Башталыш

40 Бир нече убакыт өткөндөн кийин, Мисир падышасынын башкы шарап сунуучусу+ менен башкы наабайчысы падышанын алдында айыптуу болуп калышты. 2 Ошондо Мисир падышасы, фараон, ал эки кызматчысына: шарап сунуучулардын башчысы менен наабайчылардын башчысына+ каарданып, 3 аларды фараондун сакчыларынын башчысынын+ үйүндөгү түрмөгө, Жусуп жаткан жерге, каматып койду.+ 4 Сакчылардын башчысы Жусупту алардын жанында болуп, аларга кызмат кылганга дайындады.+ Ошентип, алар бир нече убакыт камакта болушту.

5 Бир жолу түн ичинде Мисир падышасынын түрмөдө отурган шарап сунуучусу менен наабайчысы түш көрүштү. Ар биринин түшүнүн өзүнчө мааниси бар эле. 6 Жусуп эртең менен келип, алардын маанайы пас экенин көрдү. 7 Анан экөөнөн: «Эмнеге бүгүн кабагыңар салыңкы?» — деп сурады. 8 Тигилер: «Биз түш көрдүк, бирок түшүбүздү жоруп берер киши жок»,— дешти. Жусуп аларга: «Түштү Кудай гана чечмелей алат эмеспи.+ Кандай түш көргөнүңөрдү айтып бергилечи»,— деди.

9 Ошондо шарап сунуучулардын башчысы Жусупка: «Түшүмдө жүзүм сабагын көрдүм. 10 Анын үч бутагы бар экен, алар бүчүр байлап, гүл ачты. Анан мөмөлөрү бышты. 11 Мен жүзүмдү алып, колумда кармап турган фараондун чөйчөгүнө сыктым да, чөйчөктү фараонго сундум»,— деди. 12 Ошондо Жусуп: «Бул түштүн мааниси мындай: үч бутак үч күндү билдирет. 13 Үч күндөн кийин фараон сени бошотуп, кайрадан мурунку ордуңа коёт.+ Ошондо мурункудай эле фараонго чөйчөк сунасың.+ 14 Суранам, бошотулганыңда мени эстей көр. Фараонго мен жөнүндө айтып, мага жакшылык кыла көр*, бул жактан чыкканга жардам бер. 15 Себеби мени еврейлердин жеринен зордоп алып келишкен.+ Анын үстүнө, бул жакта түрмөгө* түшкүдөй эч нерсе кылган эмесмин»,— деди.+

16 Жусуптун түштү жакшылыкка жоруганын көргөндө наабайчылардын башчысы ага: «Мен да түш көрдүм. Башымда ак нан салынган үч себет туруптур. 17 Эң үстүнкү себетте фараон үчүн бышырылган ар кандай нан-токочтор бар экен. Куштар учуп келип, башымдагы ошол себеттин ичиндеги нандарды чокуп жатыптыр»,— деди. 18 Жусуп ага: «Бул түштүн мааниси мындай: үч себет үч күндү билдирет. 19 Үч күндөн кийин фараон башыңды алып, устунга астырат. Денеңди куштар чокуп жейт»,— деди.+

20 Үч күндөн кийин фараон туулган күнүн белгилеп,+ кызматчыларынын баарын чакырып, чоң той өткөрдү. Анан алардын көзүнчө шарап сунуучулардын башчысы менен наабайчылардын башчысын түрмөдөн чыгарды. 21 Шарап сунуучулардын башчысын мурунку ордуна койду. Ал кайрадан фараонго чөйчөк суна баштады. 22 Ал эми наабайчылардын башчысын, Жусуп жоругандай эле, асып салды.+ 23 Бирок шарап сунуучулардын башчысы Жусупту эстеген жок, аны унутуп койду.+