Тесалоникалыктарга 1-кат
2 Боордошторум, силерге барганыбыз куру бекер болбогонун билесиңер.+ 2 Өзүңөр билгендей, адегенде Филипиде+ азап чегип, кордук көргөнбүз, бирок Кудайыбыз жардам бергендиктен, кайраттанып, силерге анын жакшы кабарын катуу каршылыкка карабай* жарыялаганбыз.+ 3 Силерге айткандарыбыз жалган эмес, аларды арам ниет менен же силерди алдаш үчүн айтып жаткан жокпуз. 4 Бизге жакшы кабарды жарыялоо ишин Кудай өзү ишенип тапшыргандыктан, биз аны адамдарга жагыш үчүн эмес, жүрөгүбүздү сынаган Кудайга жагыш үчүн айтып жатабыз.+
5 Чынында эле, өзүңөр билгендей, силерден бир нерсе өндүрүш үчүн эч качан анткорлонгон эмеспиз, силерге эч качан кошомат да кылган эмеспиз.+ Буга Кудай күбө! 6 Эч кимдин: силердин да, башкалардын да бизди даңктап-мактап, өзгөчө мамиле кылышын каалаган эмеспиз. Машаяктын элчилери катары биз силерди бир топ чыгым кыла алмакпыз, бирок анткен эмеспиз.+ 7 Кайра, балдарын эмизип, бөпөлөп баккан энедей болуп, жумшак мамиле кылганбыз. 8 Силерге өзгөчө ынак болуп, абдан жакшы көрүп калгандыктан+ силерге Кудайдын жакшы кабарын айтып эле койбостон, жаныбызды да бергенге даяр болчубуз.+
9 Бир туугандарым, биздин бүт күчүбүздү жумшап, оор эмгектенгенибизди жакшы билесиңер. Силерге Кудайдын жакшы кабарын айтканыбызда эч кимиңерге жүк болбош үчүн күнү-түнү иштеп, өз чыгымыбызды өзүбүз жапканбыз.+ 10 Боордошторум, силердин араңарда жүргөндө ишенимдүү, адил, кемчиликсиз болгонубузга өзүңөр күбөсүңөр, буга Кудай да күбө. 11 Өзүңөр жакшы билгендей, биз силерге атасы балдарына мамиле кылгандай мамиле кылып,+ ар бириңерди насааттаганбыз,+ сооротуп-жубатып, акыл айтканбыз, 12 өзүнүн Падышалыгына жана даңкына үлүштөш болгонго чакырган+ Кудайга жаккандай жашаганга үндөгөнбүз.+
13 Силер бизден уккан Кудайдын сөзүн адамдын эмес, Кудайдын сөзүндөй кабыл алганыңар үчүн, ага дайыма ыраазычылык билдиребиз.+ Чынында эле, ал — Кудайдын сөзү; ал силерге таасир этип жатат. 14 Бир туугандарым, силер Кудайдын Жүйүт жериндеги жыйналыштарындагы бир туугандарыбыздай болдуңар. Машаяк Исанын жолун жолдогону үчүн алар жүйүттөрдөн кордук көргөндөй эле, силер да мекендештериңерден кордук көрдүңөр.+ 15 Жүйүттөр пайгамбарларды, атүгүл Мырзабыз Исаны өлтүрүшкөн,+ бизди куугунтукташкан.+ Анысы аз келгенсип, Кудайга жакканды кылышпай, бардык адамдарга зыян келтирип жатышат. 16 Анткени алар, башка элдер да куткарылышы үчүн кабар айтканыбызда, бизге тоскоолдук кылганга аракеттенип,+ күнөөсүн көбөйтүп жатышат. Бирок жакында аларга Кудайдын каары сөзсүз төгүлөт.+
17 Боордошторум, силер менен убактылуу жүзмө-жүз көрүшпөй калганда, дайыма оюбузда болдуңар. Жүзүңөрдү көргөнгө ушунчалык куштар болгондуктан силерге жолукканга бүт күчүбүз менен аракет кылдык. 18 Силерге баргыбыз келгендиктен, мен, Пабыл, барайын деп эки жолу чыгындым, бирок Шайтан бут тосуп жатты. 19 Мырзабыз Иса кайра келген убакта* анын алдында сыймыктана турган үмүтүбүз, кубанычыбыз же таажыбыз ким болот? Силер эмеспи?+ 20 Ооба, биздин сыймыгыбыз да, кубанычыбыз да силерсиңер.