanga muna songa zola.

Aweyi Olenda Zayila Asambidi Aludi?

Awana beyangalelanga nsiku mia Nzambi, baswaswana kikilu, musungula mu lumbu yayi ‘yambaninu.’ O wantu bakitukidi “akwa kuzola, minzola-nzimbu, . . . azodi ekembo ke mu Nzambi ko.”​—⁠2 Timoteo 3:​1-4.

Aweyi olenda zayila wantu bezolanga Nzambi? Nkand’a Nzambi uvovanga vo: “I yau yiyi e nzol’a Nzambi, tulunda nkanikinu miandi: e nkanikinu miandi ke miampasi ko.” (1 Yoane 5:⁠3) O zola Nzambi, i kufilanga wantu mu zitisa nsiku mia Nkand’a Nzambi. Kasikil’owu, muna Nkand’a Nzambi tulenda mona e nsiku mu kuma kia kiyakala ye kinkento yo longo. Awana basompana kaka bena yo nswa wa vukana. O longo mpe ka lufwete vambana ko. (Matai 19:9; Ayibere 13:⁠4) Nkento mosi wakota sikola ya kimpelo kuna Espanha, vava kayenda kuna lukutakanu lwa Mbangi za Yave yo mona una balongokelanga nsiku mia nkal’ambote mina mu Nkand’a Nzambi, wavova vo: “O lukutakanu lwalu lunkumikini kikilu, ke mu kuma kia malongi ma Nkand’a Nzambi kaka ko, kansi ye ngwizani ikalanga vana kati kwa nkangu wau ye fu yau yambote.”

Akristu akieleka ke besonganga kaka zola kwa Nzambi ko, kansi besonganga mpe o zola kwa mfinangani zau. E salu kisundidi o mfunu kuna kwa yau i zayisa kwa wantu oma ma Kintinu kia Nzambi, kina vo i vuvu kimosi kaka bavwidi o wantu. (Matai 24:​14) Ka vena diambu dilenda twasa nluta wakwele mvu kwa mfinangani zeto ko, ovo ke kubasadisa ko bavwa o zayi mu kuma kia Nzambi. (Yoane 17:⁠3) Akristu akieleka besonganga mpe zola kwau mu mpila yakaka. Bevananga lusadisu kw’awana bekalanga mu mpasi. Kasikil’owu, vava kiabwa nzakam’a ntoto kuna nsi ya Itália, zulunalu ya nsi yayina yasoneka mu kuma kia Mbangi za Yave vo: “Basadisa awana bakala mu mpasi. Bavanga wo lembi tala e dibundu dia muntu.”

Vana ntandu a zola bena kwau kuna kwa Nzambi ye kwa mfinangani zau, Akristu akieleka bezolaziananga mpe. Yesu wavova vo: “Nkanikinu ampa ikunusia, nuzolaziana; e nzola inuzolele, i nuzolaziananga. Muna wau i bezayil’o wantu awonso vo nu alongoki ame, ovo nzolani nuna yau.”​—⁠Yoane 13:​34, 35.

Nga zola besongaziananga Akristu akieleka kwaswaswana? I wau kikilu, nze una kamona nkento mosi oyikilwanga vo Ema, ona wasadilanga kuna mbanza La Paz, Bolívia. Kuna nsi yayina, e fu kia swaswanesa makanda kifilanga mpe wantu mu sia mpambani vana vena amvwama ye asukami. Wavova vo: “E nkumbu antete yayenda kuna lukutakanu lwa Mbangi za Yave, yamona yakala dimosi diatoma vwata wafonga vana ndambu a nkento mosi wa mwisi Índia yo mokena yandi. Kisidi mona evangu dia mpila yayi ko. Muna lumbu kiakina, yazaya wo vo owau i nkangu a Nzambi.” Diau adimosi, nkento mosi kuna Brasil oyikilwanga vo Miriam wavova vo: “Kiazayanga ko una ndenda kadila ye kiese, kana nkutu vana vena yitu yame. E lumbu kiantete yamona zola kusongelwanga mu mavangu, i kina yakala vana vena Mbangi za Yave.” Mfumu mosi a nzo ya televizau kuna Estados Unidos, wasoneka vo: “Kele vo wantu bazingilang’e ngwizani nze una ulonganga lukwikilu lweno, e zula kiaki ke kiadi lwaka una kilweke ko. I mwangi a nsangu kwame, ntomene wo zaya vo e nkubik’eno mu zola yikangalelanga ye lukwikilu lwasikila kuna kwa Mvangi.”

Vava e Nsambila Aludi

Zola i sinsu kiswaswanesanga nsambila aludi. Yesu watezanisa nsambila aludi ye nzila yasikila. I nzila mosi kaka ifila ku moyo a mvu ya mvu. Yesu wavova vo: “Nukotela muna mwelo ambatakani: kadi o mwelo wasâdila, e nzila mpe yasanzuka, ina ya lubukumuku, engi bena, ana bekotela mo. Kadi o mwelo wambatakani, e nzila mpe yamfinangani, ina ya moyo, ke bengi ko ana besolola yo.” (Matai 7:​13, 14) Buka kimosi kaka ki’Akristu akieleka kikangalanga kumosi yo Nzambi muna nzila ya nsambila aludi. Muna kuma kiaki, ofwete toma keba muna sola e dibundu. Avo solwele e nzila yoyo yo diatila mo, osolola nzila isundidi owete muna zingu, kadi i nzil’a zola.​—⁠Efeso 4:​1-4.

Se yindudi e mpila kiese olenda kala kiau mu kangalela muna nzila ya nsambila aludi! Dina nze ngeye okangalanga kumosi yo Nzambi. O Nzambi olenda kulong’o zola yo kuvana e ngangu zina zilenda kusadisa mu kala ye ngwizani ambote y’akaka. Olenda kulonga mfunu a zingu, olenda zaya nsilu mia Nzambi ye vuvu kia kusentu. Kukuyibanza ko vava osolola e nsambila aludi.

[Mvovo mia Fwaniswa mina muna lukaya lwa 3]

Vana vena nkanda miankulu mia mabundu, Nkand’a Nzambi kaka uzayisanga zola kwa Nzambi

[Mvovo mia Fwaniswa mina muna lukaya lwa 5]

Akristu akieleka bezayakananga e kuma kadi zola besonganga