Филиппиликтерге
4 Боордошторум, мен силерди жакшы көрөм, сагынып да жүрөм. Силер менин кубанычымсыңар, сыйлыгымсыңар*.+ Сүйүктүү бир туугандарым, Теңирдин* жолунан чыкпай, бекем тургула.+
2 Эйдияга да, Синтихеге да айтарым, Теңирдин кызматчысы катары ортодогу келишпестигин чечип алышсын.+ 3 Чыныгы кызматташым, сенден да өтүнөм, ал экөөнө жардам бер. Алар Клемес менен жана аттары өмүр китебине+ жазылган башка кызматташтарым менен бирге мени менен ийиндеш туруп, жакшы кабарды таратканга бүт күчүн жумшашкан.
4 Теңирдин жолунда дайыма кубанып жүргүлө. Дагы да айтам, кубангыла!+ 5 Баарына эстүү адамдар катары таанымал болгула.+ Теңир бизге жакын экенин унутпагыла. 6 Эч нерсени ойлоп сарсанаа болбогула.+ Андан көрө, баарын дайыма Кудайга айтып, бардык жагдайда андан жетектешин жалынып-жалбарып сурангыла.+ Ошону менен бирге, ага ар дайым ыраазычылык билдиргиле. 7 Ошондо Кудай силерге адам баласынын ой-түшүнүгүнөн жогору турган тынчтыгын+ берип, Машаяк Исанын жолун жолдоп жатканыңар үчүн, жүрөгүңөр менен акылыңарды* коргойт.+
8 Ошентип, бир туугандарым, эмне чындык болсо, эмне маанилүү болсо, эмне Кудайдын көз алдында туура болсо, эмне таза болсо, эмне сүйүүгө түрткү берсе, эмне жөнүндө жакшы ойдо болушса, эмне жакшы болсо, эмне мактоого татыктуу болсо, дайыма ошолор жөнүндө ойлонгула.+ 9 Менден эмнени үйрөнсөңөр, эмнени кабыл алсаңар, эмнени уксаңар, эмнени көрсөңөр, ошолорду так аткаргыла.+ Ошондо тынчтыктын Кудайы силер менен болот.
10 Дагы деле менин камымды ойлоп жатканыңарга кубанып, Теңирге ыраазы болуп жатам.+ Силер мени буга чейин деле ойлочусуңар, бирок жардам бергенге шартыңар болгон эмес. 11 Муну азыр жардамга муктаж болгондуктан айтып жаткан жокмун. Себеби бардык жагдайда колумда болгон нерсеге топук кылганды үйрөнгөм.+ 12 Жокчулук эмне экенин да,+ молчулук эмне экенин да билем. Ток жүрсөм да, ачка жүрсөм да, молчулукта жашасам да, жакырчылыкта жашасам да, айтор, бардык жагдайда топук кылуунун сыры эмнеде экенин түшүндүм. 13 Мага күч-кубат берген Кудайдын жардамы менен бардыгын көтөрүп, баарын кыла алам.+
14 Ошентсе да кыйынчылыктарымды көтөргөнгө жардам бергениңерге ыраазымын. 15 Себеби, силер, филипиликтер, өзүңөр билгендей, мен Македониядан кеткенде, мага силерден башка бир да жыйналыш жардам берген эмес.+ Ал кезде силер жакшы кабарды жаңы эле уккан болчусуңар. 16 Тесалоникада жүргөнүмдө да, кем-карчымды толукташ үчүн мага бир эмес, эки ирет жардам жөнөткөнсүңөр. 17 Мен силерден бир нерсе үмүт этип жаткан жокмун, болгону, марттыгыңардын үзүрүн көрсөңөр экен деп жатам. 18 Анткени менде баары жетиштүү, атүгүл ашыгы менен бар. Эпафродиттен+ берип жибергениңерди алгандыктан, азыр менде баары бар. Силер берип жиберген нерселер жыпар жыттуу заттай,+ Кудайга жаккан курмандыктай. 19 Кудайым болсо улуу байлыктын ээси. Ал силерге муктаж болгон нерсеңердин баарын Машаяк Иса аркылуу берет.+ 20 Асмандагы Атабыз, Кудайыбыз, түбөлүктөн түбөлүккө даңктала берсин. Оомийн*.
21 Машаяк Исанын жолун жолдогон боордошторубуздун* баарына менден салам айтып койгула. Жанымдагы бир туугандарыбыз да силерге салам айтып жатышат. 22 Бардык бир туугандарыбыз*, айрыкча, императордун* ак сарайындагылар+ силерге салам айтып жатышат.
23 Жакшы рухуңар үчүн Мырзабыз Иса Машаяк силерге ырайымын төгө берсин.