Жакандын 1-каты
5 Ким Исанын Машаяк экенине ишенсе, ал — Кудайдын баласы.+ Кудайды сүйгөндөр анын балдарын да сүйөт. 2 Кудайдын балдарын+ сүйөрүбүздү анын өзүн сүйүп, осуяттарын аткарганыбыздан билебиз. 3 Себеби Кудайды сүйүү — бул анын осуяттарын аткаруу.+ Анын осуяттарын аткаруу кыйын эмес.+ 4 Ким Кудайдын баласы болсо, ал жамандыкка толгон бул дүйнөнү жеңет.+ Биз дүйнөнү ишенимибиздин аркасында жеңдик.+
5 Бул дүйнөнү ким жеңе алат?+ Исанын Кудайдын Уулу экенине ишенген адам эмеспи?+ 6 Иса Машаяк суу жана кан аркылуу келген. Ал суу менен эле эмес,+ кан менен да келген.+ Муну Кудайдын ыйык руху ырастап турат,+ анткени анын ыйык руху чындыкты ачып берет*. 7 Ошентип, үч күбө бар: 8 Кудайдын ыйык руху,+ суу+ жана кан.+ Үчөөнүн күбөлөндүрүүсү бирдей.
9 Эгер биз адамдардын күбөлөндүрүп айткандарына ишенип жатсак, анда Кудайдын алда канча салмактуу күбөлөндүрүүсүнө ишенишибиз керек эмеспи?! Себеби ал Уулу жөнүндө өзү күбөлөндүргөн. 10 Ким Кудайдын Уулуна ишенсе, ал Кудайдын ага айткандарын кабыл алганын көрсөтөт. Ал эми ким Кудайга ишенбесе, ал аны жалганчы кылып көрсөткөн болот,+ себеби Кудайдын өз Уулу жөнүндө айткандарына ишенбей койду. 11 Кудайдын күбөлөндүрүүсү болсо бул: Кудай бизге түбөлүк өмүр берди.+ Ал өмүр Уулу аркылуу берилет.+ 12 Ким Кудайдын Уулун кабыл алса, түбөлүк жашаганга үмүттөнө алат, ал эми ким кабыл албаса, үмүттөнө албайт.+
13 Муну силерге жазып жатканымдын себеби силердин, Кудайдын Уулуна* ишенгендердин,+ түбөлүк жашаганга үмүтүңөр бар экенин билишиңерди каалайм.+ 14 Эгер сураган нерсебиз Кудайдын эркине ылайык келсе,+ андан эмне сурабайлы, бизди угарынан шектенбейбиз*.+ 15 Эмне сурасак да, анын угарын билсек, анда сураганыбызды аларыбызды да билебиз.+
16 Эгер кимдир бирөө бир тууганынын өлүмгө алып барбай турган күнөө кылып жатканын көрсө, ал үчүн Кудайдан тиленсин, ошондо Кудай ага өмүр берет*.+ Мен өлүмгө алып барбай турган күнөө кылгандар жөнүндө айтып жатам. Бирок өлүмгө алып бара турган да күнөө бар.+ Ошондой күнөө кылгандар жөнүндө тилениш керектигин айткан жокмун. 17 Жаман иштердин баары — күнөө,+ бирок өлүмгө алып барбай турган да күнөө бар.
18 Ким Кудайдын баласы болсо, анын күнөө кылбай каларын билебиз. Кудайдын Уулу аны коргоп тургандыктан, Шайтан* ага тие албайт.+ 19 Биз өзүбүздүн Кудай тарапта экенибизди, ал эми бүт дүйнө Шайтандын* бийлиги астында экенин билебиз.+ 20 Ошондой эле Кудайдын Уулу келип,+ чыныгы Кудайды таанып-билишибиз үчүн, бизге акыл* бергенин да билебиз. Биз чыныгы Кудай менен анын Уулу Иса Машаяк аркылуу биримдиктебиз.+ Ал — чыныгы Кудай, түбөлүк өмүрдүн булагы.+ 21 Сүйүктүү балдарым, буркандардан оолак болгула.+